Cox's Bazar က ဒုက္ခသည်တွေ Bhasan Char ကျွန်းပေါ် စတင်ပြောင်းရွှေ့
ဘင်္ဂလားဒေ့ရှ်နိုင်ငံက ဒုက္ခသည်စခန်းတွေမှာ နေထိုင်နေကြတဲ့ ရိုဟင်ဂျာမွတ်ဆလင်တွေကို ဘင်္ဂလားဒေ့ရှ်အစိုးရက Bhasan Char ကျွန်းကို စတင်ပြောင်းရွှေ့နေပြီဖြစ်ပါတယ်။ ဘင်္ဂလားဒေ့ရှ် အာဏာပိုင်တွေက Cox’s Bazar ဒေသက ဒုက္ခသည်စခန်းတွေမှာရှိတဲ့ ရိုဟင်ဂျာ ဒုက္ခသည်တွေထဲက ၄၀၀ ကျော်ကို ဘာဆန်ချာကျွန်းကို ပို့ဖို့အတွက် ဘတ်စ်ကား ၁၀ စင်းထက်မနည်းနဲ့ တင်ဆောင်ပြီး စစ်တကောင်းဆိပ်ကမ်းကို ဒီကနေ့မှာ စတင်ပို့ဆောင်ခဲ့တာ ဖြစ်ပါတယ်။
အဲဒီကျွန်းကိုသွားမယ့် လူ ၄၀၀ ကျော်ကို ဘတ်စ်ကား ၁၀ စင်းနဲ့ တင်ဆောင်သွားတယ်လို့ Cox’s Bazar ဒေသ ရဲတပ်ဖွဲ့အကြီးအကဲ Ahmed Sunjur Morshed က AFP သတင်းဌာနကို ပြောပါတယ်။
အဲဒီဒုက္ခသည်တွေကို စစ်တကောင်းဆိပ်ကမ်းကနေ ဘင်္ဂလားဒေ့ရှ်စစ်တပ်ရဲ့ ကမ်းတက်စစ်ရေယာဉ်နဲ့ ဘာဆန်ချာကျွန်းကို မနက်ဖြန် သောကြာနေ့မှာ ပို့ဆောင်သွားမှာဖြစ်တယ်လို့ အာဏာပိုင်တွေက ပြောပါတယ်။ အခုလောလောဆယ် ပထမအဆင့်အနေနဲ့ ဘင်္ဂလားဒေ့ရှ်အာဏာပိုင်တွေဘက်က အဲဒီကျွန်းကို ဒုက္ခသည် ၂,၅၀၀ လောက် ပို့ဆောင်သွားဖို့ စီစဉ်နေတယ်လို့လည်း ပြောပါတယ်။ ဒုက္ခသည်စခန်းတွေမှာတော့ နောက်ထပ် ဘတ်စ်ကားတွေ အတော်များများဆက်စောင့်နေတယ်လို့ AFP က ပြောပါတယ်။ ဒါပေမဲ့ နောက်ထပ်ဒုက္ခသည်တွေ သွား၊ မသွားဆိုတာတော့ ရှင်းရှင်းလင်းလင်း မသိရသေးဘဲ အာဏာပိုင်တွေဟာ ဒုက္ခသည်တွေကို သူတို့ရဲ့ဆန္ဒမပါဘဲ အတင်းအကြပ် သွားခိုင်းနေတယ်လို့ လူ့အခွင့်အရေးအဖွဲ့တွေက စွပ်စွဲပြောဆိုနေပါတယ်။
ဒုက္ခသည်တွေကို အခုလို ဘာဆန်ချာကျွန်းကို ပို့ဆောင်မယ့်အစီအစဉ်ကို ရပ်တန့်ဖို့ လူ့အခွင့်အရေးအဖွဲ့တွေကလည်း ဘင်္ဂလားဒေ့ရှ်အစိုးကို ဒီကနေ့ တိုက်တွန်းလိုက်ပါတယ်။ အခုလိုဒုက္ခသည်တွေကို ရွှေ့ပြောင်းနေရချထားတဲ့အစီအစဉ်မှာ သူတို့ပါဝင်ပတ်သက်မှုမရှိသလို သတင်းတွေလည်း အကန့်အသတ်နဲ့ပဲ ရရှိတယ်လို့ ဘင်္ဂလားဒေ့ရှ်နိုင်ငံမှာ ရှိတဲ့ ကုလသမဂ္ဂရုံးရဲ့ ဒီနေ့ကြေငြာချက်ထဲမှာ ပြောလိုက်ပါတယ်။
VOA News