ရန်ကုန် ဒီဇင်ဘာ ၂၄
ပဲခူးမြစ်ကိုဖြတ်ကျော်၍ သာကေတမြို့နယ်နှင့် သန်လျင်မြို့နယ်တို့ကို ဆက်စပ်ပေးမည့် သန်လျင်-ရန်ကုန် အမှတ်(၃) တံတားကြီးတည်ဆောက်မှုမှာ ၆၀ ရာခိုင်နှုန်းခန့် ပြီးစီးနေပြီး တံတား တည်ဆောက်မှုအားလုံး ၂၀၂၂ ခုနှစ် ဖေဖော်ဝါရီတွင် ပြီးစီးနိုင်မည်ဖြစ်ကြောင်း သန်လျင်မြို့နယ် အမှတ်(၂) တိုင်းဒေသကြီးလွှတ်တော်ကိုယ်စားလှယ် ဦးအောင်နိုင်ထွန်းက ပြောကြားသည်။
တံတားတည်ဆောက်ရေးလုပ်ငန်းခွင်သို့ သန်လျင်မြို့နယ်မှ လွှတ်တော်ကိုယ်စားလှယ်များနှင့် မြို့နယ်မှတာ၀န်ရှိသူများ ဒီဇင်ဘာ ၂၁ ရက်က သွားရောက်လေ့လာရာတွင် မြန်မာ့အလင်းသို့ ပြောကြားခဲ့ခြင်းဖြစ်သည်။
တံတားကြီးကို အပိုင်းသုံးပိုင်း ခွဲခြား တည်ဆောက်လျက်ရှိသည်။ တိုင်းဒေသကြီး လွှတ်တော်ကိုယ်စား လှယ် ဦးအောင်နိုင်ထွန်းက ‘‘တံတား ကြီးကို အပိုင်းသုံးပိုင်း ပိုင်းဖြတ်ပြီး တည်ဆောက်နေတာပါ။ Package 1,2,3 ဆိုပြီးတော့ပေါ့၊ Package 1 နဲ့ 2 ကို ၂၀၁၉ ခုနှစ် ဇန်နဝါရီလအတွင်းက စတင်ခဲ့တာပါ။ ၂၀၂၂ ခုနှစ် ဖေဖော်ဝါရီ ထဲမှာ ပြီးဖို့လျာထားတယ်။ Package 3 ကိုတော့ ၂၀၁၉ မေလအတွင်းက စတယ်။ ၂၀၂၁ ခုနှစ် မေလထဲမှာ ပြီးစီး မယ်လို့ လျာထားချက်ရှိပါတယ်။
‘‘Package 1 က သန်လျင်ဘက် အခြမ်းမှာပါ။ မြစ်ထဲအထိပေါ့။ ၁၃၁၂ မီတာရှည်မယ်။ Package 2 က ၁၃၆၃ မီတာရှည်မယ် ။ တစ်ဖက်ကမ်း (သာကေတ) ရောက်တဲ့အထိပေါ့။ Package 3 က ၈၂၅ မီတာရှည်မယ်။ သာကေတကုန်းပေါ် အဝိုင်းထိပ်နား အထိလောက်ကို မိုးပျံတံတားပုံစံနဲ့ သွားမှာပါ။
‘‘အခုလောလောဆယ် Package 1 ရဲ့ ပြီးစီးမှုက ပြီးခဲ့တဲ့ နို၀င်ဘာလ ကုန်အထိ ၄၉ ဒသမ ၅၉ ရာခိုင်နှုန်း ပြီးစီးနေပါပြီ။ နဂိုရည်မှန်းချက်က ၆၂ ဒသမ ၆၃ ရာခိုင်နှုန်းပါ။ ဒါပေမယ့် ကိုဗစ်ကြောင့် လုပ်ငန်းတုံ့ဆိုင်းမှု လေးတွေ ရှိခဲ့တဲ့အတွက်ပါ။
‘‘Package 2 ကလည်း ပြီးခဲ့တဲ့ နို၀င်ဘာလအကုန်မှာ ၆၃ ဒသမ ၉၆ ရာခိုင်နှုန်းပြီးဖို့ မျှော်မှန်းခဲ့ပေမယ့် ၅၀ ဒသမ ၀၆ ရာခိုင်နှုန်းပဲ ပြီးစီးမှု ရှိခဲ့ပါတယ်၊။ Package 3 က အခု နို၀င် ဘာလကုန်မှာ သူတို့မှန်းထားတဲ့ ၇၈ ဒသမ ၈၆ ရာခိုင်နှုန်းထက် ပိုပါ တယ်။ ၈၃ ဒသမ ၇၇ ရာခိုင်နှုန်းပြီးစီး သွားပါပြီ။ တံတားတစ်ခုလုံးရဲ့ ပြီးစီး မှုကို ခြုံပြောရရင်တော့ ၆၀ ရာခိုင်နှုန်း နီးပါးအထိ ပြီးစီးနေပြီလို့ ဆိုရမှာ ဖြစ်ပါတယ်’’ဟု ရှင်းပြသည်။
သန်လျင်-ရန်ကုန် အမှတ်(၃)တံတားကို ဆောက်လုပ်ရေး၀န်ကြီး ဌာန တံတားဦးစီးဌာနက တာ၀န်ခံ၍ ဂျပန်နိုင်ငံမှ ကုမ္ပဏီများဖြစ်သည့် Sumitomo Mitsui Construction နှင့် Yokogawa Bridge တို့က Package 1နှင့် 2 ကို လည်းကောင်း၊ Package 3 ကို Tokyu Construction တို့က တည်ဆောက်နေခြင်းဖြစ်ကြောင်း သိရ သည်။
အမှတ်(၃) သန်လျင်-ရန်ကုန် တံတားသစ်ကြီးကို လက်ရှိတံတားဟောင်းတစ်ခုဖြစ်သည့် သန်လျင် အမှတ်(၁)တံတားနှင့်ယှဉ်လျက် မီတာ ၁၂၅ အကွာတွင် တည်ဆောက်နေ ခြင်းဖြစ်သည်။ အမှတ်(၃) တံတား သစ်ကြီး ပြီးစီးပါကလည်း တံတား အဟောင်းကို ဆက်လက်အသုံးပြု သွားနေဦးမည်ဟု သိရသည်။
တံတားကြီး တည်ဆောက်ပြီး ဖွင့်လှစ်နိုင်ပါက မြို့နယ်၏ ဖွံ့ဖြိုး တိုးတက်မှုနှင့်ပတ်သက်၍ တိုင်းဒေသ ကြီး လွှတ်တော်ကိုယ်စားလှယ် ဦးအောင်နိုင်ထွန်းက ‘‘ကျွန်တော်တို့ သန်လျင်မြို့နယ်ကို အတော်များများ က ဒုတိယပြင်ဦးလွင်လို့ တင်စားခေါ်ဝေါ်ကြတယ်။ အေးချမ်းပြီး နေထိုင်လို့ကောင်းတဲ့ ရှေးဟောင်းမြို့လေးတစ်မြို့ပါ။ အလုပ်က အငြိမ်းစား ယူပြီးတဲ့၀န်ထမ်းတွေက ကြိုက်ကြ တယ်။ စီးပွားရေးလုပ်ဖို့ကျတော့ မြစ်ခြားနေတာရယ်၊ တံတားအခက် အခဲကြောင့် စဉ်းစားကြတယ်။ အခု ဆို သီလဝါအထူးစီးပွားရေးဇုန်ကြီး ပေါ်လာတဲ့အပြင် JICA အကူအညီ နဲ့ ကျိုက်ခေါက်ဘုရားလမ်းကြီးက လည်း နိုင်ငံတကာအဆင့်မီရှိလာပြီ။အခုဒီတံတားသစ်ကြီးကလည်း မကြာ မီပြီးတော့မှာမို့ သန်လျင်နဲ့ ၀န်းကျင် တစ်ခွင်ကတော့ ဖွံ့ဖြိုးမှုတွေနဲ့အတူ တိုးတက်လာတော့မှာပါ’’ဟု ပြော သည်။
တင်၀င်းလေး(ကြည့်မြင်တိုင်)