အသက် ၇၆ နှစ်ရှိပြီဖြစ်သော ကာတွန်း(ဦး) မြေဇာသည် ၂၀၂၁ ခုနှစ်၊ ဇူလိုင်လ ၂၇ ရက်ညတွင် ရန်ကုန်မြို့၊ တာမွေမြို့နယ်ရှိ သူ၏နေအိမ်တွင် လူကြီးရောဂါဖြင့် ဆုံးပါးသွားခဲ့ပါသည်။
ကာတွန်းမြေဇာကို ၁၉၄၆ ခုနှစ် မတ်လ ၁၃ ရက်နေ့တွင် မကွေးတိုင်းဒေသကြီး ဆင်ဖြူကျွန်းမြို့တွင် မွေးဖွားခဲ့ပြီး နာမည်ကျော် ကာတွန်း ဇာတ်ကောင်များဖြစ်ကြသည့် “စိန်မျောက်မျောက်၊ စိန်ပေါက်ပေါက်” ၊ “နှင်းနှင်းလေးနဲ့ ရေမြင်းလေး” စသည့် ကာတွန်းဇာတ်ကောင်များကို ဖန်တီးရေးဆွဲခဲ့သူဖြစ်ပါသည်။ ရန်ကုန်ပန်းချီပန်းပု ကျောင်းဆင်းတဦးဖြစ်ပြီး မန္တလေး လူထုတိုက်မှ သတင်းစာပညာနှင့် စာပေပညာရပ်များ သင်ကြားခဲ့ကာ ၁၉၆၈ ခုနှစ်မှာ ကြေးမုံသတင်းစာ၌ ကာတွန်းများ စတင်ရေးဆွဲခဲ့ပြီး နောက်ပိုင်းတွင် ကိုယ်ပိုင်ကာတွန်းရေးဟန်များဖြင့် ကာတွန်းအမြောက်အများ ရေးဆွဲအောင်မြင်ခဲ့သူဖြစ်သည်။
