နိုင်ငံပေါင်း ၁၉၇ နိုင်ငံက ဂီတပညာရှင်တစ်ဦးစီပါတဲ့ ကမ္ဘာ့သံစုံတီးဝိုင်းဖွဲ့စည်း

ကမ္ဘာ့ဂီတသမိုင်းမှာ ပထမဆုံးအကြိမ်အဖြစ် နိုင်ငံပေါင်း ၁၉၇ နိုင်ငံက ဂီတပညာရှင် ၁ ယောက်စီပါဝင်တဲ့ ကမ္ဘာ့သံစုံတီးဝိုင်းတခုကို ဖွဲ့စည်းတည်ထောင်လိုက်ပါတယ်။ ထူးခြားတဲ့ ဂီတတေးသီချင်းတွေကို ဖန်တီးနိုင်ဖို့နဲ့ လူတွေအနေနဲ့ အတူတကွပေါင်းစည်းနိုင်ဖို့အတွက် ခန္ဓာကိုယ်ပိုင်းဆိုင်ရာနဲ့ ယဉ်ကျေးမှုပိုင်းဆိုင်ရာ ပိုင်းခြားထားတဲ့ အတားအဆီးတွေကို ဘယ်လိုကျော်လွှားနိုင်မလဲဆိုတာ နမူနာအဖြစ်နဲ့ သာဓကပြနိုင်ဖို့ မျှော်လင့်ပြီး ဖွဲ့စည်းလိုက်တာဖြစ်ပါတယ်။

The Earth Orchestra လို့အမည်ပေးထားတဲ့ ဒီသံစုံတီးဝိုင်းရဲ့တေးသီးချင်းဖြစ်တဲ့ “Together is Beautiful” သီချင်းကိုတော့ နေရာစုံမှာ သီးခြားစီ အသံသွင်းပြီးတော့ ပြန်ပေါင်းခဲ့တာပါ။ ဒီသီချင်းနဲ့အတူ ပါဝင်တဲ့ ဂီတပညာရှင်တချို့အကြောင်း မှတ်တမ်းတင်ရိုက်ကူးထားတဲ့ ဗွီဒီယိုကို သောကြာနေ့မှာ ထုတ်ပြန်ဖို့ရှိပါတယ်။

ဒီသံစုံတီးဝိုင်းမှာပါတဲ့ ကင်မရွန်းနိုင်ငံက Olgha Nk ကတော့ ဒီစီမံကိန်းဟာ ၃ နှစ်ကြာခဲ့ပြီး တကမ္ဘာလုံး အတူလက်တွဲလုပ်ဆောင်ခဲ့ကြကြောင်းပြောပါတယ်။

"ကျမမှာ စိတ်ကူးယဉ်ဆန်တဲ့ အတွေးတွေ အလွန်ရှိပါတယ်။ ကျမကတော့ ဒီစီမံကိန်းကြီးမှာ ကမ္ဘာပေါ်က နိုင်ငံတိုင်း ပါဝင်ပြီး အဲဒီနိုင်ငံတွေရဲ့ လူတွေ၊ ယဉ်ကျေးမှုတွေ ပါဝင်တဲ့အတွက် ဒါက ကမ္ဘာကြီးတခုလုံး လက်တွဲလိုက်တာလို့ မြင်ပါတယ်။" ဆိုပြီးပြောပါတယ်။

ပြီးခဲ့တဲ့ ၂၀၁၉ ခုနှစ် မေလမှာတော့ ဒီသံစုံတီးဝိုင်းအဖွဲ့ဝင် ၁၉၇ ယောက်ထဲက ၅၇ ယောက်ဟာ သီချင်းအတွက် အခြေခံအလုပ်တွေကိုလုပ်နိုင်ဖို့ ဗြိတိန်နိုင်ငံ လန်ဒန်မြို့က Abbey Road စတူဒီယိုမှာ တွေ့ဆုံခဲ့ကြပါတယ်။

ဒီစီမံကိန်းတခုလုံးကိုတော့ BAFTA ဆုရ တေးရေးဆရာ George Fenton က ကြီးကြပ်တာဖြစ်ပေမယ့် ဂီတပညာရှင်အတော်များများက သူရဲ့ သံစဉ်နဲ့ ဂီတပုံစံတွေအပေါ် အခြေခံပြီး သူတို့တိုင်းပြည်ရဲ့ ရိုးရာတူရိယာတွေကို အသုံးပြုပြီးတော့ ဖန်တီးကြတာပါ။

ရိုမေးနီးယားနိုင်ငံက ဂီတပညာရှင် Michael Cretu ကတော့ ဒီသီချင်းက အခုချိန်မှာ ကမ္ဘာကြီးလိုအပ်နေတဲ့ “လူတိုင်းအရင်ထက် ပူးပေါင်းဆောင်ရွက်ဖို့ဆိုတဲ့” အရာနဲ့ အတိအကျဖြစ်တယ်လို့ ခံစားရကြောင်း ပြောပါတယ်။

VOA News

ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။