မြန်မာအတွက် ကိုဗစ်ကာကွယ်ဆေး ဖေဖော်ဝါရီမှာရဖို့ မျှော်လင့်

သန်းနဲ့ချီတဲ့ မြန်မာနိုင်ငံသားတွေအတွက် ကိုဗစ်ရောဂါ ကာကွယ်ဆေးရဖို့ ငွေပေးချေထားပြီး၊ အမြန်ဆုံးရဖို့ စီစဉ်နေကြောင်း အစိုးရပြောခွင့်ရ ပုဂ္ဂိုလ်က ပြောဆိုလိုက်တဲ့အကြောင်းကို ဗွီအိုအေမြန်မာပိုင်း သတင်းထောက် ကိုထက်အောင်ခန့်က တင်ပြပေးပါမယ်။

မြန်မာနိုင်ငံက လူဦးရေ ၁၅ သန်းအတွက် အိန္ဒိယနိုင်ငံက မှာယူထားတဲ့ ကိုဗစ်ကာကွယ်ဆေး အမြန်ဆုံး ရရှိနိုင်အောင် စီစဉ်နေပြီး မကြာခင် ရရှိမယ်လို့ ခန့်မှန်းထားကြောင်း သမ္မတရုံး ညွှန်ကြားရေးမှူးချုပ် ဦးဇော်ဌေးက ဒီကနေ့ပဲ နေပြည်တော်က သတင်းစာရှင်းလင်းပွဲမှာ ပြောလိုက်တာပါ။

“အမြန်ဆုံးတော့ လုပ်နေတယ်။ လုပ်နေတဲ့အပိုင်းမှာ အခုတဝက်ပေါ့နော်။ ၇၅ သန်းကို ၁၄ ရက်နေ့ နောက်ဆုံးထား လွှဲပေးပြီးသွားရင် ဟိုဘက်က ဆေးတွေတင်ပို့ဖို့ လုပ်ရမယ်။ အဲ့လုပ်တဲ့ဟာကိုလည်း မြန်အောင် ညှိနှိုင်းနေတယ်။ ဖေဖော်ဝါရီလထဲ ရနိုင်မလားပေါ့နော်။ Target ထားတာပေါ့နော်။ ဒါပေမဲ့ ဖေဖော်ဝါရီလထဲရ ရမယ်လို့ ပြောတာ မဟုတ်ဘူးနော်။ ဒါ ကျနော်တို့ တနိုင်ငံတည်းတင် ပြောလို့မရဘူး။ အိန္ဒိယဘက်ကလည်း အမြန်ဆုံး ပို့ပေးဖို့ကို အမြန်ဆုံးညှိနေပါတယ်။ မျှော်မှန်းတာကတော့ ဖေဖော်ဝါရီ ရမလားပေါ့။ အဲ့ဒီလိုတော့ မျှော်မှန်းတယ်။”

လာမယ့် ဖေဖော်ဝါရီလမှာ အမေရိကန် ဒေါ်လာ ၇၅ သန်းကို လွှဲပေးဖို့ စီစဉ်ထားပြီး ပထမအသုတ်အဖြစ် ထိုးဆေး ၁၀ သန်းရောက်ရှိလာတဲ့အခါ ကျန်တဲ့တဝက်ကို ထပ်မံပေးချေဖို့ သဘောတူထားတယ်လို့လည်း ပြောပါတယ်။ နောက်ထပ်လည်း ကာကွယ်ဆေးတွေ ရနိုင်ဖို့ အိမ်နီးချင်း တရုတ်နိုင်ငံ အပါအဝင် ကျန်နိုင်ငံတွေနဲ့ ညှိနှိုင်းနေတယ်လို့ ဦးဇော်ဌေးက ပြောပါတယ်။

 “နောက် Bilateral တွေ တရုတ်နဲ့လည်းညှိတာ ရှိတယ်။ ဖွံ့ဖြိုးဆဲနိုင်ငံတွေရ ရမယ့် WHO ရဲ့ ကာကွယ်ဆေး ရရှိရေး လုပ်ငန်းစဉ်တွေမှာလည်း ကျနော်တို့ ပါတယ်။ သို့သော် ဒါကတော့ ကိုယ့်နိုင်ငံအရေးပေါ်နော် အစောဆုံးရအောင် အမြန်ဆုံး ရအောင်လုပ်နေတဲ့ သဘောဖြစ်ပါတယ်။”

ကိုဗစ်ရောဂါ ကာကွယ်ဆေးကိုတော့ ပထမဦးစားပေးအဖြစ် မြန်မာတနိုင်လုံးက ကျန်းမာရေးဝန်ထမ်း ၁၂၀,၀၀၀ ကျော်ကို ထိုးနှံပေးမှာ ဖြစ်တယ်လို့လည်း မြန်မာနိုင်ငံ ကျန်းမာရေးနဲ့အားကစားဝန်ကြီးဌာနက ပြောဆိုထားပါတယ်။

ကျန်းမာရေးနဲ့ အားကစားဝန်ကြီးဌာနက ဇန်နဝါရီ ၇ ရက်နေ့အထိ ထုတ်ပြန်ထားတဲ့ စာရင်းတွေအရ မြန်မာနိုင်ငံမှာ ကိုဗစ်ကပ်ရောဂါကြောင့် သေဆုံးသူ ၂,၇၀၀ ကျော်နဲ့ ကူးစက်ခံရသူ ၁၂၈,၀၀၀ ကျော် ရှိနေပါတယ်။

VOA News