ကန်ကာကွယ်ရေးဝန်ကြီးသစ်ရဲ့ မူဝါဒ နားလည်ရခက်

သမ္မတ Donald Trump ရဲ့ သက်တမ်းကာလ နောက်ဆုံးသီတင်းပတ်တွေ အတွင်း ကာကွယ်ရေးဆိုင်ရာမူဝါဒ အကြီးအကျယ် အပြောင်းအလဲလုပ်မှာကို စိုးရိမ်နေကြချိန်မှာပဲ အမေရိကန်ဦးဆောင်တဲ့ စစ်ပွဲနဲ့ ပတ်သက်ပြီး ကာကွယ်ရေးဌာန ယာယီဝန်ကြီး Christopher Miller ရဲ့ ဌာနဆိုင်ရာ ပထမဆုံး ထုတ်ပြန်တဲ့ စာထဲမှာ ရှေ့နောက်မညီတဲ့ သဘောတွေ တွေ့နေရပါတယ်။

သောကြာနေ့က ထုတ်ပြန်တဲ့ စာထဲမှာ ဒီစစ်ပွဲဟာ မပြီးဆုံးသေးကြောင်း ဖော်ပြထားသလို အယ်လ်ကိုင်းဒါးနဲ့ အပေါင်းအပါတွေကို ချေမှုန်းမှုဟာ ပြီးဆုံးလုနီး ဖြစ်နေပေမယ့် အရင်မဟာဗျူဟာထဲက မှားယွင်းမှုမျိုးကို ရှောင်ပြီး ပြီးဆုံးတဲ့အထိ တိုက်ရမှာဖြစ်ကြောင်း ပြောပါတယ်။

ဒါပေမယ့်လည်း နောက်တပိုဒ်မှာတော့ Mr. Miller က ဒီတိုက်ပွဲတွေနဲ့ ပတ်သက်ပြီး ကိုယ်စွမ်းရှိသလောက် လုပ်ဆောင်ခဲ့ပြီး စိန်ခေါ်မှုတွေကို ချေမှုန်းနိုင်ပြီဖြစ်ကြောင်း၊ အခုအချိန်ဟာ တပ်သားတွေ အိမ်ပြန်လာရတော့မယ့် အချိန်ဖြစ်ကြောင်း ရေးသားထားတာပါ။

ကာကွယ်ရေးဌာနမှာ Mark Esper နေရာအတွက် Miller ကို အခုလိုအချိန်မျိုးမှာ အစားထိုး ခန့်အပ်ခဲ့တာနဲ့ ပတ်သက်ပြီး လက်ရှိနဲ့ လက်ဟောင်း စစ်ဘက်ဆိုင်ရာ အကြီးတန်းအရာရှိတွေနဲ့ ကျွမ်းကျင်သူတွေက စိုးရိမ်ကြောင်း ပြောကြားခဲ့ကြပြီး ဒါဟာ အမေရိကန်ရဲ့ စစ်ရေးမူဝါဒ ပြောင်းလဲမှုတွေ အမြန်လုပ်လာနိုင်သလို မတည်ငြိမ်တဲ့ အနေထားမျိုးတွေ ပေါ်လာနိုင်တယ်လို့ သတိပေးကြပါတယ်။

အယ်လ်ကိုင်းဒါးနဲ့ တခြားအကြမ်းဖက်အဖွဲ့တွေ ခြေကုပ်ယူလို့မရအောင် မဟာမိတ်တွေနဲ့ လက်တွဲပြီး အနှစ် ၂၀ နီးပါး တိုက်နေတဲ့ အာဖဂန်စစ်ပွဲအတွက် တာဝန်ချထားတဲ့ အမေရိကန်တပ်သား ၄,၅၀၀ လောက်ကို သမ္မတ Trump က ပြန်ခေါ်ယူချင်နေတာအတွက်လည်း စိုးရိမ်နေကြတာ ဖြစ်ပါတယ်။

အခုလို အမေရိကန်တပ်တွေ အာဖဂန်ကနေ အမြန်ဖယ်ရှားပေးတာဟာ အန္တရာယ်ကြီးကြောင်းနဲ့ မြေပြင်လုံခြုံရေး အခြေနေပေါ် မူတည်ပြီး တဖြည်းဖြည်း ခေါ်ယူဖို့ သင့်တယ်လို့လည်း ပြောကြားကြပါတယ်။

သမ္မတ Donald Trump က တနင်္လာနေ့မှာ ဝန်ကြီး Mark Esper ကို ရုတ်တရက် ရာထူးက ဖယ်ရှားလိုက်ပြီး အကြမ်းဖက်ဝါဒ ချေမှုန်းရေးဆိုင်ရာ NCC ဌာန အကြီးအကဲဟောင်း Miller ကို ယာယီဝန်ကြီးအဖြစ် ခန့်အပ်ခဲ့တာ ဖြစ်ပါတယ်။

Crd VOA News