သမိုင်းဝင်တော်လှန်ရေးပန်းခြံသည် ရန်ကုန်မြို့ ဒဂုံမြို့နယ် ဦးဝိစာရလမ်းနှင့် ဓမ္မစေတီလမ်းထောင့်တွင် တည်ရှိပြီး မြန်မာ့လွတ်လပ်ရေးကြိုးပမ်းမှုသမိုင်းတွင် အရေးပါသော အထင်ကရနေရာ တစ်ခုဖြစ်ပါသည်။ တပ်မတော်နေ့အခမ်းအနားများကို ၂၀၀၅ ခုနှစ်၊ နှစ် ၆၀ ပြည့်နှစ် တပ်မတော်နေ့အထိ နှစ်စဉ်နှစ်တိုင်း ကျင်းပခဲ့သည့် နေရာဖြစ်ပါသည်။ ယခုအခါ တပ်မတော်နေ့အခမ်းအနားများကို နေပြည်တော်ရှိ စစ်ရေးပြကွင်းကြီးတွင် ပြုလုပ်လျက်ရှိပါသည်။ တော်လှန်ရေးပန်းခြံကို ၂၀၂၀ ပြည့်နှစ် ဇန်နဝါရီ ၁ ရက်နေ့မှ စတင်ပြီး နေ့စဉ်နံနက် ၅ နာရီမှ ည ၉ နာရီအထိ အများပြည်သူများ ဝင်ရောက်လေ့လာ ကြည့်ရှုအပန်းဖြေနိုင်ရန် ဖွင့်လှစ်ပေးထားပါသည်။ ပန်းခြံထဲတွင် ၁၉၄၅ ခုနှစ်၊ မတ်လ ၂၇ ရက်နေ့တွင် ဗိုလ်ချုပ်အောင်ဆန်းမှ ဖက်ဆစ်ဂျပန်တော်လှန်ရေးအတွက် သမိုင်းဝင်စစ်ထွက်မိန့်ခွန်း ပြောကြားခဲ့သော နေရာရှိ စစ်ထွက်သပြေပင်၊ ဗိုလ်ချုပ်၏ စီးတော်မြင်းချည်ခဲ့သော မြင်းချည်သပြေပင်၊ အလေးပြုခံစင်မြင့်နှင့် အလံတိုင်များ၊ ဗိုလ်ချုပ်ကြေးရုပ်၊ မီးရှူးတိုင်များ၊ ကျန်းမာရေး ကိုယ်လက်လေ့ကျင့်ရေးကွင်းများ၊ ရေပန်းများ၊ ကလေးကစားကွင်းများနှင့် ပြင်ဆင်ထားရှိပါသည်။
