မင်းတုန်းမင်းတရားကြီး၏ အနွယ်တော် ဆွေတော်မျိုးတော်များမြှုပ်နှံထားရာ သင်္ချိုင်းသည် ရန်ကုန်မြို့ ဗဟန်းမြို့နယ် ငါးထပ်ကြီးဘုရားအနီး မြန်အောင်ကျောင်းတိုက်ဘုန်းတော်ကြီးကျောင်း ပရဝုဏ်အတွင်းတွင် တည်ရှိပါသည်။ ထိုသင်္ချိုင်းတွင် အုတ်ဂူစုစုပေါင်း ၂၀ လုံးရှိရာ ပြည်ထဲရေးဝန်ကြီးဆာဦးသာ၏ အုတ်ဂူအပါအဝင် ဆွေတော်မျိုးတော်များ၏ အုတ်ဂူခြောက်လုံးဖြစ်ပြီး ကျန်အုတ်ဂူများသည် ပြင်ပပုဂ္ဂိုလ်များ၏အုတ်ဂူများ ဖြစ်ပါသည်။ ယင်းနေရာကို မင်းတုန်းမင်းကြီး၏ သမီးတော် မင်းတပ်ထိပ်ခေါင်တင်က အင်္ဂလိပ်လက်ထက်တွင် မြေ ၁ ဧကခွဲ ဝယ်ယူပြီး ဆွေတော်မျိုးတော်သင်္ချိုင်း တည်ဆောက်ခဲ့သည်ဟု သိရပါသည်။ အုတ်ဂူများမှာ မင်းတုန်းမင်း၏ သမီးတော်မင်းတပ်ထိပ်ခေါင်တင်၊ မင်းတုန်းမင်း၏မြေးတော် နှစ်ပါး၊ အိမ်ရှေ့မင်း၏မြေးတော်၊ ညောင်အုပ်မင်းသမီးထိပ်တင်ချို၊ မင်းတုန်းမင်း၏မြေး ညောင်အုပ်မင်းသား၏ သမီးညောင်အုပ်ထိပ်တင်စိုးတို့၏ အုတ်ဂူများဖြစ်ပါသည်။
