အော်ပီကျယ်

Listing Description

တကွက်ဟာသ၊ သရော်ကာတွန်းများကို ပြောင်မြောက်အောင် ရေးဆွဲနိုင်သူ နာမည်ကြီး ကာတွန်းဆရာ အော်ပီကျယ်ကို ၁၉၅၉ ခုနှစ်၊ ဇူလိုင်လ ၂၄ ရက်နေ့တွင် ပခုက္ကူခရိုင် ရေနံချပ်ရွာ၌ အဖဦးသောင်းစိန်နှင့် အမိဒေါ်ခင်အေးမှ မွေးဖွားခဲ့သည်။ အမည်ရင်းမှာ ဝင်းနိုင်ဖြစ်သည်။ စာရေးဆရာ ကိုရိုးကွန့်၏ ညီဖြစ်သည်။

၁၉၆၄ ခုနှစ်မှ ၁၉၈၂ ခုနှစ်ထိ ရန်ကုန် ဒွန်မော်စကိုကျောင်း၊ မိတ္ထီလာ ဒေါ်ပါကျောင်း၊ မန္တလေးလေ့ကျင့်ရေးကျောင်း၊ မန္တလေး အ.ထ.က(၁၆)နှင့် ရန်ကုန်စက်မှုတက္ကသိုလ်တွင် ပညာသင်ကြားခဲ့သည်။ ၁၉၈၂ ခုနှစ်တွင် စက်မှုအင်ဂျင်နီယာB.E(Mech)ဘွဲ့ကို ရရှိခဲ့သည်။

၁၉၈၁ ခုနှစ်တွင် မဂ္ဂဇင်းကြီးများတွင် ကာတွန်းရေးဆွဲခဲ့သည်။ ၁၉၈၂ ခုနှစ်မှ ၁၉၈၈ ခုနှစ်အထိ ကားထုတ်လုပ်ရေး (အကြီးစားစက်မှုလုပ်ငန်း)အင်ဂျင်နီယာနှင့် ဆန်စက်အင်ဂျင်နီယာအဖြစ် လုပ်ကိုင်ခဲ့သည်။ ၁၉၈၉ ခုနှစ်၊ ဧပြီလ ၄ ရက်မှစ၍ အချိန်ပြည့် ကာတွန်းဆရာအဖြစ် လုပ်ကိုင်ခဲ့သည်။ ရံဖန်ရံခါ ကြော်ငြာဖန်တီးခြင်း၊ သရုပ်ဖော်ရေးဆွဲခြင်း၊ မျက်နှာဖုံးဒီဇိုင်း ပြုလုပ်ခြင်း၊ စီဒီပြုလုပ်ခြင်းများ လုပ်ကိုင်သည်။

၁၉၉၆ ခုနှစ်တွင် လန်ဒန်မြို့၌ ကွန်ပျူတာကာတွန်းရုပ်ရှင် (၃)လသင်တန်း တက်ရောက်ခဲ့သည်။ ၁၉၉၃၊ ၉၄၊ ၉၅၊ ၉၆-ခုနှစ်များတွင် မြို့နယ်စာဖတ်သင်းများ၊ စာချစ်သူများနှင့် မဂ္ဂဇင်းများကပေးသော ကာတွန်းဆုများကို ရရှိခဲ့သည်။ ၂၀၀၁ ခုနှစ်တွင် ဟားဗတ် တက္ကသိုလ် တက်ရောက်ခဲ့ပြီး MPA(ပြည်သူ့ရေးရာ စီမံခန့်ခွဲမှုမဟာဘွဲ့) ရရှိခဲ့သည်။

ထုတ်ဝေခဲ့သော စာအုပ်များ

အော်ပီကျယ်ကာတွန်းများ(၁) (၁၉၉၀-ခုနှစ်)

အော်ပီကျယ်ကာတွန်းများ(၂) (၁၉၉၄-ခုနှစ်)

သိုးနှစ်ကောင် (ဇော်မောင် နှင့်) (၁၉၉၇-ခုနှစ်)

ပြည်တွင်းဖြစ်ကာတွန်းများ ( ကံချွန်၊ ဝင်းအောင်၊ စောမင်းဝေ နှင့်) (၁၉၉၈-ခုနှစ်)

Quotations (ဆရာကြွယ် နှင့်) (၁၉၉၉-ခုနှစ်)

မိသားစု

အိမ်ထောင်ရှိ၍ သားနှစ်ယောက်၊ သမီးတစ်ယောက်ရှိသည်။