ကိုရိုနာဗိုင်းရပ်စ် တရုတ်က စတင်တာမဟုတ်ဘူးလို့ WHO ယတိပြတ်မပြောနိုင်
ကိုရိုနာဗိုင်းရပ်စ်ဟာ တရုတ်နိုင်ငံကနေ လာတာမဟုတ်ဘူးလို့ကမ္ဘာ့ကျန်းမာရေးအဖွဲ့ WHO အနေနဲ့ အတိအကျပြောလို့ မရကြောင်း WHO အရေးပေါ်ဆိုင်ရာ ကျွမ်းကျင်ပညာရှင်တဦးက သောကြာနေ့က ပြောကြားလိုက်ပါတယ်။
နိုဝင်ဘာလ ၂၇ ရက်နေ့က ဆွစ်ဇာလန်နိုင်ငံ ဂျီနီဗာမှာ ကိုဗစ်-၁၉ နောက်ဆုံးအခြေအနေအကြောင်း ပြုလုပ်တဲ့ ဗွီဒီယိုကွန်ဖရင့် သတင်းစာရှင်းလင်းပွဲအတွင်း WHO ညွန်ကြားရေးမှူးချုပ် Mike Ryan က တရုတ်နိုင်ငံ ဝူဟန်မြို့မှာ ၂၀၁၉ ခုနှစ် ဒီဇင်ဘာလက ပထမဆုံးတွေ့ရှိခဲ့တဲ့ ကိုရိုနာဗိုင်းရပ်စ်ဟာ တရုတ်မှာ အရင်ဖြစ်ခဲ့တာမဟုတ်ပဲ အပြင်ကနေ ကူးလာသလားဆိုတဲ့ မေးခွန်းနဲ့ ပတ်သက်လို့ သူက အခုလို ဖြေကြားသွားပါတယ်။
” ဒီရောဂါဟာ တရုတ်နိုင်ငံကနေ ထွက်ပေါ်လာတာမဟုတ်ဘူးလို့ ပြောမယ်ဆိုရင် ကျနော်တို့အတွက် အလွန်အကျွံ မှန်းဆပြောတာမျိုး ဖြစ်သွားပါလိမ့်မယ်။ ပြည်သူ့ကျန်းမာရေး ရှုထောင့်ကနေကြည့်မယ်ဆိုရင်တော့ အလွန်ရှင်းပါတယ်။ လူမှာ ဗိုင်းရပ်စ်ကူးစက်ခံရကြောင်း ပထမဆုံးတွေ့ရှိတဲ့နေရာကနေ စတင်ပြီး စုံစမ်းစစ်ဆေးတာတွေ လုပ်မှာဖြစ်ပါတယ်။ အဲဒီလို စုံစမ်းစစ်ဆေးရာကနေ ရလာတဲ့ အထောက်အထားတွေက အခြားနေရာတွေကိုညွန်းရင်လည်း ညွန်းနိုင်ပါတယ်။”
ဒါအပြင် Wuhan ကုန်စုံ ဈေးတန်းကိုသွားပြီး ဗိုင်းရပ်စ်ရဲ့ မူရင်းဇစ်မြစ်ကို နောက်ထပ် စုံစမ်းရှာဖွေဖို့ WHO အနေနဲ့ သုတေသီတွေကို လွှတ်ဖို့ ရည်ရွယ်ခဲ့တဲ့အချက်ကိုလည်း သူက ထပ်လောင်းပြောကြားခဲ့ပါတယ်။
ဒါပေမဲ့လည်း ဝူဟန်မြို့မှာ ဗိုင်းရပ်စ်ပိုး မတွေ့ခင်ကတည်းက ကိုရိုနာဗိုင်းရပ်စ်ဟာ နိုင်ငံရပ်ခြားမှာ အရင်ရှိခဲ့တာဖြစ်တယ်လို့ တရုတ်အစိုးရ ပိုင်ရုပ်သံမီဒီယာတွေမှာ တွန်းအားပေးပြောဆိုနေတာ ဖြစ်ပါတယ်။ အေးခဲအောင်ပြုလုပ်ပြီး ထုတ်ပိုးထားတဲ့ အစားအစာမှာ အဲဒီပိုးပါလာတာဖြစ်ပြီး သိပ္ပ္ပံဆိုင်ရာ စာတမ်းတွေအရ လည်း ဗိုင်းရပ်စ်ဟာ ပြီးခဲ့တဲ့နှစ် ကတည်းက ဥရောပမှာ ပျံ့နှံ့နေခဲ့တယ်လို့ တရုတ်နိုင်ငံက ဖေါ်ပြထားပါတယ်။
VOA News