ကလေးစစ်သား စုဆောင်းအသုံးပြုမှုရပ်ဖို့ DKBAနဲ့ ကုလသမဂ္ဂ လက်မှတ်ရေးထိုး
ဒီမိုကရေစီအကျိုးပြုကရင်တပ်မတော် (DKBA) က ကလေးသူငယ်တွေကို တပ်သားအဖြစ် စုဆောင်းအသုံးပြုနေတာတွေကို အဆုံးသတ်ဖို့ ကုလသမဂ္ဂနဲ့ ပူးတွဲလုပ်ငန်းအစီအစဉ်တရပ်ကို ဒီကနေ့မှာ လက်မှတ်ရေးထိုးလိုက်ပါတယ်။ ကလေးသူငယ်တွေအပေါ်မှာ ကြီးမားတဲ့ ချိုးဖောက်မှုတွေကို စောင့်ကြည့် အစီရင်ခံတင်ပြတဲ့နိုင်ငံအဆင့် အထူးတာဝန်အဖွဲ့ (CTFMR) နဲ့ DKBA တို့ အင်တာနက်အွန်လိုင်းကနေ တဆင့် လက်မှတ်ရေးထိုးခဲ့ကြတာဖြစ်ပါတယ်။ ဒါဟာ ကုလသမဂ္ဂအဖွဲ့နဲ့ မြန်မာနိုင်ငံမှာရှိတဲ့ တိုင်းရင်းသားလက်နက်ကိုင်အဖွဲ့ကြား ရေးထိုးတဲ့ ပထမဆုံး ၂ ဘက်ပူးတွဲလုပ်ငန်းစဉ်တရပ်ဖြစ်ပါတယ်။
DKBA ဘက်က အခုလို ကတိပြုလက်မှတ်ရေးထိုးခဲ့တဲ့အတွက် ချီးကျူးကြောင်း၊ လက်နက်ကိုင် ပဋိပက္ခဒဏ်ခံနေရတဲ့ ကလေးသူငယ်တွေနဲ့ လူမှုအသိုင်းအဝိုင်းတွေကို ကာကွယ်စောင့်ရှောက်ဖို့က အရေးကြီးတယ်လို့ CTFMR အဖွဲ့က ပြောပါတယ်။
အခုလို လက်မှတ်ရေးထိုးလိုက်ခြင်းအားဖြင့် ကလေးစစ်သားအဖြစ် အသုံးပြုနေတဲ့ လက်နက်ကိုင်အဖွဲ့စာရင်းထဲကနေ DKBA တပ်ဖွဲ့ကို ပယ်ဖျက်ဖို့အတွက် အရေးကြီးတဲ့ခြေလှမ်းဖြစ်တယ်လို့လည်း ပြောပါတယ်။ DKBA တပ်ထဲမှာ ကလေးစစ်သားအသုံးပြုတာတွေရှိခဲ့တယ်လို့ ၂၀၁၃ ကစပြီးဖော်ပြခဲ့ပေမယ့်လည်း နောက်ပိုင်းအစီရင်ခံစာတွေမှာတော့ မတွေ့ရှိရတော့ဘူးလို့လည်း ပြောပါတယ်။ DKBA အနေနဲ့ ၂၀၁၇ ကစပြီး CTFMR အဖွဲ့နဲ့ ပူးပေါင်းဆောင်ရွက်ခဲ့ပြီး သူတို့အဖွဲ့အတွင်းမှာ ကလေးစစ်သားအသုံးပြုတာတွေနဲ့ ကြီးမားတဲ့ ချိုးဖောက်မှုတွေမရှိတော့ကြောင်း ပြသဖို့ စိတ်အားထက်သန်နေပြီးတော့ ကုလသမဂ္ဂရဲ့ ကလေးစစ်သားအသုံးပြုမှု အစီရင်ခံစာထဲကနေ ပယ်ဖျက်ခံရဖို့အတွက် ကြိုးပမ်းနေတယ်လို့ DKBA စစ်ဦးစီးချုပ် ဗိုလ်ချုပ်ကြီး စောမိုးရှေးကလည်း ပြောပါတယ်။
ဒီအခမ်းအနားကို ကုလသမဂ္ဂအတွင်းရေးမှူးချုပ်ရဲ့ အထူးကိုယ်စားလှယ် Virginia Gamba လည်းတက်ရောက်ပြီး မျက်မြင်သက်သေအဖြစ် လက်မှတ်ရေးထိုးခဲ့ပါတယ်။ ဒါ့အပြင် အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာန၊ ငြိမ်းချမ်းရေးကော်မရှင်ဥက္ကဋ္ဌ ဒေါက်တာတင်မျိုးဝင်းနဲ့ မြန်မာနိုင်ငံမှာရှိတဲ့ သံတမန်တွေ၊ ကုလသမဂ္ဂအေဂျင်စီတွေလည်း တက်ရောက်ခဲ့ကြပါတယ်။
Crd VOA News