မွန်ပြည်နယ်၊ မုဒုံမြို့၊ မြို့မ (၄) ရပ်ကွက်၊ တောင်ကုန်းပေါ်တွင် တည်ရှိသည့် ရှေးဟောင်းသမိုင်းဝင် ဆံတော်ရှင်စေတီ တစ်ဆူဖြစ်ပါသည်။ စေတီတော်သမိုင်းအရ မြတ်စွာဘုရားရှင် သထုံပြည်သို့ ဒေသစာရီကြွချီလာစဉ် ရသေ့ခြောက်ပါးအား ဆံတော်များ ပေးအပ်ချီးမြှင့်ခဲ့ရာ စန္ဒရသေ့သည် နောင်တော်စောဖားမင်းနှင့် တိုင်ပင်ကာ မိမိရရှိသော ဆံတော်ဓာတ်ကို ဌာပနာ၍ ကျိုက္ကမော့လေးစေတီကို တည်ထားကိုးကွယ်ခဲ့သည်ဟု သိရပါသည်။ ဘုရားပွဲတော်ကို နှစ်စဉ် တန်ဆောင်မုန်းလပြည့်နေ့၌ စည်ကားစွာ ကျင်းပပါသည်။
