COVID ကာကွယ်ဆေး လူထုယုံကြည်အောင် ကန်သမ္မတဟောင်း ၃ ဦး လက်တွေ့ သရုပ်ပြမည်
COVID 19 ကာကွယ်ဆေးအပေါ် လူတွေ ယုံကြည်မှု ရှိစေဖို့ သူတို့ကိုယ်တိုင် ကာကွယ်ဆေး အထိုးခံဖို့ အဆင့်သင့် ဖြစ်နေပြီလို့ အမေရိကန် သမ္မတဟောင်းတွေက ပြောပါတယ်။
သမ္မတဟောင်း Barack Obama ၊ George W. Bush နဲ့ Bill Clinton တို့က သူတို့ ကာကွယ်ဆေး ထိုးနေတဲ့ ပုံတွေကို အများပြည်သူ တွေ့မြင် ကြည့်ရှုနိုင်ဖို့ ဗွီဒီယို အရိုက်ခံမယ်လို့လည်း ပြောပါတယ်။
ကူးစက်ရောဂါ ကျွမ်းကျင်ပညာရှင် ဒေါက်တာ Anthony Fauci က COVID-19 ကာကွယ်ဆေးကို အတည်ပြုပေးပြီဆိုရင် သူကိုယ်တိုင် ဆေးထိုးခံမှာဖြစ်ကြောင်း သမ္မတ ဟောင်း Barack Obama က Sirius XM ရေဒီယိုနဲ့ အင်တာဗျူးမှာ ပြောပါတယ်။
ဒီကာကွယ်ဆေးတွေက ဘေးအန္တရာယ်ကင်းတယ်။ COVID ရောဂါကို ခုခံနိုင်တယ်လို့ ဒေါက်တာ Fauci က ပြောတာနဲ့ ကျွန်တော်က ဆေးထိုးခံမှာပါလို့ သမ္မတဟောင်း Obama ကပြောပါတယ်။
သူဆေးထိုးခံနေတဲ့ ပုံတွေကို TV ရုပ်သံကနေ ထုတ်လွှင့်တာဖြစ်ဖြစ်၊ ရုပ်ရှင်ရိုက်ယူတာပဲဖြစ်ဖြစ် ခွင့်ပြုမှာဖြစ်ပြီး ဒါမှ သူကိုယ်တိုင် သိပ္ပံ ပညာရပ်ကို ယုံကြည်တယ်ဆိုတာကို လူတွေ မြင်ကြမှာလို့လည်း Obama ကပြောပါတယ်။
သမ္မတဟောင်း George W. Bush ကလည်း ကာကွယ်ဆေးအပေါ် လူတွေ ယုံကြည်လာအောင် အကူအညီ ပေးချင်နေတယ်လို့ သူ့ရဲ့ ဝန်ထမ်းတဦးဖြစ်တဲ့ Freddy Ford က CNN သတင်းကို ပြောပါတယ်၊
ပထမဦးဆုံးအနေနဲ့ ကာကွယ်ဆေးက အန္တရာယ်ကင်း တယ်ဆိုရင် ဦးစားပေး ထိုးနှံပေးထိုးနှံရမယ့် လူတွေထိုးပေးရမှာ ဖြစ်ပြီး အဲဒီ နောက်မှာ သမ္မတ Bush ကိုယ်တိုင် ဆေးအထိုးခံမှာ ဖြစ်သလို ဆေးထိုးနေတာကိုလည်း ကြည်ကြည်နူးနူး ဗွီဒီယိုရိုက်ခံမှာလို့ Ford က ပြောပါတယ်။
သမ္မတဟောင်း Bill Clinton ကလည်းရုပ်သံကနေတဆင့် အများပြည်သူရှေ့မှာ ကာကွယ်ဆေးအထိုးခံဖို့ ဆန္ဒရှိတယ်လို့သူ့ရဲ့ပြန်ကြားရေး အရာရှိ Angel Urena က ပြောပါတယ်။
Pfizer-BioNTech ဆေးကုမ္ပဏီအပြင် Moderna ဆေးကုမ္ပဏီနဲ့ အမျိုးသား ကျန်းမာရေးသိပ္ပံတို့ ပူးတွဲစမ်းသပ်ထားတဲ့ ကာကွယ်ဆေး တွေ ကို သက်ဆိုင်ရာအာဏာပိုင်တွေက မကြာခင်မှာ အတည်ပြုပေးလိမ့်မယ်လို့ မျှော်မှန်းထားကြပါတယ်။ အမေရိကန်ပြည်ထောင်စု မှာ နောက်နှစ် ဖေဖော် ဝါရီ လကုန်ပိုင်းလောက်မှာ လူသန်း ၁၀၀ ကို ကာကွယ်ဆေးထိုးပေးပြီးဖြစ်ဖို့ ခန့်မှန်းထားတယ် လို့ သိပ္ပံ နယ်ပယ်က ထိပ်တန်း အရာရှိတဦးက ဗုဒ္ဓဟူးနေ့ကပြောပါတယ်။
VOA News