ဆိပ်ကြီးခနောင်တိုမြို့နယ်သည် ၃.၀၄စ တုရန်းမိုင် ကျယ်၀န်းပြီး အရှေ့မှ အနောက်သို့ ၃.၂မိုင်၊ တောင်မှမြောက်သို့ ၂.၃မိုင် ရှည်လျားပါသည်။ မြို့နယ်၏အရှေ့ဘက်တွင် ရန်ကုန်မြစ်နှင့် ဒလမြို့နယ်၊ အနောက်ဘက်တွင် တွံတေးမြို့နယ်၊ တောင်ဘက်တွင် တွံတေးမြို့ နယ်နှင့် ဒလမြိုနယ်၊ မြောက်ဘက်တွင် ရန်ကုန်မြစ်နှင့် ကြည်မြင်တိုင် မြို့နယ်တို့နှင့် ထိစပ်လျက်ရှိပါသည်။ ဆိပ်ကြီးခနောင်တိုမြို့နယ်သည် ဒီရေအတက်အကျအမြဲရှိပြီး မိုးတွင်းကာလတွင် ထူးကဲဒီရေတက်သဖြင့် မြို့နယ်၏ ၉၀% မှာ ခေတ္တ မျှ ရေနစ်မြုပ်လျက်ရှိပါသည်။ မြို့နယ်အတွင်း တွံတေးတူးမြောင်းနှင့် ခနောင်တိုချောင်းတို့သည် အရှေ့ မှ အနောက်သို့ စီးဆင်းလျက်ရှိပါသည်။
ဒေသသမိုင်းအကျဉ်း
ဆိပ်ကြီးခနောင်တိုမြို့နယ်သည် မြန်မာမင်းများလက်ထက် ဒဂုံ၊ ဒလနှင့် သန်လျင်ဒေသများ ထင်ရှားစဉ်ကပင် တည်ရှိပါသည်။ ထိုစဉ်က တွံတေးတူးမြောင်းမရှိသေးဘဲ ဒလ၊ တွံတေး တို့နှင့် တစ်ဆက်တည်းရှိခဲ့ပါသည်။ ဤဒေသတွင် လှေ၊ သင်္ဘော များဆိုက်ကပ် ရပ်နားရန် ဆိပ်ကမ်းကောင်းများရှိခဲ့၍ ဆိပ်ကြီးဟု ခေါ်တွင်ခဲ့ပြီး ခနောင်တိုမှာ မွန်ဘာသာစကားဖြင့် (ခနောင်-ဝဲ) ဖြစ်၍ ချောင်းများ အတွင်းဝဲများပေါသည့်အတွက် ၎င်းဝဲများကို အစွဲပြု၍ ခနောင်တိုဟု ခေါ်တွင်လာခဲ့ပါသည်။ ၁၉၇၂ ခုနှစ် အုပ်ချုပ်ရေးအရ မြို့နယ်များ ကိုပြန်လည်ဖွဲ့စည်းခဲ့ရာ ရန်ကုန်တိုင်းစည်ပင်သာယာရေးနယ်နိမိတ် အတွင်းတွင် ဆိပ်ကြီးခနောင်တိုမြို့နယ်ဟူ၍ ဖွဲ့စည်းပေါ်ပေါက်လာခဲ့ ပါသည်။