ဗစ်တိုးရီးယားအမှု လွဲမှားသံသယရှိခံရသူ ကိုအောင်ကြီးနဲ့ ရဲတပ်ဖွဲ့တို့ အမှုဆိုင်ကြတော့မယ်
ဗစ်တိုးရီးယားအမှုအဖြစ် လူသိများခဲ့တဲ့ အရွယ်မရောက်သေးသူ မိန်းကလေးငယ်တဦး အဓမ္မပြုကျင့်ခံရမှုမှာ သံသယရှိသူအဖြစ် မှားယွင်းဖမ်းဆီးခံခဲ့ရတဲ့ ကိုအောင်ကြီးဟာ ရဲတပ်ဖွဲ့ထံက နစ်နာကြေးရဖို့ တရားရုံးမှာ ရင်ဆိုင်မယ့်အကြောင်း ပြောပြပါမယ်။
နေပြည်တော်က ပုဂ္ဂလိက စာသင်ကျောင်းမှာ အဓမ္မပြုကျင့်မှုအတွက် သံသယရှိသူအဖြစ် ရဲတပ်ဖွဲ့က ၆ လလောက် ဖမ်းဆီးချုပ်နှောင်တာ ခံခဲ့ရတဲ့ ကိုအောင်ကြီးဟာ နစ်နာကြေး သိန်း ၅,၀၀၀ ရယူလိုမှုနဲ့ မြန်မာနိုင်ငံရဲတပ်ဖွဲ့ အကြီးအကဲကို ဒက္ခိဏ ခရိုင်တရားရုံးမှာ တရားစွဲဆိုထားတာ ဖြစ်ပါတယ်။ ဒီကနေ့ ဒုတိယ ရုံးချိန်းရက်မှာတော့ ရဲချုပ်ကိုယ်စား ရဲတပ်ဖွဲ့ ဥပဒေဌာနက ဒုတိယရဲမှူးကြီး ဝင်းမြင့် လာရောက်ခဲ့ပြီး တရားရုံး ဖျန်ဖြေရေးအရာရှိ ရှေ့မှောက်မှာ ညှိနှိုင်းဖို့ မေးမြန်းခဲ့ပေမဲ့ နှစ် ဘက်စလုံးက အမှုကို ရင်ဆိုင်ဖို့ ဆုံးဖြတ်ခဲ့ကြတာလို့လည်း တရားလိုဖြစ်သူ ကိုအောင်ကြီးရဲ့ အကျိုးဆောင်ရှေ့နေ ဦးခင်မောင်ကြီးက ပြောပါတယ်။
“ဖျန်ဖြေရေး အရာရှိဆိုတာ ရှိပါတယ်။ တရားမ မှုတွေမှာ ဖျန်ဖြေရေး အရာရှိဆီကို သွားပြီးတော့ ၂ ဘက် တရားလိုနဲ့ တရားပြိုင် ညှိနှိုင်းဖို့အတွက် ဖျန်ဖြေခံ မခံမေးတဲ့အခါကျတော့ ၂ ဘက်စလုံးက စေ့စပ်ဖို့ သဘောထား မရှိဘူး သဘောထားပေးတဲ့အတွက်ကြောင့် ပြန်ခေါ်ပြီးတော့ ရုံးကပဲ ရုံးချိန်းထပ်ပေးလိုက်ပါတယ်။”
တရားလိုဖြစ်တဲ့ ကိုအောင်ကြီးကတော့ အမှုကို အဆုံးထိသွားမှာဖြစ်ပြီးတော့ အခုလိုတရားစွဲတာဟာ ငွေကြေးကြောင့် မဟုတ်ဘဲ ဂုဏ်သိက္ခာအတွက် တရားစွဲတာလို့လည်း ဒီကနေ့ တရားခွင်ကို လာရောက်ရာမှာ သတင်းမီဒီယာတွေကို ပြောပါတယ်။
“ကျနော့်ဘက်က မညှိနှိုင်းချင်ဘူး။ မညှိနှိုင်းချင်ဘူးဆိုတာ အဆုံးထိပဲ သွားချင်တယ်ပေါ့နော်။ အဓိကက ငွေကြေးကြောင့် မဟုတ်ဘူးပေါ့။ ကျနော့် ကိုယ့်ကျင့်တရား ကျနော့် ဂုဏ်သိက္ခာ ကျနော့် မိသားစု အသိုင်းအဝိုင်း အရာအားလုံးပေါ့။ အရာအားလုံးကို ခြုံပြီး တရားစွဲတာပေါ့။ ငွေရေး၊ ကြေးရေးကြောင့် အဓိက မဟုတ်ပါဘူး။”
ကိုအောင်ကြီးဟာ နေပြည်တော် သပြေကုန်းရပ်ကွပ်က Wisdom Hill မူကြိုကျောင်းမှာ အသက် ၃ နှစ် အရွယ် ကျောင်းသူလေး အဓမ္မပြုကျင့်ခံရမှုမှာ မသင်္ကာသူအဖြစ် စွပ်စွဲဖမ်းဆီးခံခဲ့ရပြီး အမှုရင်ဆိုင်ခဲ့ရပေမဲ့ တရားရုံးက စစ်ဆေးမေးမြန်းပြီး တရားရှင် ပြန်လွှတ်ပေးခဲ့တာပါ။
မသင်္ကာသူအဖြစ် မှားယွင်း ဖမ်းဆီးခံခဲ့ရတဲ့အတွက် နောက်ပိုင်းမှာ ကိုအောင်ကြီးက နစ်နာကြေး ရယူလိုမှုနဲ့ ရဲတပ်ဖွဲ့အကြီးအကဲကို တရားစွဲခဲ့ရာမှာ ပြီးခဲ့တဲ့နှစ်ကုန်ပိုင်းမှာပဲ တရားရုံးက အမှုကို လက်ခံခဲ့တာဖြစ်ပါတယ်။ အမှုကိုတော့ ရက်ပေါင်း ၅၄၀ အတွင်း အပြီး စစ်ဆေးမယ့်အမှုအဖြစ် တရားရုံးက သတ်မှတ်ထားပြီး နောက်တကြိမ် ရုံးချိန်းရက်ကိုတော့ ရှေ့လ ဖော်ဖော်ဝါရီ ၁၁ ရက်နေ့မှာ ပြန်လည်ချိန်းဆိုထားပါတယ်။
VOA News
တရုတ်ပြည်မှာ ၈လ အတွင်း ကိုဗစ်ကြောင့် သေဆုံးသူတဦးသာရှိ
ကိုရိုနာဗိုင်းရပ်စ် စတင်ကူးစက်ပုံစုံစမ်းဖို့ WHO အဖွဲ့ ဝူးဟန်မြို့ရောက်သွားပြီ
တရုတ်နိုင်ငံထုတ် ကိုဗစ်ကာကွယ်ဆေးဟာ ၅၀.၄ ရာခိုင်နှုန်းသာ ထိရောက်