အိန္ဒိယ ဒီပါဝလီပွဲတော်ကာလ ကိုဗစ်ကူးစက်မှု တိုးလာဖွယ် စိုးရိမ်

အိန္ဒိယနိုင်ငံမှာ နေ့စဉ် ဗိုင်းရပ်စ်ကူးစက်မှုနှုန်းက ဒီနေ့မှာ ပုံမှန်အတိုင်း ရှိနေပေမယ့် ဟိန္ဒဘာသာဝင်တွေရဲ့ ဒီပါဝလီ မီးထွန်းပွဲတော်ကာလ ဖြစ်နေတာကြောင့် မြို့တော် နယူးဒေလီမှာ ဗိုင်းရပ်စ်ကူးစက်မှုတွေ မြင့်တက်လာနေတာ အိန္ဒိယအာဏာပိုင်တွေ စောင့်ကြည့်နေကြပါတယ်။

အိန္ဒိယမှာ လွန်ခဲ့တဲ့ ၂၄ နာရီအတွင်း ကိုရိုနာဗိုင်းရပ်စ် ကူးစက်သူ ၄၄,၆၈၄ ယောက်ရှိပြီး သေဆုံးသူ ၅၂၀ ရှိတယ်လို့ အိန္ဒိယ ကျန်းမာရေးဝန်ကြီးဌာနက ပြောပါတယ်။ အဲဒီထဲက နယူးဒေလီမြို့မှာ ကူးစက်သူ ၇,၈၀၂ ယောက်နဲ့ သေဆုံးသူ ၉၁ ယောက် ပါဝင်တယ်လို့ ပြောပါတယ်။ အိန္ဒိယနိုင်ငံမှာ ဗိုင်းရပ်စ်ကူးစက်ခံရသူ စုစုပေါင်း ၈.၇ သန်းနဲ့ ကမ္ဘာပေါ်မှာ ဗိုင်းရပ်စ်ကူးစက်မှု ဒုတိယအများဆုံးနိုင်ငံ ဖြစ်ပါတယ်။

သီရိလင်္ကာနိုင်ငံမှာတော့ မြို့တော်ကိုလံဘိုမြို့ရဲ့ ဆိပ်ကမ်းက ဝန်ထမ်း ၆၀ ဗိုင်းရပ်စ်ကူးစက်ခံထားရပြီး နောက်ထပ် ဝန်ထမ်း ၂၀၀ သီးသန့်ခွဲပြီး အသွားအလာ ကန့်သတ်ခံနေရတဲ့အတွက် ဆိပ်ကမ်းလုပ်ငန်းစဉ်တွေမှာ နှောင်းနှေးကြန့်ကြာမှုတွေ ဖြစ်ပွားခဲ့ပါတယ်။

ဆိပ်ကမ်းလုပ်ငန်းစဉ်တွေ နှောင့်နှေးကုန်ပြီး သင်္ဘော တဒါဇင်နီးပါးလောက် ဆိပ်ကမ်းကို ဝင်ခွင့်ရဖို့အတွက် စောင့်ဆိုင်းနေတယ်လို့ သီရိလင်္ကာ ဆိပ်ကမ်းအာဏာပိုင်တွေက ပြောပါတယ်။ သီရိလင်္ကာနိုင်ငံမှာ လွန်ခဲ့တဲ့ ၂၄ နာရီအတွင်း ဗိုင်းရပ်စ်ကူးစက်သူ ၄၆၈ ယောက်ရှိတယ်လို့ ပြောပါတယ်။

တောင်ကိုရီးယားနိုင်ငံဘက်မှာတော့ တောင်ကိုရီးယား လက်ရွေးစင် ဘောလုံးသမား ၄ ယောက်နဲ့ အသင်းတာဝန်ရှိသူ တယောက်ဟာ မက္ကဆီကိုအသင်းနဲ့ ချစ်ကြည်ရေးပွဲ ကစားဖို့အတွက် သြစတြီးယားနိုင်ငံကို ရောက်ရှိပြီးတဲ့နောက် ဗိုင်းရပ်စ်ကူးစက်ခံထားရတယ်လို့ တောင်ကိုရီးယား ဘောလုံးအဖွဲ့ချုပ်က ပြောပါတယ်။ ကျန်တဲ့ကစားသမားတွေ ဗိုင်းရပ်စ်ရှိမရှိ ထပ်စစ်သွားမှာဖြစ်ပြီး အဲဒီနောက်မှ ပွဲကို ကစားမယ် မကစားဘူး ဆိုတာကို ဆုံးဖြတ်မယ်လို့ တောင်ကိုရီးယား ဘောလုံးအဖွဲ့ချုပ် ပြောခွင့်ရက ပြောပါတယ်။

တောင်ကိုရီးယားနိုင်ငံ တဝန်းမှာတော့ ဒီနေ့ ဗိုင်းရပ်စ်ကူးစက်သူ ၂၀၃ ယောက်ရှိပြီး ဒါဟာ ၇၃ ရက်အတွင်း အများဆုံးကူးစက်တာ ဖြစ်ပါတယ်။

Crd VOA News