Base Line စတင်ရာ မေယုကျွန်း
မေယုကျွန်း (Oyster lsland) ဟာစစ်တွေမြို့ အနောက်မြောက်ဘက် ၂၅မိုင်အကွာတွင်တည်ရှိပြီး စစ်တွေမြို့မှရေကြောင်းဖြင့်၂နာရီခွဲခန့်သွားရပါတယ်။ ဘဂ်လားဒေ့ရှိနိုင်ငံနဲ့နီးကပ်စွာရှိပြီး Kalakata, Sittong, Mayu, Kalartan နှင့် Laymyo မြစ်များပင်လယ်ဆုံမှတ်မှာတည်ရှိပါတယ်။ မြန်မာနိုင်ငံပိုင်ဖြစ်ပါတယ်။
မေယုကျွန်းဟာ တောင်မြောက် အလျား ၄၀၀ပေ အရှေ့ အနောက် အလျား ၂၀၀ပေ ဧရိယာအားဖြင့် ၁.၈ဧကသာကျယ်ဝန်းသောခရုပုံကျွန်းလေးတစ်ခုဖြစ်ပါတယ်။ ကျွန်းပေါ်ကမီးပြတိုက်ကိုတော့ ၁၈၈၅ ခုနှစ်မှာတည်ဆောက်ခဲ့ပြီး ရေမျက်နှာပြင်အမြင့်မှ ၁၃၅ပေမြင့်ပါတယ်။ ၁၈၈၅ မှ ၁၉၆၄ အထိ Oyster lighthouse အမည်ဖြင့်ရှိခဲ့ပြီး ၁၉၆၅ တွင် Mayu Lighthouse မေယု မီးပြတိုက်အဖြစ်အမည်ပြောင်းလဲခဲ့ပါတယ်။ ယခင်ကမီးစက်ကိုအသုံးပြုမီးပြခဲ့သော်လည်း ၂၀၀၉ခုနှစ်မှစကာ Solar စနစ်သို့ပြောင်းလဲခဲ့ပြီးမီးပြတိုက်ဝန်ထမ်းများထားရှိခြင်းမရှိတော့တာကိုမှတ်သားသိရှိရပါတယ်။
ပြုပြင်ထိန်းသိမ်းရေးကို မြန်မာ့ဆိပ်ကမ်းအာဏာပိုင်မှဆောင်ရွက်ခဲ့ပါတယ်။
အခြေခံမျဥ်းများ (Base Line)အကြောင်းပြန်လည်ရှင်းပြပါဦးမည်။
တိုင်းပြည်ရဲ့အချုပ်အခြာအာဏာသက်ရောက်ရာ ရေပြင်ပိုင်နက် (Territorial Water) ကို အခြေခံမျဥ်းများ (Base Line) မှအပြင်ဘက် ၁၂မိုင်အကွာမှစတင်သတ်မှတ်ပါတယ်။ အလွယ်ပြောပါက Baseline မရောက်ခင် ၁၂မိုင်မှာ နိုင်ငံရေပြင်ပိုင်နက်စတင်နေပြီဖြစ်ပါတယ်။
မြန်မာနိုင်ငံ၏အခြေခံမျဥ်း Baseline သည်ကမ်းခြေမှကပ်လျက်မဟုတ်ပဲ Straight baseline အမျိုးစားဖြစ်ပြီး နိုင်ငံတော်၏ပင်လယ်ကမ်းရိုးတန်းပထဝီအနေအထားများအရလည်းကောင်း၊ပင်လယ်ကမ်းခြေဒေသများ၏စီးပွားရေးလိုအပ်ချက်အရလည်းကောင်းပုံသေသတ်မှတ်ထားသောတည်နေရာအမှတ်အသားများအားဆက်စပ်၍ရေးဆွဲထားသောအခြေခံမျဥ်းဖြောင့်မှတိုင်းတာပါသည်။
ဒါကြောင့်မြန်မာနိုင်ငံရဲ့အခြေခံမျဥ်းမှာမြေပုံကြီးရဲ့ကုန်းမြေအဆုံးကသတ်မှတ်တာမဟုတ်ပဲပင်လယ်ဘက်ကိုထွက်နေတဲ့အစွန်းဆုံးကျွန်းလေးတွေကိုဆက်ဆက်ဆွဲလာတာဖြစ်ပါတယ်။ ဒီလိုကမ်းခြေနားကပ်နေတဲ့ကျွန်းလေးတွေ ရေပေါ်ပေါ်နေတဲ့ကျောက်တန်းလေးတွေကိုဆက်ဆက်ဆွဲလာခဲ့တာ ရခိုင်ကမ်းရိုးတန်းနေ မုတ္တမပင်လယ်ကွေ့ ၊ တနင်္သာရီကမ်းရိုးတန်းတလျောက် ဥပဒေသတ်မှတ်ချက်ထဲအကျုံးဝင်သမျှ low water baseline အဖြစ်သတ်မှတ်နိုင်သမျှတည်နေရာအမှတ်တွေကနေမျဥ်းဖြောင့်ဆက်ဆက်ဆွဲလာပါတယ်။ ဒီအမှတ်(ကျွန်း၊ ရေပေါ်နေသောကျောက်တန်း)တွေကတော့
ရခိုင်ကမ်းရိုးတန်း
(က) မေယုကျွန်း၏တောင်ဘက်စွန်း
(ခ) မြင်းကွန်းကျွန်း၏တောင်ဘက်စွန်း
(ဂ) တောင်သန္တာကျောက်
(ဃ) ဂမ္ဘီမကျောက်တန်း၏အနောက်ဘက်စွန်း
(င) နတ်ဗုဒ္ဓါကျွန်း
(စ) ကျောက်လက်ဝါးကျောက်စု
(ဆ) ငှက်တောင်ကျွန်းများ၏အနောက်မြောက်ကျွန်းစု
(ဇ) ကိုရင်ကြီးကျွန်း
(ဈ) ဆင်ပိန်ကျွဲကျောက်များ၏တောင်ဘက်ကျောက်
(ည) ကျောက်နက်
(ဋ) ပုသိမ်မီးပြ
မုတ္တမပင်လယ်ကွေ့
(က) ပုသိမ်မီးပြ
(ခ) ဟိန်းဇဲဘုတ်ကျွန်း၏အနောက်ဘက်စွန်း
တနင်္သာရီကမ်းရိုးတန်း
(က) ဟိန်းဇဲဘုတ်ကျွန်း၏အနောက်ဘက်စွန်း
(ခ) မောင်းမကန်ကျွန်းစု၏မြောက်ကျွန်း
(ဂ) ထုံးတောင်ကျွန်း
(ဃ) ကုရင်ကျွန်း၏မြောက်ဘက်စွန်း
(င) နာခံကျွန်း၏အနောက်ဘက်စွန်း
(စ) အနောက်စူလာကျွန်း၏အနောက်ဘက်စွန်း
(ဆ) မြောက်တော်ဝင်ကျွန်း၏အနောက်မြောက်ဘက်စွန်း
(ဇ) တောင်တော်ဝင်ကျွန်း၏အနောက်ဘက်စွန်း
(ဈ) အောက်ကျွန်းနီကျွန်း
(ည) တစ်ပင်တိုင်ကျွန်း
(ဋ) တောင်စွန်းကျွန်း၏အနောက်ဘက်စွန်း
ဒီ ၂၂ ခုသော Point လေးတွေကိုဆက်ဆက်ဆွဲလာပြီး ပင်လယ်ဘက်တောက်လျောက် တစ်ကြောင်းထဲသောမျဥ်းကြောင်းတစ်ခု Baseline (နိုင်ငံရဲ့အခြေခံမျဥ်း) ရရှိလာပါတယ်။ မြန်မာနိုင်ငံရဲ့ပထဝီအနေအထားရရခိုင်ဘက်ကကျွန်းလေးတွေဟာ နိုင်ငံရဲ့နယ်နမိတ်ပင်လယ်ဘက်တွန်းပို့နိုင်မှုနည်းပေမဲ့ ပုသိမ်မီးပြ(Alguada reef) မှ ဟိန်းဇဲဘုတ်ကျွန်း(Long Island) ကိုတဖြောင့်တည်းဆက်လိုက်သောမျဥ်းဟာ မုတမ ကွေ့တစ်ခုလုံးကို Internal Water အဖြစ် Baseline အတွင်းထဲရောက်ကာနိုင်ငံအခြေခံမျဥ်းကိုကမ်းခြေမှမိုင် ၁၂၀ ကျော်အထိအပြင်ကိုဆွဲဆန့်လိုက်နိုင်စေတာကိုတွေ့ရပြီးမြတ်ကျွန်းစုတွေဟာလဲပြည်ပကုန်းမြေမိုင် ၈၀ ခန့်အထိဝေးရာကနေ Baseline သတ်မှတ်ချက်ရရှိနိုင်အောင်အားသာစေခဲ့တာကိုတွေ့ရပါတယ်။
တကယ်လို့သာကျွန်းတွေ ကျောက်တန်းတွေသာမရှိခဲ့ရင်ရေပြင်နယ်နမိတ်သတ်မှတ်ချက် အခြေခံမျဥ်းဟာ ကမ်းခြေနဲ့အနီးဆုံး ရေကျချိန်ပေါ်နေတဲ့ကုန်းမြေအစပ်နားကနေသတ်မှတ် ရေးဆွဲရမှာဖြစ်ပါတယ်။ဒါဟာနိုင်ငံရဲ့ပထဝီအနေအထားနဲ့သက်ဆိုင်ပါတယ်။
ကောင်းပါပြီ မြန်မာပြည် တိုင်းပြည်ကုန်းမြေကြီးအတွက် ၂၂ ပွိုင့်ကနေဆက်စပ်ရေးဆွဲပြီး အခြေခံမျဥ်းကြီးကရပါပြီ။ ကုန်းမြေနဲ့ဝေးရာပင်လယ်ထဲကကျွန်းတွေကျန်ပါသေးတယ်။
ဒါဟာကမ်းခြေနဲ့ဝေးရာပင်လယ်ထဲကကျွန်းတွေမပါသေးပါ။ ပြည်မကြီးပြီးတော့မှ ကျွန်တော်တို့နိုင်ငံရဲ့Indian Ocean ထဲကကျွန်းစုကြီး ၂ခုကို Baseline သတ်မှတ်ပါတယ်။
ပရီပဲရစ်ကျွန်းအုပ်စု (ပါလီပါလဲ့ကျွန်းအုပ်စု)
(က) နွားသားအမိကျွန်း၏အနောက်မြောက်ဘက်စွန်း
(ခ) အုန်းပင်ကျွန်း၏အနောက်ဘက်စွန်း
(ဂ) သဲဖြူကျွန်း၏အနောက်မြောက်ဘက်စွန်း
(ဃ) ဆင်ကျွန်း၏အနောက်မြောက်ဘက်စွန်း
(င) လူခေါင်းကျွန်း၏အနောက်မြောက်ဘက်စွန်း
(စ) လူခေါင်းကျွန်း၏တောင်ဘက်စွန်း
(ဆ) ပါလီပါလဲ့ကျွန်း၏တောင်ဘက်စွန်း
(ဇ) ပါလီပါလဲ့ကျွန်း၏အရှေ့မြောက်ဘက်စွန်း
(ဈ) နွားသားအမိကျွန်း၏အရှေ့ဘက်စွန်း
ကိုကိုးကျွန်းအုပ်စု
(က) မင်္ဂလာကျွန်း၏အရှေ့မြောက်ဘက်စွန်း
(ခ) ညှပ်ဖိနပ်ကျွန်း၏အနောက်ဘက်စွန်း
(ဂ) ကိုကိုးလေးကျွန်း၏အနောက်မြောက်ဘက်စွန်း
(ဃ) ကိုကိုးလေးကျွန်း၏တောင်ဘက်စွန်း
(င) ချယ်ရီကျွန်း၏တောင်ဘက်စွန်း
(စ) ကိုကိုးကြီးကျွန်း၏အရှေ့မြောက်ဘက်စွန်း
ဒီ point လေးတွေကိုဆက်လိုက်တဲ့အခါကျွန်းစုပါတ်ပါတ်လည်ကိုဆက်ထားတဲ့မျဥ်းပေါ်လာပြီးကုန်းမြေနဲ့မတူတာက ကျွန်းဖြစ်တဲ့အတွက်မျဥ်းဟာစမှတ်နဲ့ဆုံးမှတ်ဆက်သွားပြီးကျွန်းကိုဝိုက်ပြီးဆွဲထားတဲ့ Baseline အခြေခံမျဥ်း ၂စုံရရှိသွားပြီလို့မျက်လုံးထဲမြင်စေလိုပါတယ်။
Baseline အခြေခံမျဥ်းကိုအနှစ်ချုပ်မယ်ဆို နိုင်ငံပြည်မကြီးအတွက် ရခိုင်ကမ်းရိုးတန်းမေယုကျွန်းကနေ တနသ်ာရီကမ်းရိုးတန်း တောင်စွန်းကျွန်းမှဆုံးတဲ့ အခြေခံမျဥ်းမျဥ်းရှည်ကြီးတစ်ကြောင်း၊ ကိုကိုးကျွန်းနဲ့ ပရီပဲရစ်ကျွန်းအုပ်စုကိုဝိုက်ကာရေးဆွဲထားတဲ့အခြေခံမျဥ်း ၂စုံရရှိလာပြီဖြစ်ပါတယ်။
The United Nations Convention on the Law of the Sea (UNCLOS) အရပိုင်နက်ရေပြင်အတွက်နိုင်ငံတကာဥပဒေသက်ရောက်လိုက်နာရပြီး ပြီး မြန်မာနိုင်ငံအတွက် မြန်မာနိုင်ငံပိုင်နက်ပင်လယ်နှင့်ပင်လယ်ဇုန်များဥပဒေဖြင့်ပြဌန်းဥပဒေသက်ရောက်ပါတယ်။
၁၉၆၈ မှတရားဝင်မြန်မာနိုင်ငံရဲ့အခြေခံမျဥ်းစတင်ရာ Point A ဟာ မေယုကျွန်း မီးပြတိုက်ဖြစ်ပါတယ်။ တောင်ဘက်အစွန်းကတော့်ထိုင်းနိုင်ငံအနီးက Point K တောင်စွန်းကျွန်းဖြစ်ပါတယ်။
မေယုမီးပြတိုက်နဲ့ကျွန်းဟာခေတ်အဆက်ဆက်ရာသီဥတုဒဏ်ကြောင့်ယိုယွင်းမှု ဧပြီလ၂၀၀၆ မှတိုက်ခတ်ခဲ့သော ဆိုက်ကလုန်းမာလာ (Cyclone Mala) ကြောင့်ထိခိုက်ပျက်စီးမှုတွေရှိခဲ့ပါတယ်။ အထူးသဖြင့် ရေတိုက်စားမှုကာကွယ်ထားသောရေတားနံရံများပျက်ဆီးခဲ့ပြီး ပင်မမီးပြတိုက်အခြေအထိရေတိုက်စားမှုများရှိလာခဲ့ပါတယ်။
ဒီအတွက်မြန်မာ့ဆိပ်ကမ်းအာဏာပိုင်မှပြင်ဆင်ရန်ဆောင်ရွက်ခဲ့ပြီး ၂၀၁၈ ဇန်နဝါရီလမှ Project စတင်ခဲ့ပါတယ်။ ရေတက်ရေကျကြောင့်သွားလာရန်ခက်ခဲမှု၊ ဆိုက်ကပ်ရန်နေရာမရှိမှု၊ စက်ယန္တရားကြီးများပို့ဆောင်မှု၊ ကြီးမားသော Armour Crashed rock ကျောက်ခဲများ၊ Geotextile များ၊ အလေးချိန် ၃တန်ခန့်ရှိ ရေတားTetra Pod ကြီးများတန်ချိန်များစွာကိုသယ်ယူပို့ဆောင်ကာမဟာဗျူဟာမြောက်ပြင်ဆင်ဆောင်ရွက်နိုင်ခဲ့ပြီး ၂၀၂၀မတ်လမှာပြီးစီးခဲ့ပါတယ်။
ပြင်ဆင်ခဲ့ပြီးသော မေယုကျွန်းပုံအားတွေ့မြင်နိုင်ပြီး မြန်မာနိုင်ငံရဲ့ပထမဆုံး အချုပ်အချာရေပြင်နယ်နမိတ်သတ်မှတ်ရာစမှတ်အဖြစ်အရေးကြီးလှသောမေယုကျွန်းအား နိုင်ငံသားတိုင်းအလေးထားသိရှိနားလည်နိုင်ရန်ရေးသားတင်ပြအပ်ပါသည်။
Credit to:
Capt. Aung Myin Moe
ရည်ညွှန်း / ကိုးကား
ပိုင်နက်ပင်လယ်နှင့်ပင်လယ်ဇုန်များဥပဒေ/MPA
Photo Credit: Mg Phyo