ရိုဟင်ဂျာတွေနေရပ်ပြန်မယ့်ရက် သတ်မှတ်ပေးဖို့ မြန်မာကို ဘင်္ဂလားဒေ့ရှ်တောင်းဆိုမည်
ရိုဟင်ဂျာတွေ နေရပ်ပြန်နိုင်မယ့်ရက်ကို သတ်မှတ်ပေးရေး မြန်မာအစိုးရကို ဖိအားပေး တောင်းဆိုသွားမယ်လို့ ဘင်္ဂလားဒေ့ရှ် နိုင်ငံခြားရေးဝန်ကြီး ဒေါက်တာ AK Abdul Momen က အင်္ဂါနေ့မှာ ပြောကြားလိုက်ပြီး မြန်မာအစိုးရကို ဖိအားပေးဖို့အတွက် မိတ်ဆွေနိုင်ငံတွေကိုလည်း တောင်းဆိုသွားမယ်လို့ ပြောပါတယ်။
“ရိုဟင်ဂျာတွေ ဘယ်နေ့စပြန်နိုင်မယ်ဆိုတဲ့ရက်ကို မြန်မာအစိုးရ (အသစ်) အနေနဲ့ သတ်မှတ်ပေးဖို့ တောင်းဆိုမှာဖြစ်ပြီး ဘင်္ဂလားဒေ့ရှ်ဘက်က ဒီလူတွေကို ပြန်ပို့ပေးဖို့ အဆင်သင့်ရှိနေတယ်” လို့ ဝန်ကြီး Momen ပြောတာကို ကိုးကားပြီး ဘင်္ဂလားဒေ့ရှ် သတင်းမီဒီယာတွေမှာ ဖော်ပြထားပါတယ်။ မြန်မာနိုင်ငံမှာ ရွေးကောက်ပွဲတွေ ကျင်းပ ပြီးစီးသွားပြီဖြစ်တာမို့ ရိုဟင်ဂျာတွေ ပြန်ပို့ရေး မြန်မာအစိုးရကို ဖိအားပေး လုပ်ဆောင်သွားမယ်လို့ ဘင်္ဂလားဒေ့ရှ်ရဲ့ မိတ်ဆွေနိုင်ငံတွေဖြစ်တဲ့ တရုတ်၊ ဂျပန်၊ အီးယူနဲ့ ယူကေ စတဲ့ နိုင်ငံတွေကပြောကြောင်းလည်း ဝန်ကြီး Momen က ပြောပါတယ်။
ဘင်္ဂလားဒေ့ရှ်နိုင်ငံထဲမှာရောက်နေတဲ့ ရိုဟင်ဂျာတွေ မြန်မာဘက်က ပြန်လက်ခံရေးအတွက် ဘင်္ဂလားဒေ့ရှ်၊ တရုတ်၊ မြန်မာ ၃ ပွင့်ဆိုင် လမ်းစဉ်တခုကိုလည်း ချမှတ် ဆောင်ရွက်နေတယ်လို့ ဝန်ကြီး Momen က ပြောပါတယ်။
ရိုဟင်ဂျာဒုက္ခသည် တသိန်းလောက်ကို Bhasan Char ကျွန်းကို ပို့မယ့်အစီအစဉ်ဟာ ဘင်္ဂလားဒေ့ရှ်အစိုးရရဲ့ ဆုံးဖြတ်ချက်ဖြစ်ကြောင်း၊ ဒါပေမယ့် သူတို့ကို ဘယ်နေ့မှာ အပြီးသတ်ပို့ဖြစ်ဆိုတာကို မဆုံးဖြတ်ရသေးကြောင်းလည်း ဝန်ကြီး Momen ကပြောပါတယ်။
ရိုဟင်ဂျာဆိုတဲ့ အသုံးအနှုန်းကို လက်မခံတဲ့ မြန်မာအစိုးရကတော့ ဒုက္ခသည်တွေ နေရပ်ပြန်နိုင်ရေး ကုလသမဂ္ဂအပါအဝင် နိုင်ငံတကာ အသိုင်းအဝိုင်းနဲ့ ပူးပေါင်းဆောင်ရွက်နေသလို ဘင်္ဂလားဒေ့ရှ်နိုင်ငံနဲ့လည်း နားလည်မှုစာချွန်လွှာ လက်မှတ်ရေးထိုးထားပြီး ဖြစ်ပါတယ်။
Crd VOA News