မကြာခင်ရောက်ရှိလာမယ့် ကိုဗစ်ကာကွယ်ဆေး ဦးစားပေးအဆင့်ကို ထိုးဖို့ မြန်မာစီစဉ်နေပြီ

မြန်မာနိုင်ငံအတွက် ကိုဗစ် ရောဂါ ကာကွယ်ဆေး ပထမဆုံး အသုတ် ဇန်နဝါရီလ ၂၂ ရက်နေ့ သောကြာနေ့မှာ ရောက်ရှိလာတော့ မယ်လို့ နိုင်ငံတော် အတိုင်ပင်ခံ ဒေါ်အောင်ဆန်းစုကြည်က ပြောပါတယ်။

ကျန်းမာရေး ဝန်ထမ်းတွေကို ထိုးနှံပေးပြီးတဲ့အခါ တခြား အုပ်စု အဆင့်ဆင့် ခွဲခြားထိုးနှံပေးဖို့ စီစဉ်နေတယ်လို့လည်းဒေါ်အောင်ဆန်း စုကြည်က ပြောပါတယ်။ အဲဒီ ဦးစားပေး အဆင့်အနေနဲ့ အရေးကြီးတဲ့ အစိုးရ ဝန်ထမ်းတွေနဲ့ လွှတ်တော် ကိုယ်စားလှယ်တွေ ပါဝင် မယ်လို့ ပြောပါတယ်။

နိုင်ငံ့ ယန္တရား လည်ပတ်ရေးအတွက် အရေးကြီးတဲ့ သူတွေ ၊ အရေးကြီးတဲ့လူတွေ ရှိတဲ့နေရာတွေကို ဦးစားပေး စဉ်းစားသွားမယ်လို့ လည်း ပြောပါတယ်။ Stay at home မြို့နယ်နေသူတွေကိုလည်း ထိုးနှံပေးဖို့ ထည့်သွင်း စဉ်းစားနေတယ်လို့လည်း ပြောပါတယ်။ ဒါပေမဲ့၊ အုပ်စု အဆင့်လိုက် ထိုးနှံပေးမယ့်အစီအစဉ်ထဲကျောင်းဆရာ၊ဆရာမတွေကိုထိုးနှံပေးမယ့်အစီအစဉ်ကိုထည့်သွင်းပြောကြား သွားတာတော့ မရှိသေးပါဘူး။

မြန်မာနိုင်ငံကို သောကြာနေ့မှာ ကာကွယ်ဆေးတွေ ရောက်ရှိလိမ့်မယ်လို့ သတင်းရင်းမြစ် တစ်ခုကို ကိုးကားပြီး အိန္ဒိယက The Hindu business line သတင်းဌာနကလည်း ပြောပါတယ်။ ဒီဇင်ဘာလအတွင်းက မြန်မာ အဆင့်မြင့် ကိုယ်စားလှယ်အဖွဲ့ တစ်ဖွဲ့အိန္ဒိယကို သွားရောက်ပြီး ကာကွယ်ဆေးကိစ္စ ဆွေးနွေးခဲ့ကြောင်းနဲ့ အဲဒီ ဆွေးနွေးမှုတွေအထဲ ကာကွယ်ဆေးတွေ ဖြန့်ဖြူးပေးပို့ရေး နဲ့ ထိုးနှံရေးမှာ လေ့ကျင့်သင်ကြားပေးရေး နှစ်နိုင်ငံ ပူးပေါင်းဆောင်ရွက်ရေး ကိစ္စတွေပါဝင်တယ်လို့ လည်း ဆိုပါတယ်။ ဒါ့အပြင်၊ အိန္ဒိယထုတ် ကာကွယ်ဆေးကို မြန်မာနိုင်ငံမှာ စမ်းသပ်စစ်ဆေးဖို့ ကိစ္စလည်း ပါဝင်ပါတယ်။

VOA News