မကွေးတိုင်းဒေသကြီး၊ ချောက်မြို့မှ ၂၄ မိုင်ခန့်အကွာ၊ ပခန်းငယ်ကျေးရွာတွင် တည်ရှိသည်။ ပုဂံခေတ် အနော်ရထာမင်းလက်ထက်တွင် အရည်းကြီးများ ပခန်းငယ်အရပ်သို့ ထွက်ပြေးတိမ်းရှောင်နေထိုင်ခဲ့ရာ အနော်ရထာမင်းက အရည်းကြီးများ၏ အင်းအိုင်လက်ဖွဲ့များဖြင့် တိုက်ခိုက်မှုကို အဆီးအတား ဖြစ်စေရန် ဤရှင်ပင်ကာဆီးဘုရားကို တည်ထားခဲ့သည်ဟု နှုတ်ပြောရာဇဝင်များအရ သိရပါသည်။ ဂူဘုရားအမျိုးအစားဖြစ်ပြီး အုတ်များကို သပ်စီပေါင်းမိုး ဗိသုကာလက်ရာဖြင့် တည်ဆောက်ထားသည်။ လိုဏ်အတွင်း၌ ပုဂံခေတ်လက်ရာ ထိုင်တော်မူ ဗုဒ္ဓရုပ်ပွားတော်တစ်ဆူကို ဖူးမြင်နိုင်ပါသည်။
