မြန်မာတို့ကို ကမ္ဘာကျော် အန်ဒါဆင်ပုံပြင်များနှင့် မိတ်ဆက်ပေးခဲ့သူ စာရေးဆရာကြီး ဦးအံ့မောင်ကွယ်လွန်

ကမ္ဘာကျော် အန်ဒါဆင်ပုံပြင်များ ကို မြန်မာဘာသာသို့ ပြန်ဆိုရေးသားခဲ့သည့် စာရေးဆရာ အံ့မောင်(၈၉ နှစ်)သည် ယနေ့နံနက် ၁၁နာရီ မိနစ် ၄၀က ကွယ်လွန်သွားကြောင်း သိရသည်။

မုံရွာလယ်ဇင်ဇာတိ ဆရာဦးအံ့မောင်သည် ၂၀၁၉ ခုနှစ်က တသက်တာ စာပေဆုကို ရရှိခဲ့ပြီး၊ ၂၀၂၀ ခု ရန်ကုန်တက္ကသိုလ် နှစ် ၁၀၀ပြည့် အထိမ်းအမှတ်အဖြစ် အောင်ဆန်းတို့ အမေ၊ အောင်ကျော်တို့ အမေ ကဗျာစာအုပ်ကို ရေးသား ထုတ်ဝေခဲ့သည်။

ဆရာဦးအံ့မောင်သည် ၁၉၄၈ ခုနှစ်မှ ၁၉ ၅၃ ခုနှစ်အထိ ဗမာနိုင်ငံလုံး ဆိုင်ရာ ကျောင်းသား သမဂ္ဂ အမှုဆောင်အဖြစ် ဆောင်ရွက်ခဲ့ပြီး ဝိဇ္ဇာဘွဲ့၊ ဥပဒေဘွဲ၊ သတင်းစာဒီပလိုမာ၊ ယဉ်ကျေးမှု ဝန်ကြီးဌာန စာကြည့်တိုက်ပညာ ပထမဆင့် ရရှိသူဖြစ်သည်။

ရန်ကုန်တက္ကသိုလ် မြန်မာစာဌာနနှင့် အင်္ဂလိပ်စာဌာနတို့တွင် နည်းပြ၊ မော်ကွန်းသတင်းမဂ္ဂဇင်း အယ်ဒီတာချုပ်၊ ဆင်ဟွာသတင်းဌာနတွင် ဘာသာပြန်အဖြစ် လုပ်ကိုင်ခဲ့သည်။

၁၉၇၃ ခုနှစ်တွင် ဒိန်းမတ်စာရေးဆရာ ကဗျာဆရာ ဟန် ခရစ်ရှန် အန်ဒါဆင်၏ ရေသူမလေး ပုံပြင် ဘာသာပြန်စာအုပ်ဖြင့် အမျိုးသားစာပေဆုရ ခဲ့သည်။

ထို့နောက် သဲကုန်းမို့မို လွမ်းမို့မို့၊ မိုးမခပင်ကြီးအောက်မှာ၊ အင်းတော်ရှင်သမီး၊ ရေခဲနတ်ဒေဝီ၊ ခင်စိတ္တ၊ တံခါးမှူးသား စသည့် အန်ဒါဆင်၏ ပုံပြင်များ ဆက်လက်ဘာသာပြန်ခဲ့သည်။

ပြည်တွင်းငြိမ်းချမ်းရေးနှင့် တိုင်းပြည်ဖွံ့ဖြိုးရေး ကိုလိုလားသူဖြစ်ပြီး ဆရာကြီး သခင်ကိုယ်တော်မှိုင်းနှင့် လက်တွဲကာ ပြည်တွင်းငြိမ်းချမ်းရေး လှုပ်ရှားမှုများကို လုပ်ဆောင်ခဲ့သလို လက်ပံတောင်းတောင် ကယ်ဆယ်ရေး ကော်မတီတွင် နာယက အဖြစ် ဆောင်ရွက်ခဲ့သည်။

ထို့အပြင် ဆရာကြီး သခင်ကိုယ်တော်မှိုင်း ဂူဗိမာန်ထိန်းသိမ်းရေး နှင့် ငြိမ်းချမ်းရေး ကွန်ရက် နာယက၊ ဒဂုန်တာရာ ဂူဗိမာန်ကော်မတီ ဥက္ကဋ္ဌ၊ မြန်မာနိုင်ငံ စာရေးဆရာများ သမဂ္ဂ ၏ နာယက တာဝန်ယူခဲ့သည်။

ဆရာကြီး ဦးအံ့မောင်သည် ကဗျာဆောင်းပါး၊ ဘာသာပြန် စာအုပ်များ စုစုပေါင်း ၄၆အုပ် ရေးသားခဲ့ပြီး ၂၀၂၀ ခုနှစ်က လူတိုင်းအတွက် ပရိတ်ကြီး၊ လောကနီတိ၊ မင်္ဂလာသုတ်၊ သြဝါဒါ ပါတိမောက်တို့ကို မြန်မာဘာသာဖြင့် သေချာရေးသားထားသည့် စာအုပ်ကို ထုတ်ဝေခဲ့သည်။