သိမ္မစည်းဘုရားသည် မန္တလေးတိုင်းဒေသကြီး၊ ညောင်ဦးမြို့နယ်၊ ပုဂံ၊ အနော်ရထာလမ်းမအနီး၊ လောကဥသျှောင်ဘုရား၏ မြောက်ဘက်အနီး၌ တည်ရှိပါသည်။ သိမ္မစည်းဘုရားသည် ကွမ်းတောင်ပေါက်တစ်ထပ်ဂူဘုရားလတ်ဖြစ်ပြီး အရှေ့ဘက်မျက်နှာမူ တည်ထားသည်။ ဂူဘုရားလတ်တစ်ဆူဖြစ်သောကြောင့် သိမ္မစည်းဘုရားမှာ အတန်ငယ်ကျယ်ပြန့်၍ ပန်းချီအတွက် နေရာပေးအချိန်ယူ ရေးဆွဲထားပုံများကို တွေ့ရသည်။ ဗုဒ္ဓဝင်ခန်းများ၊ ငါးရာ့ငါးဆယ်ဇာတ်ကွက်များ၊ အမိုးမျက်နှာကြက်ပန်းဒီဇိုင်းများနှင့် အာရုံခံလေးဘက် အမိုးခြေတော်ရာအစုံနှင့် ပန်းဝိုင်းများ ကနုတ်ကြားညှပ်နတ်သားတို့ ရှိခိုးပူဇော်နေကြပုံများကို အနုစိတ်အသေးစိတ် ရေးခြယ်ထားသည်ကို လေ့လာနိုင်ပါသည်။
