ထိုင်းသံဃာတွေ ဆန္ဒပြပွဲမှာ မပါကြဖို့ ထိုင်းသံဃာ့မဟာနာယကအဖွဲ့ အမိန့်ထုတ်

ထိုင်းဝန်ကြီးချုပ် ပရာရွတ်-ချန်အိုချာ နုတ်ထွက်ပေးရေးနဲ့ ထိုင်းဘုရင်မင်းမြတ်ရဲ့ လုပ်ပိုင်ခွင့်အာဏာ လျှော့ချပေးရေး တောင်းဆိုနေတဲ့ လက်ရှိ ဆန္ဒပြပွဲတွေမှာ ထိုင်းသံဃာတော်တွေ ပါဝင်ခြင်း မပြုကြဖို့ ၊ ထိုင်း နိုင်ငံတော်သံဃာ့ မဟာနာယကအဖွဲ့က ဗုဒ္ဓဟူးနေ့က အမိန့်ထုတ်ပြန်ထားပါတယ်။

ထိုင်းသံဃာတော်တွေ၊ ကိုရင်တွေ အနေနဲ့ နိုင်ငံရေးမှာ ပါဝင်တာ ၊ ဆန္ဒပြပွဲတွေမှာ ဝင်ရောက်လှုပ်ရှားတာ၊ နိုင်ငံရေး ထင်မြင်ယူဆချက် ထုတ်ဖေါ်ပြောဆိုတာတွေ မလုပ်ကြဖို့ အမြင့်ဆုံး သံဃာ့ ကောင်စီက ဆုံးဖြတ်ချက်ချခဲ့ကြောင်း ထိုင်းအစိုးရအဖွဲ့ရုံး နိုင်ငံတော် ဗုဒ္ဓဘာသာရေးရာဌာန ပြောခွင့်ရက ဆိုပါတယ်။

လူဦးရေ သန်း(၇၀)နီးပါးရှိတဲ့ ထိုင်းနိုင်ငံမှာ ၉၀% ကျော်က ဗုဒ္ဓဘာသာဝင်တွေဖြစ်ပြီး အစဉ်အလာအရ ထိုင်းလူ့အဖွဲ့အစည်းအတွင်း ဘုရင်စနစ်နဲ့အတူ ဗုဒ္ဓဘာသာက အဓိက မဏ္ဍိုင်လို ဖြစ်နေပါတယ်။

လတ်တလော ထိုင်းဒီမိုကရေစီရေး လှုပ်ရှားမှု ဆန္ဒပြပွဲတွေမှာ ထိုင်းဘုန်းတော်ကြီးတွေ ကျယ်ကျယ်ပြန့်ပြန့် ပါဝင်တာမျိုး မရှိသေးပေမယ့် ဆန္ဒပြ လူအုပ်ကြားထဲမှာတော့ သင်္ကန်းဝတ်တွေကို တွေ့လာရပါတယ်။ ဆန္ဒပြပွဲ ၃ ခုလောက်မှာ ပါဝင်ခဲ့တဲ့ သက်တော် ၂၁ အရွယ် ဦးပဇင်း Chistnupong Praiparee ကတော့ သံဃာအများစုရဲ့သဘောထားကို ပြသနိုင်ဖို့ ဆန္ဒပြပွဲတွေမှာ ဆက်လက် ပါဝင်သွားမယ်လို့ မိန့်ပါတယ်။ ဒါ့အပြင် ထိုင်းနိုင်ငံရဲ့ နိုင်ငံတော်သံဃာ့ မဟာနာယကအဖွဲ့ကိုလည်း ပြုပြင်ပြောင်းလဲရေး လုပ်ဖို့ ဆန္ဒပြပွဲတွေမှာ ထည့်သ ွင်း တောင်းဆို သွားမယ်လို့ ဆိုပါတယ်။

ဝန်ကြီးချုပ် ချန်အိုချာ အစိုးရလက်ထက်မှာ သံဃာ့ကောင်စီက အခြား ဆရာတော်တပါးကို အဆိုပြုရင်တောင် ထိုင်းနိုင်ငံတော်သံဃာ့ မဟာနာယကအဖွဲ့ ဥသျှောင်ဆရာတော်ကို ဘုရင်က စိတ်ကြိုက်ခန့်ခွင့် ရှိပြီး ၊ သံဃာတော်တွေ မဲပေးခွင့် မရှိသလို၊ နိုင်ငံရေးမှာလည်း ပါဝင်ခွင့် မရှိပါဘူး။

Crd VOA News