အိမ်မဲမြို့နယ်သည် ရပ်ကွက် ၅ ရပ်ကွက်၊ ကျေးရွာအုပ်စု ၉၇ စု၊ ကျေးရွာပေါင်း ၅၀၅ ရွာဖြင့် ဖွဲ့စည်းထားပြီး လူဦးရေစုစုပေါင်း ၂၁၁၂၅၇ ဦးခန့်နေထိုင်ပါသည်။ မြို့နယ်ဧရိယာအကျယ်အဝန်း ၂၈၆.၆၇ စတုရန်းမိုင်ရှိပါသည်။ အိမ်မဲမြို့နယ်၏ အရှေ့ဘက်တွင် ပန်းတနော်မြို့နယ်၊ တောင်ဘက်တွင် မြောင်းမြမြို့နယ်၊ ဝါးခယ်မမြို့နယ်တို့နှင့် နယ်နိမိတ်ထိစပ်လျက်ရှိပါသည်။ အနောက်ဘက်တွင် ကန်ကြီးဒေါင့်မြို့နယ်၊ မြောက်ဘက်တွင် ကျောင်းကုန်းမြို့နယ်တို့နှင့် နယ်နိမိတ်ချင်းထိစပ်လျက်ရှိပါသည်။
အိမ်မဲမြို့နယ်သည် မြစ်ချောင်းများ ပေါများသည့်ဒေသတစ်ခုဖြစ်ပြီး ထင်ရှားသောချောင်းမှာ မင်းမနိုင်ချောင်းဖြစ်ပြီး အိမ်မဲမြို့အနီးမှဖြတ်၍ တောင်မှမြောက်သို့ စီးဆင်းပါသည်။
ဒေသသမိုင်းအကျဉ်း
အိမ်မဲမြို့နယ်သည် မြို့အဖြစ်သတ်မှတ်ခြင်းမခံရမီက ကျေးရွာအစုကလေး တစ်စုသာဖြစ်ပါသည်။ ဟံသာ၀တီပြည့်ရှင် ရာဇဓိရာဇ်လက်ထက်တွင် မြောင်းမြမြို့စားလောက်ဖျား၏ လက်အောက်ခံ ကျုံပဒီတိုက်နယ်၌ပါဝင်သော လယ်ပေါ်စုဟုခေါ်သည့် ကျေးရွာအစုကလေးတစ်ခုသာဖြစ်ကြောင်းကို မြန်မာ့စွယ်စုံကျမ်းအတွဲ (၁၅) စာမျက်နှာ (၄၄၄) တွင်ဖော်ပြထားပါသည်။ အဆိုပါ လယ်ပေါ်စုတွင် နေထိုင်သူများအား ရှင်ပင်ချမ်းသာဘုရားကြီးကို ထိုအစုသို့ပင့်၍ ကိုးကွယ်ရန် အိပ်မက်ပေးချက်အရ အိမ်မက်ကြီးအစုဟု ခေါ်တွင်ခဲ့ပါသည်။ ထိုအိမ်မက်ကြီးအစုမှာ ကာလရှည်ကြာသော် အိမ်မဲရွာဖြစ်လာခဲ့ပါသည်။ အိမ်မဲရွာမှအိမ်မဲမြို့ ဖြစ်လာပြီး ၁၉၀၆ ခုနှစ် မြန်မာနိုင်ငံ တော်အောက်ပိုင်း မြို့ရွာရှိ မြေယာအက်ဥပဒေ အလို့ငှာမြို့ပြစာရင်းအဖြစ် အိမ်မဲနှင့်သရက်ကုန်းကို ၁၉၀၆ခုနှစ်၊ ဒီဇင်ဘာလ(၂၉)ရက်စွဲပါ အမိန့်ကြော်ငြာစာအမှတ် (၁၀၀) အရ မြို့ဟူ၍ အထူးကြော်ငြာပြဌာန်းခဲ့ပါသည်။ ထိုစဉ်က သရက်ကုန်းတွင် မြို့နယ်ရုံးစိုက်ပြီးနောက် လမ်းပန်းဆက်သွယ် ရေးကောင်းမွန်သော အိမ်မဲမြို့သို့ ပြောင်းရွှေ့ပြီး မြို့နယ်ရုံး စိုက်ရာမြို့ ဖြစ်လာခဲ့ပါသည်။