မြောက်ဦးမြို့ ကိုးသောင်းပုထိုးတော်ကြီး၏ တောင်ဘက် တစ်ဖာလုံခန့်အကွာ ပေ ၁၀၀ ခန့်မြင့်သော တောင်ကုန်းပေါ်၌ တည်ရှိသည်။ ဓညဝတီပြည့်ရှင် သူရိယစက္ကမင်းသည် မြတ်စွာဘုရား၏ လက်ဝဲပိစိတော်ဓာတ်ကို ဌာပနာ၍ တည်ထားကိုးကွယ်ခဲ့သည်။ ကောဇာသက္ကရာဇ် ၄၈၅ ခုနှစ်တွင် ဒုတိယအကြိမ်အဖြစ် ပုရိန်ခေတ် ဘုရင်ကောလိယက ပြုပြင်မွမ်းမံတည်ဆောက်ကာ ကျောက်ဆင်းတုတော်တစ်ဆူ ထပ်မံတည်ထားခဲ့သည်။ တတိယအကြိမ်အဖြစ် မြောက်ဦးခေတ် ဘုရင်မင်းဖလောင်းက စေတီတော်ကို ယခုလက်ရှိပုံစံအတိုင်း ဆင်းတုတော် ၄ ဆူဖြင့် မွမ်းမံတည်ထားခဲ့သည်။ စေတီတော်မှာ လေးမြှောင့်ပုံဖြစ်ပြီး စေတီတော်၏ အောက်ခြေပတ်လည်မှာ ပေ ၄၀ ရှိကာ ဉာဏ်တော်အမြင့် ၁၅ ပေရှိသည်။ အောက်ခံလိုဏ်ဂူကျောင်းတစ်ထပ်ပါရှိပြီး ဂူ၏အလယ်နံရံတွင် ပုံသဏ္ဌာန်တူ ဉာဏ်တော်အမြင့် ၈ ပေစီရှိသော ကျောက်ဆင်းတုတော် ၄ ဆူက အရပ်လေးမျက်နှာရှိ မုခ် ၄ ခုသို့ မျက်နှာမူကာ ကျောကပ်လျက်တည်ရှိသည်။ အလယ်မဏ္ဍိုင်ထိပ်၌ လေးမြို့ခေတ်လက်ရာ ကျောက်ဆင်းတုတော်ကြီးတစ်ဆူ ကိန်းဝပ်လျက်ရှိသည်။
