အဇာဘိုင်ဂျန် ထိန်းချုပ်ခွင့်ရသွားတဲ့ Nagorno-Karabakh က အာမေးနီးယားတွေ ထွက်ပြေးကြပြီ
အာမေးနီးယား ဝန်ကြီးချုပ် Nikol Pashinyan က အဇာဘိုင်ဂျန်နဲ့ ရုရှားတို့နဲ့ အပစ်အခတ် ရပ်စဲရေး သဘောတူ စာချုပ် ချုပ်ဆိုခဲ့တဲ့ နောက်မှာ ဗုဒ္ဓဟူးနေ့က အာမေးနီးယားနဲ့ အဇာဘိုင်ဂျန် တို့ကြား တိုက်ပွဲတွေ ဖြစ်ပွားနေတဲ့ Nagorno-Karabakh ဒေသမှာရှိတဲ့ အာမေးနီးယား တွေ အစုလိုက်အပြုံလိုက် ထွက်ပြေးတိမ်းရှောင်နေကြပါတယ်။
သီတင်း ၆ ပတ်ကြာ ပြင်းထန်တဲ့ တိုက်ပွဲတွေ ဖြစ်ပွားခဲ့တဲ့ ဒီဒေသအတွက် တနင်္လာနေ့မှာ ကြေညာချက် ထုတ်ပြန်ခဲ့တဲ့နောက် ဒေသတွင်း နောက်ထပ် လူထောင်ပေါင်းများစွာ ထပ်မံ သေဆုံးရမယ့် အရေး စိုးရိမ်မှုတွေ တိုးလာခဲ့တာ ဖြစ်ပါတယ်။
ဒီဒေသဟာ အဇာဘိုင်ဂျန် ပိုင်နက်ထဲမှာ ရှိနေပေမယ့် နေထိုင်သူ အများစုဟာ အာမေးနီးယားတွေ ဖြစ်ပြီး သူတို့ဟာ အဇာဘိုင်ဂျန် တပ်တွေနဲ့ တိုက်ပွဲတွေ ဖြစ်နေတာပါ။
ဒီဒေသမှာ နှစ်ပေါင်း ၂၅ ကြာနေထိုင်ခဲ့တဲ့ အာမေးနီးယား အမျိုးသမီးတဦးကတော့ အားလုံးလိုလို ထွက်ပြေးတိမ်းရှောင်နေကြပြီး ကျန်နေသူတွေလည်း အခုအခါမှာ ထွက်ပြေးဖို့ လုပ်နေကြပြီလို့ ရိုက်တာသတင်းဌာနကို ပြောပါတယ်။
အရင်တုန်းက အာမေးနီးယားတွေ ထိန်းချုပ်ထားပြီး အခုအခါ အဇာဘိုင်ဂျန်တွေ ထိန်းချုပ်နေတဲ့ Kelbajar ဒေသကို ဖြတ်ပြီး ကားတွေနဲ့ ထွက်ပြေးနေကြတာ ဖြစ်ပါတယ်။
အခု ရရှိတဲ့ အပစ်ရပ် သဘောတူညီချက်အရ ဒီဒေသကို အဇာဘိုင်ဂျန်တွေက ထိန်းချုပ်ရမှာ ဖြစ်ပြီး အခုအချိန်ကနေ ဒီဇင်ဘာလ တရက်နေ့ အတွင်း အာမေးနီးယားတပ်တွေက လွှဲပြောင်းပေးရမှာ ဖြစ်ပါတယ်။
လွန်ခဲ့တဲ့ သီတင်း ၆ ပတ်တုန်းက အပစ်ရပ်သဘောတူညီချက် ၃ ခု ကတော့ မအောင်မမြင် ဖြစ်ခဲ့တာပါ။
Crd VOA News