သမ္မတ Trump ထောက်ခံသူတွေ ဝါရှင်တန်မြို့တော်အနှံ့ ဆန္ဒပြ

နိုဝင်ဘာ ၃ ရက် သမ္မတရွေးကောက်ပွဲမှာ မဲမသမာမှုတွေ ရှိတယ်ဆိုပြီး အထောက်ထားမပါတဲ့ သမ္မတ Donald Trump ရဲ့ ပြောကြားချက်တွေကို ထောက်ခံတဲ့ ဆန္ဒပြပွဲ အတော်များများကို စနေနေ့က ဝါရှင်တန်ဒီစီမှာ ကျင်းပနေကြပါတယ်။

Million MAGA March, Women for Trump နဲ့ မဲခိုးတာရပ်ဖို့ Stop the Steal တောင်းဆိုပွဲ အပါအဝင် သမ္မတရွေးကောက်ပွဲမှာ မဲမသမာမှု ရှိတယ်ဆိုတဲ့ အထောက်အထားမဲ့ ပြောကြားချက်တွေကို ထောက်ခံတဲ့ စုဝေးဆန္ဒပြမှု အတော်များများ ကျင်းပဖို့ စီစဉ်ထားတာ ဖြစ်ပါတယ်။

အကြိတ်အနယ်ယှဉ်ပြိုင်ရတဲ့ ဘက်ပြောင်းမဲထည့်လေ့ရှိတဲ့ ပြည်နယ်အတော်များများမှာ မဲမသမာမှုတွေ ရှိတယ်လို့ ပြောပြီး ဒီရွေးကောက်ပွဲမှာ ဒုသမ္မတဟောင်း Joe Biden က သူ့ထက် မဲအသာစီး ရနေတာကို သမ္မတ Trump က လက်မခံပါဘူး။

ပြည်နယ်ရွေးကောက်ပွဲဆိုင်ရာ အရာရှိတွေကတော့ သူတို့ပြည်နယ်တွေမှာ ဒီရွေးကောက်ပွဲ ရလဒ်ကို ထိခိုက်စေလောက်တဲ့ ဆိုးဝါးတဲ့ မဲမသမာမှုမျိုး မရှိကြောင်း ပြောဆိုကြပါတယ်။

သမ္မတကိုထောက်ခံတဲ့ လူထုစုဝေးဆန္ဒပြပွဲတွေ စတင်ဖို့ သတ်မှတ်ချိန်မတိုင်ခင် ၂ နာရီလောက် အလိုမှာ သမ္မတ Trump က သမ္မတအိမ်ဖြူရှိရာ Pennsylvania Avenue လမ်းမပေါ်ကို သူ့မော်တော်ယာဉ်တန်းနဲ့ ထွက်လာပြီး သူ့ကိုထောက်ခံတဲ့ ရာနဲ့ချီတဲ့ ဆန္̔ဒပြသူတွေကို ပြုံးပြီး လက်ဝှေ့ရမ်း နှုတ်ဆက်ခဲ့ပြီး Virginia မြောက်ပိုင်းက့ဂေါက်ကွင်းဘက်ကို သွားခဲ့ပါတယ်။

ဒီဆန္ဒပြပွဲတွေကို ကွန်ဆာဗေးတစ် အယူရှိတဲ့ သတင်းမီဒီယာတွေ၊ လူဖြူကြီးစိုးရေး အမျိုးသားရေးဝါဒီတွေက ဦးဆောင်ကျင်းပတာဖြစ်ပြီး သူတို့ကို ဖက်ဆစ်ဆန့်ကျင်တဲ့ အဖွဲ့တွေ၊ ခွဲခြားဆက်ဆံမှု မရှိဖို့ လုပ်ဆောင်နေတဲ့ တက်ကြွလှုပ်ရှားသူတွေက တန်ပြန်ဆန္̔ဒပြဖို့ စီစဉ်နေကြပါတယ်။

သမ္မတကို ထောက်ခံသူတွေဟာ သမ္မတအိမ်ဖြူအရှေ့ဘက်နားက Freedom Plaza မှာ စုဝေးဖို့ရှိသလို ဆန့်ကျင်သူတွေကလည်း အဲဒီနေရာမှာရော Union Station နဲ့ တရားရုံးချုပ်တွေမှာ တန်ပြန်ဆန္ဒပြဖို့ ရှိပါတယ်။ ဆန္ဒပြဖို့ စီစဉ်ထားတဲ့ နေရာတွေတဝိုက်က လမ်းတွေအားလုံးကို ရဲတွေက ပိတ်ထားပြီး လုံခြုံရေးတွေလည်း တင်းတင်းကျပ်ကျပ် ချထားပါတယ်။

Crd VOA News