စောရွှေဗိုလ်

ဆရာစောရွှေဗိုလ်သည် ရေနံချောင်း ဇာတိ ဖြစ်သည်။ ၁၉၂၆ ခုနှစ်၊ ဇွန်လ ၁၆ ရက်နေ့တွင် အဖ ပန်တိမ် ဆရာကြီး ဦးလှကယ်၊ အမိ ဒေါ်ခင်မာထွေးတို့မှ ဖွားမြင်သော သားသမီး ၁ဝ ယောက် အနက် စတုတ္ထမြောက် သားဖြစ်သည်။ အမည်ရင်းမှာ ဦးသောင်းရွှေ ဖြစ်ပြီး၊ မိဘနှင့် ဆွေမျိုးများက ကိုသောင်းဟု ခေါ်ဆိုကြသည်။ မောင်ဖေ့ကယ်၊ မြတ့်ကယ်၊ မောင့်ကယ်ဟိုး၊ မောင်တောက်ထွန်း၊ ဦးကြီးဗလ၊ ငြိမ်းမောင်၊ တိုင်းရင်းသားတဦး၊ စလင်းသောက်ရှူး၊ တက္ကသိုလ် ခင်မောင်လတ်၊ Saw Shwe Bo၊  Myat kywe၊ M-kyaw Ho၊ H-T-Shwe၊ J-Lynn တို့မှာ ကလောင်အမည်ခွဲများဖြစ်သည်။

ရေနံချောင်းရွာသစ် ဦးဟံသာ၏ မြန်မာ အထက်တန်းကျောင်းတွင် ၁၉၁၃ ခုနှစ်မှ ၁၉၃၆ အထိ စတုတ္ထတန်း အောင်မြင်ခဲ့သည်။ အစိုးရ အထက်တန်းကျောင်းတွင် ၁၉၃၆ မှ ၁၉၄၂ အထိ ၉ တန်း အောင်မြင်ခဲ့သည်။ ၁၉၃၉ - ၄၂ တွင် ဒို့ဗမာ ကျောင်းသား မြန်မာစာ ပြန်ပွား တိုးတက်ရေး အသင်း၏ အတွင်းရေးမှူး တာဝန် ယူခဲ့သည်။ ၁၉၄၇ ခုနှစ်မှ စ၍ ရန်ကုန် ဒဂုန်မဂ္ဂဇင်းသို့ ကဗျာနှင့် ဆောင်းပါးစာမူများ ပေးပို့ခဲ့သည်။ ၁၉၄၈ မှစ၍ ပထမ အကြိမ် လွတ်လပ်ရေး အောင်ပွဲ (စလင်းမြို့) တွင် ဝတ္ထုတို ပထမဆု ရရှိခဲ့သည်။ ၁၉၄၈ - ၄၉ ခုနှစ်တွင် 'သောင်ရှူး' ဟူသော ကလောင် အမည်ဖြင့် ဒဂုန် မဂ္ဂဇင်း၌ 'စေတနာရှင်' ဟူသော တဂိုးဘာသာပြန်ကို ရေးခဲ့သည်။ ဤအချိန်မှစ၍ စာပေလောကသို့ ဝင်ရောက်လာသည်။

၁၉၄၉ ခုနှစ်တွင် ၁ဝ တန်း အောင်မြင်သည်။ ၁၉၅ဝ တွင် လူထု ပညာရေးမှူး၊ ၁၉၅ဝ - ၅၆ ခုနှစ်တွင် လူထုပညာ မဂ္ဂဇင်း အယ်ဒီတာ အဖွဲ့ဝင်၊ ၁၉၅၆ - ၆၂ ခုနှစ်တွင် ပြန်ကြားရေး ဌာန မြန်မာဘာသာ ကျမ်းပြု အရာရှိ အဖြစ် ဝင်ရောက် အမှုထမ်းခဲ့သည်။ ယင်းကျမ်းပြု အရာရှိ တာဝန်ခန်းမှာ ယခင်က ဆရာကြီး ဦးခင်မောင်၊ ဆရာ ဇေယျ၊ ဆရာ တက်တိုး၊ ဆရာ တင့်တယ် အစရှိသော ဆရာ့ ဆရာကြီး ထိုင်ခဲ့သော အလုပ်စခန်းပင် ဖြစ်သည်။ ၁၉၅၈ ခုနှစ်တွင် ဝိဇ္ဇာဘွဲ့ ရရှိသည်။

၁၉၆၂ ခုနှစ်၊ တော်လှန်ရေးကောင်စီ တက်လာသောအခါ ပြန်ကြားရေး ဌာနမှ ရှေ့သို့ (Forward) ၁၅ ရက် တစ်ကြိမ် (မဆလ ဝါဒဖြန့်) စာစောင်များ စတင် ထုတ်ဝေခဲ့ရာ မြန်မာဘာသာဖြင့် စောင်ရေ တစ်သိန်း၊ အင်္ဂလိပ်ဘာသာဖြင့် စောင်ရေ နှစ်သိန်း ရိုက်နှိပ် ဖြန့်ချိခဲ့သည်။ စာစောင် ထုတ်ဝေရာတွင် စာတည်း၊ တာဝန်ခံစာတည်း၊ စာတည်းမှူးချုပ်အဖြစ် အဆင့်ဆင့်တာဝန်ခံ ဆောင်ရွက်ခဲ့သည်။ ခရီးသွား ဆောင်းပါးများ ရေးသားခြင်းများ ဆောင်ရွက်လျှက် တိုင်းနှင့်ပြည်နယ်အနှံ့ ဗဟုသုတဆည်းပူး ဆောင်ရွက်နေစဉ် ဆစ်ဒနီ (I.T.I.) နိုင်ငံတကာ သင်တန်းမှ ဖိတ်ခေါ်သည့် သင်တန်းသို့ တက်ရောက် ခဲ့ရသည်။

ပြန်ကြားရေး ဌာနခွဲမှ ရှေ့သို့ (Forward) စာစောင်များအပြင် လစဉ်စာအုပ်များ၊ နှစ်စဉ်အထူးထုတ် စာအုပ်ကြီးများလည်း ပြုစုထုတ်ဝေခဲ့သည်။ ၁၉၈၇ ခုနှစ်တွင် လုပ်သက်ပြည့်၍ အငြိမ်းစား ယူခဲ့သည်။ အငြိမ်းစား ယူပြီးနောက် ပုဂ္ဂလိကအင်္ဂလိပ် မဂ္ဂဇင်း ၂ စောင်ကို စာတည်းမှူးချုပ်အဖြစ် တာဝန်ယူ ထုတ်ဝေပေးခဲ့သည်။ ယင်းတို့မှာ -

၁။ English, English, English where

၂။ Panarama တို့ ဖြစ်သည်။

ဆရာ စောရွှေဗိုလ်သည် ကိုယ်တိုင်ခရီးထွက်၍ စာပေပြုစုသူဖြစ်၍ ဆောင်းပါးအရေအတွက် များလှပါသည်။ ရှေ့သို့၊ လူထုပညာအပြင်၊ ပုဂ္ဂလိက ထုတ်ဝေရေးမှ စုံထောက်၊ နဝဒေး၊ နွယ်နီ စသော မဂ္ဂဇင်းများတွင်လည်း ဝတ္ထု၊ ဆောင်းပါး၊ စာမူတို့ ရေးသားခဲ့ရာ စုစုပေါင်း တစ်ထောင်ထက်မနည်း ရေးသားခဲ့သည်။

ရေးသား ထုတ်ဝေခဲ့ပြီးသော စာအုပ်များ

၁။ ချစ်သောဆရာ ၁၉၆၈

၂။ ခေတ်စမ်း ဘာသာပြန် ၁၉၆၈

၃။ စိတ်ဂနိုင် (သို့) နှင်းကေသာ၏ တသက်တာ မှတ်တမ်း ၁၉၆၈

၄။ အထောက်တော် ၁၉၇၀

၅။ ကလေးသူငယ် သတ္တိထူးပုံများ ၁၉၉၃

၆။ ထသွားထလာ အင်္ဂလိပ်စာ အမှတ် (၂) ၁၉၉၅

၇။ ချစ်သောမီမီ ၁၉၉၇