အိမ်ဖြူတော်အရာရှိချုပ်အဖြစ် ဝါရင့်အကြံပေး Ron Klain ကို ခန့်ဖို့ Joe Biden လျာထား
အမေရိကန်သမ္မတရွေးကောက်ပွဲမှာ အနိုင်ရသူအဖြစ်နဲ့ ကြေငြာထားတဲ့ ဂျိုး ဘိုင်ဒန်က သူ့ရဲ့အကြံပေးအဖြစ် အချိန်အတော်ကြာ လက်တွဲလုပ်ကိုင်လာခဲ့တဲ့ Ron Klain ကို သမ္မတအိမ်ဖြူတော်အရာရှိချုပ်အဖြစ်နဲ့ ခန့်ထားဖို့ လျာထားတဲ့အကြောင်း ကြေငြာလိုက်ပါတယ်။ Klain ဟာ ပြီးခဲ့တဲ့ သမ္မတအိုဘားမားအစိုးရ လက်ထက်တုန်းက ဂျိုး ဘိုင်ဒန်ရဲ့ ဒု-သမ္မတရုံးအရာရှိချုပ်အဖြစ်နဲ့ တာဝန်ထမ်းဆောင်ခဲ့သူဖြစ်ပြီး ၂၀၁၄ ခုနှစ်က အီဘိုလာရောဂါတိုက်ဖျက်ရေးကို ဦးဆောင်လုပ်ကိုင်ဖို့ အဲဒီတုန်းက သမ္မတအိုဘားမားက တရားဝင်ခန့်အပ်ခဲ့သူဖြစ်ပါတယ်။
"ကျနော်တို့ အခုလို ပြဿနာတွေနဲ့ ရင်ဆိုင်နေကြတဲ့အချိန် ကျနော်တို့ တိုင်းပြည်ကို ပြန်စုစည်းရမယ့် အချိန်မျိုးမှာ သူ့ရဲ့ ကျယ်ပြန့်နက်ရှိုင်းတဲ့ အတွေ့အကြုံတွေနဲ့ နိုင်ငံနယ်ပယ်အသီးသီးကလူတွေနဲ့ အတူ အလုပ်လုပ်နိုင်တဲ့စွမ်းရည်က အိမ်ဖြူတော်အရာရှိချုပ်နေရာအတွက် သူလိုချင်တဲ့ အရည်အချင်းအတိအကျဖြစ်တယ်။" လို့ ဂျိုးဘိုင်ဒန်က ဗုဒ္ဓဟူးနေ့က သူ့ရဲ့ ကြေငြာချက်မှာ ပြောပါတယ်။ Ron Klain ကတော့ သူ့ကိုအခုလို အိမ်ဖြူတော်အရာရှိချုပ်အဖြစ်ခန့်အပ်တာဟာ သူ့ဘဝမှာ အကြီးမားဆုံး ဂုဏ်ပြုခံရမှှုဖြစ်တယ်ဆိုပြီး ပြောလိုက်ပါတယ်။
အမေရိကန် သမ္မတ ရွေးကောက်ပွဲမှာ အနိုင်ရသူအဖြစ်ကြေညာထားတဲ့ Joe Biden ဟာ မနေ့ ဗုဒ္ဓဟူးနေ့ကတော့ အစိုးရတာဝန် လွှဲပြောင်းရယူရေးဆိုင်ရာ အကြံပေးအဖွဲ့ဝင်တွေနဲ့ တွေ့ဆုံပါတယ်။ သူ့အနေနဲ့ ရှေ့နှစ် ဇန်နဝါရီလ ၂၀ ရက်နေ့မှာ သမ္မတအဖြစ် ကျမ်းသစ္စာ ကျိန်ဆိုပြီးတဲ့နောက် တာဝန်လွှဲပြောင်းယူပြီး အစိုးရဖွဲ့နိုင်ဖို့အတွက် စီစဉ် ဆောင်ရွက်နေတာလည်း ဖြစ်ပါတယ်။ အမေရိကန်အစိုးရဌာနနဲ့ အေဂျင်စီတွေရဲ့ လတ်တလော လုပ်ငန်းဆောင်တာတွေနဲ့ ပတ်သက်ပြီး လေ့လာကြည့်ရှုဖို့ အကြံပေးပုဂ္ဂိုလ် တော်တော်များများကို Joe Biden က ခန့်အပ်ထားပြီး ဖြစ်ပါတယ်။ သူ့အနေနဲ့ အရေးပါတဲ့ ရာထူးခန့်အပ်မှုတချို့ကို နိုဝင်ဘာလ ၂၆ ရက်နေ့ ကျေးဇူးတော်နေ့မတိုင်ခင် ကြေညာနိုင်လိမ့်မယ်လို့လည်း Joe Biden က အင်္ဂါနေ့က ပြောပါတယ်။
Crd VOA News