မြောက်ဦးမြို့ ဗောဓိရွှေဂူစေတီ၏တောင်ဘက် ကိုက်အနည်းငယ်အကွာ ဟေမဝန်တောင်စွယ်တွင် တည်ရှိသည်။ သက္ကရာဇ် ၈၂၁ ခုနှစ် (အေဒီ ၁၄၅၉)တွင် ဘစောဖြူမင်း တည်ထားကိုးကွယ်ခဲ့သည်။ စေတီတော်၏ အောက်ခြေပတ်လည်မှာ ပေ ၁၃၀ ရှိပြီး ဉာဏ်တော်အမြင့် ၁၈ ပေခန့်ရှိသည်။ စေတီတော်၏ အရှေ့ဘက်တွင် ဂန္ဓကုဋီတိုက်သို့ဝင်ရန် မုခ်ပေါက်တစ်ခုရှိပြီး မုခ်ပေါက်၏ တံကဲတွင် ကျောက်ဆစ်လက်ရာများ အပြည့်ထွင်းထုထားသည်။ ဂန္ဓကုဋီတိုက်အတွင်း ဉာဏ်တော် ၇ ပေရှိ ကျောက်ဆင်းတုတော်တစ်ဆူကို ဖူးမြော်နိုင်သည်။ ဆင်းတုတော်၏ ပလ္လင်တော်မှာ အဋ္ဌဂံရှစ်မြှောင့်ပုံ အဆင့် ၈ ဆင့်ဖြင့် ကျောက်သားတစ်လုံးတည်းကို ထုဆစ်ထားပြီး ရခိုင်ရှေးဟောင်းပန်းချီ၊ ပန်းပု မြောက်များစွာဖြင့် ပလ္လင်အပြည့် ထွင်းထုထားသည်။
