ဝါရှင်တန် နိုဝင်ဘာ ၁၄
အမေရိကန်ပြည်ထောင်စုရှိ လျှို့ဝှက်ထောက်လှမ်းရေး အေးဂျင့် ၁၃၀ ကျော်အထိ ကိုဗစ်- ၁၉ ကူးစက်ခံရပြီး တစ်ကိုယ်ရေသီးခြားနေထိုင်ကာ ကန့်သတ်စောင့်ကြည့်မှု ခံယူရလျက်ရှိကြောင်း ဝါရှင်တန်ပို့စ် သတင်းစာက နိုဝင်ဘာ ၁၃ ရက်က ဖော်ပြခဲ့သည်။
ကိုဗစ်- ၁၉ ကူးစက်ခံရသူတစ်ဦးနှင့် အနီးကပ် ထိတွေ့မှုရှိခဲ့ပြီးနောက်တွင် အဆိုပါလျှို့ဝှက်ထောက်လှမ်း ရေးအေးဂျင့်များအားလုံး ရောဂါကူးစက်ခံခဲ့ရခြင်း ဖြစ်ကြောင်း အဆိုပါအဖွဲ့အစည်းနှင့် ဆက်နွှယ်သည့် သတင်းရင်းမြစ်များ၏ ပြောပြချက်ကို ကိုးကားလျက် ဝါရှင်တန်ပို့စ် သတင်းစာတွင် ဖော်ပြထားသည်။
လျှို့ဝှက်ထောက်လှမ်းရေး အဖွဲ့အတွင်း ရောဂါ ကူးစက်ဖြစ်ပွားမှုသည် နိုဝင်ဘာ ၃ ရက် အမေရိကန် ရွေးကောက်ပွဲနေ့မတိုင်မီ သုံးရက်အလိုက သမ္မတထရမ့် မဲဆွယ်စည်းရုံးရေး နောက်ဆုံးပြုလုပ်ခဲ့သည့် လူထုစုဝေး ပွဲများနှင့် ဆက်နွှယ်နေဖွယ်ရှိကြောင်း အဆိုပါသတင်းစာက ဖော်ပြသည်။
အိမ်ဖြူတော်၌ ရွေးကောက်ပွဲည စုဝေးမှုအပြီး ကိုဗစ်-၁၉ ကူးစက်ခံခဲ့ရသူများတွင် အိမ်ဖြူတော်အရာရှိချုပ် မာ့မီယာဒိုစ်၊ အိုးအိမ်နေရာချထားရေးနှင့်မြို့ပြဖွံ့ဖြိုးရေး ဝန်ကြီး ဘင်ကာဆန်၊ အိမ်ဖြူတော် နိုင်ငံရေးဆိုင်ရာ ဒါရိုက်တာ ဘရိုင်ယန်ဂျက်နှင့် သမ္မတထရမ့်၏ မဲဆွယ် စည်းရုံးရေး အကြံပေး ကိုရေးလီဝန်ဒေါစကီးတို့ ပါဝင် ကြောင်း သိရသည်။
သမ္မတ ဒေါ်နယ်ထရမ့်နှင့် ၎င်း၏ဇနီး မီလာနီယာ ထရမ့်တို့မှာလည်း ပြီးခဲ့သည့် အောက်တိုဘာလအစောပိုင်းက ကိုဗစ်- ၁၉ ကူးစက်ခံရကြောင်း စစ်ဆေးတွေ့ရှိခဲ့ပြီး နောက် ကန့်သတ်စောင့်ကြည့်မှုဖြင့် နေထိုင်ခဲ့သည်။
နိုင်ငံအတွင်း ရောဂါကူးစက်ဖြစ်ပွားမှု တိုးနေသော် လည်း တစ်နိုင်ငံလုံး ကန့်သတ်ပိတ်ဆို့မှုပြုလုပ်ရန် မရှိကြောင်း ထရမ့်က ပြောကြားခဲ့သည်။
ဆင်ဟွာ