အလုံမြို့နယ်ကို မုံရွာမြို့ (အလုံရပ်) မှ လူများ လာရောက်ကြသည်ကို အစွဲပြု၍ အလုံရပ်ဟု ခေါ်တွင်ကြောင်း သိရသော်လည်း တိကျသော အထောက်အထားများ မတွေ့ရှိရပါ။ ၁၉၇၂ ခုနှစ်၊ ဇွန်လ ၂၁ ရက်နေ့တွင် ထုတ်ပြန်ခဲ့သော အမိန့်ကြော်ငြာစာအရ ရန်ကုန်တိုင်းကို မြို့နယ် ၂၉ မြို့နယ် ခွဲခြားသတ်မှတ်လိုက်ရာ ‘အလုံမြို့နယ်’ ဟု ဖြစ်လာပါသည်။ အလုံမြို့နယ်သည် အရှေ့မှ အနောက်သို့ ၁.၁၅ မိုင်၊ တောင်မှမြောက်သို့ ၁.၈၁ မိုင် ရှည်လျားပြီး မြို့နယ်ဧရိယာမှာ ၁.၀၄ စတုရန်းမိုင် ကျယ်ဝန်းပါသည်။ အလုံမြို့နယ်တွင် ရပ်ကွက် ၁၁ ခု ပါဝင်ပြီး လူဦးရေပေါင်း ၅၅၀၀၀ ကျော် နေထိုင်ပါသည်။ ပင်လယ်ရေ မျက်နှာပြင်အထက် အမြင့်ပေ ၈ ပေ အထက်တွင် တည်ရှိပါသည်။ အရှေ့ဘက်တွင် ဒဂုံမြို့နယ်၊ အနောက်ဘက်တွင် ရန်ကုန်မြစ်၊ တောင်ဘက်တွင် လမ်းမတော်မြို့နယ်၊ ဆိပ်ကမ်း မြောက်ဘက်တွင် ကြည့်မြင်တိုင်မြို့နယ်တို့ တည်ရှိပါသည်။ အလုံမြို့နယ်၏ မြေမျက်နှာသွင်ပြင်မှာ ညီညာပြန့်ပြူးပြီး အရှေ့မှ အနောက်သို့ လျှော၍ နိမ့်ဆင်းသွားပါသည်။ မြစ်ချောင်းများနည်းပါးပြီး မြောက်မှတောင်သို့ စီးဆင်းလျှက်ရှိသည်။ အရှည်မိုင် (၂.၁) မိုင်ရှိသော ရန်ကုန်မြစ်မှာ ထင်ရှားပြီး အလုံမြို့နယ်၏ အနောက်မြောက်ဘက်နယ်နိမိတ်အဖြစ် မြောက်မှ တောင်သို့ စီးဆင်းလျှက်ရှိသည်။ အလုံမြို့နယ်သည် ပူအိုက်စွတ်စိုသော ရာသီဥတုရှိပြီး အမြင့်ဆုံးအပူချိန်မှာ ၄၀˚C ဖြစ်သည်။ စီးပွားရေး အချက်အချာကျသော မြို့နယ်တစ်ခုဖြစ်ပြီး ဝန်ဆောင်မှုလုပ်ငန်းကို အဓိက လုပ်ကိုင်ကြသည်။ အလုံမြို့နယ်သည် ကုန်းလမ်း၊ ရေလမ်းများ ဆုံရာတွင် တည်ရှိ၍ လမ်းပန်းဆက်သွယ်ရေး ကောင်းမွန်ပါသည်။