တရုတ်ပြည်မှာ ၈လ အတွင်း ကိုဗစ်ကြောင့် သေဆုံးသူတဦးသာရှိ
တရုတ်နိုင်ငံ ဝူဟန်မြို့ကို WHO ကမ္ဘာ့ကျန်းမာရေးအဖွဲ့က COVID-19 ဇစ်မြစ်ကို စုံစမ်းစစ်ဆေးဖို့ ရောက်ရှိလာချိန်မှာပဲ တရုတ်နိုင်ငံ အနောက်မြောက်ပိုင်းမှာ ဒီရောဂါဖြစ်ပွါးမှုတိုးလာနေပြီး အခု ၈ လအတွင်း ပထမဆုံးဒီရောဂါနဲ့ သေဆုံးမှုကို ကြာသပတေးနေ့မှာ တွေ့ရကြောင်း တရုတ်အာဏာပိုင်တွေက ပြောပါတယ်။
တရုတ်နိုင်ငံမှာ အခုချိန်ထိ သေဆုံးရသူ ၄၆၀၀ ကျော်ရှိပါတယ်။ နိုင်ငံတွင်း ကိုရိုနာဗိုင်းရပ်စ်အတွက် ကန့်သတ်မှုတွေ တင်းတင်းကြပ်ကြပ်ချထားသလို ရောဂါရှိသူကိုခြေရာခံလိုက် ထိန်းချုပ်မှုတွေ လုပ်တဲ့အတွက် ဒီရောဂါနဲ့ သေဆုံးရသူဟာ တခြားနိုင်ငံတွေနဲ့ ယှဉ်ရင်နည်းပါးတာ ဖြစ်ပါတယ်။
တရုတ်နိုင်ငံမှာ နှစ်သစ်ကူးအားလပ်ရက် ကျင်းပမယ့် ဖေဖေါ်ဝါရီလ မတိုင်ခင် ကိုရိုနာဗိုင်းရပ်စ် ကူးစက်မှု ထိန်းချုပ်နိုင်ရေး အတွက် ဘေဂျင်း၊ ဟာဘေး နဲ့ တခြားဒေသတွေက ဒေသခံ သန်း ၂၀ ကျော်အတွက် ကန့်သတ်ပိတ်ပင်မှု အမျိုးမျိုး ချမှတ်ထားတာပါ။
ဒီရောဂါဆိုင်ရာ သီးခြားလွတ်လပ်တဲ့ စုံစမ်းမှုတွေခွင့်ပြုဖို့ တောင်းဆိုနေတဲ့ နိုင်ငံတွေနဲ့ တရုတ်နိုင်ငံကြား သံတမန်ရေး သဘောတူညီချက်မရနိုင်ပဲ ဖြစ်နေရာကနေ တနှစ်လောက်ဆွေးနွေးပြီးမှ WHO စုံစမ်းရေးမှုးတွေ အခုကြာသပတေးနေ့မှာ ဝူဟန်ကို ရောက်ရှိလာတာ ဖြစ်ပါတယ်။ WHO အဖွဲ့ဝင် ၁၀ ဦး စင်္ကာပူရောက်လာချိန် ဆေးစစ်မှုကနေ ၂ ဦးမှာ ကိုယ်ခံအားရှိနေကြောင်း တွေ့ရှိခဲ့တဲ့ အတွက် ကျန်အဖွဲ့ဝင်အားလုံးပါ ၁၄ ရက် quarantine ဝင်ပြီးမှ ဝူဟန်ကို သွားရောက်နိုင်တာပါ။
၂၀၁၉ နှစ်ကုန်မှာ ဝူူဟန်မှာ စတင်ခဲ့တဲ့ ဒီကပ်ရောဂါဟာ ကမ္ဘာတလွှားကိုပြန့်သွားခဲ့ပြီး အခုဆို အကူးစက်ခံရသူ ၉ ၂ သန်းကျော်နေနဲ့ သေဆုံးရသူက ၂ သန်းနီးပါး ရှိနေပြီလို့ Johns Hopkins တက္ကသိုလ် စစ်တမ်းမှာ ဖေါ်ပြပါတယ်။ အာရှတလွှားနေရာအတော်များများမှာ ဒီရောဂါကူးစက်မှုတွေ တိုးလာနေပြီး ဂျပန်နိုင်ငံမှာတော့ ပြီးခဲ့တဲ့ သီတင်းပတ်တုန်းက အရေးပေါ်အခြေနေ ကနဦးကြေညာခဲ့သလို ခရိုင် ၇ ခုအတွက်ပါထပ်တိုး ထားပါတယ်။
VOA News