ပါကစ္စတန် - အာဖဂန် နယ်ခြား ခြံစည်းရိုးကာရံမှု ပြီးစီးတော့မည်
သမိုင်းစဉ်တလျှောက်လုံး သူ့နိုင်ငံထဲ အာဖဂန်နစ္စတန်ဘက်က ဝင်ရောက်လာနေမှုတွေကို ဟန့်တားတဲ့အနေနဲ့ ကီလိုမီတာ ၂,၆၀၀ ဝန်းကျင် ရှည်လျားတဲ့ နှစ်နိုင်ငံနယ်စပ်တလျှောက်မှာ လာမယ့် ၂ လအတွင်းပြီးအောင် ခြံစည်းရိုးကာသွားမယ်လို့ ပါကစ္စတန် စစ်တပ်က ပြောကြားလိုက်ပါတယ်။
ဒီဆုံးဖြတ်ကိုတော့ ပါကစ္စတန် စစ်တပ်က သတင်းထုတ်ပြန်ရေးဌာနက ဗွီအိုအေကို သောကြာနေ့မှာ အသိပေးခဲ့တာဖြစ်ပါတယ်။ နှစ်နိုင်ငံနယ်စပ်မှာ အာဖဂန်ဘက်က စစ်သွေးကြွတွေ၊ မှောင်ခိုကူးသူတွေနဲ့ တခြား တရားမဝင် နယ်စပ်ဖြတ်ကျော် လုပ်ဆောင်မှုတွေကို ဟန့်တားဖို့ကြိုးစားတဲ့အနေနဲ့ ၂၀၁၇ ခုနှစ်မှာ ခြံစည်းကာတဲ့အစီအစဉ်ကို စတင်ခဲ့တာပါ။
ပါကစ္စတန်အနောက်ဘက်ခြမ်းဒေသမှာ ခြံစည်းရိုးကာရံမှုတွေ ၈၀% ပြီးစီးနေပြီဖြစ်ကြောင်း ဒီကိစ္စကို တာဝန်ယူဆောင်ရွက်နေတဲ့ ISRP ဌာနက ပြောပါတယ်။ အမေရိကန်ဒေါ်လာ သန်း ၅၀၀ လောက် ခန့်မှန်းခြေကုန်ကျမယ့် ဒီစီမံကိန်းထဲမှာ ရာနဲ့ချီတဲ့ စစ်ဆေးရေးဂိတ်တွေနဲ့ ခံတပ်တွေ တည်ဆောက်မယ့်အစီအစဉ်လည်း ပါဝင်ပါတယ်။
ခြံစည်းရိုးကိုတော့ ၃ မီတာစီလောက် ရှည်လျားတဲ့ သံဇကာတွေကို ၂ မီတာစီလောက်ခွာပြီး ၂ ထပ် ကာရံသွားမှာဖြစ်ပြီး အဲဒီအပေါ်မှာမှ ချွန်ထက်တဲ့ သံစူးကြိုးတွေ တပ်ဆင်သွားမှာဖြစ်ပါတယ်။ ဒီ ခြံစည်းရိုးကိုတော့ ဝေးလံခေါင်ဖျားပြီး လူသူအရောက်အပေါက်နည်းတဲ့၊ ကြမ်းတမ်းခက်ခဲတဲ့ တောင်တန်းဒေသတွေအပါအဝင် ပေ ၄,၀၀၀ အထိမြင့်တဲ့ဒေသတွေအထိ တောက်လျှောက် တပ်ဆင်သွားမယ်လို့ ဆိုပါတယ်။
VOA News