ကိုဗစ်-၁၉ ကူးစက်မှုတိုးလာနေတဲ့ ဖားကန့် နောက်ဆုံးအခြေအနေ

ရေမဆေးကျောက်တူးသမား ရွှေ့ပြောင်းလုပ်သား သိန်းချီရှိနေတဲ့ ကချင်ပြည်နယ်ဖားကန့်ဒေသအတွင်း ကိုဗစ်၁၉ ကာကွယ်ရေး အစီအမံတွေ ပိုတင်းတင်းကျပ်ကျပ် ဆောင်ရွက်လာနေတဲ့အကြောင်း မဆုမွန် က စုစည်းတင်ပြပေးထားပါတယ် ။

ကူးစက်မြန်ကပ်ရောဂါ ကိုဗစ် ၁၉ ကူးစက်မှု လူရာချီ တွေ့ရှိလာတဲ့နောက် ကချင်ပြည်နယ် ဖားကန့်ဒေသ လုံးခင်းကျေးရွာအုပ်စုထဲ အသွားအလာကန့်သတ်မှုLock- Down ချပြီး ကိုဗစ်အန္တရာယ် ထိန်းချုပ် ကာကွယ်နိုင်ရေး အစီအမံတွေကို တင်းတင်းကျပ်ကျပ် ပိုတိုး လုပ်ဆောင်လိုက်ပါတယ်။ ကိုဗစ်ကူးစက်မှု ကာကွယ်ရေးအတွက် တိုက်နယ်ဆရာဝန်တွေ ကျန်းမာရေးမှူးတွေနဲ့ အုပ်ချုပ်ရေးမှူး ရပ်မိရပ်ဖတွေ စီမံဆောင်ရွက်နေကြတယ်လို့ ပြည်သူ့လွှတ်တော်ကိုယ်စားလှယ် ဦးတင့်စိုးက ရှင်းပြပါတယ်။

" ဖားကန့်တမြို့နယ်လုံးမှာ အဓိက အရေးကြီးဆုံးနေရာက လုံးခင်းအုပ်စုပါ။ ကျနော်နေတာလည်း လုံးခင်းမှာနေတာဆိုတော့-ကျေးရွာအုပ်စုပေမဲ့ လူဦးရေက တသိန်းဝန်းကျင်လောက်ရှိတယ်။ကျနော်တို့ဒေသအခေါ် မှော်ရွာတွေပေါ့ဗျာ - Migrants ရွှေ့ပြောင်းတွေ ရေမဆေးတွေ ဒီလိုလူတွေ အများဆုံးနေကြတဲ့ ရွာလည်းဖြစ်တယ်။ အခု လက်ရှိ ရောဂါဖြစ်ပွားနေတဲ့အနေအထားမှာ ပိုးတွေ့ပြီဆိုတာနဲ့ ကျနော်တို့ ဒေသအနေအထားအရLock Down ချတယ်။ အဆက်အသွယ်တွေ အကုန်ဖြတ်ထားတယ် ဖြတ်ပြီးတော့မှ သူတို့အတွက် စားဝတ်နေရေး ကျနော်တို့ဘက်က တတ်နိုင်သလောက် ပံ့ပိုးကူညီပေး ဒီလိုအားဖြင့် တောက်လျောက်လုပ်ပေးတယ်။ နောက်ဆုံး ဘယ်လောက်အထိဖြစ်လာလဲဆိုရင် ၁၀၀ကျော်ပေါ့ဗျာ လုံးခင်းမှာ အဲ့ဒီ့ရပ်ကွက်တွေ ငါးခုရှိတယ် -အားလုံးကို ပျံ့နှံ့သွားတယ် ပိုးက။ ကျနော်တို့ ပြည်နယ်ကျန်းမာရေးဌာနကလည်း လုံးခင်းအုပ်စုတခုလုံးကိုLock Down မနေ့က ညနေ ၆နာရီကစပြီး သတ်မှတ်လိုက်တာပေါ့။"

ကိုဗစ်ကူးစက်မှုပိုပြီးပျံ့နှံ့လာတဲ့အတွက် ကျောက်စိမ်းတွင်းလုပ်ငန်းခွင်တွေ ကျောက်ဝိုင်းတွေ ဈေးဆိုင်တွေပါ ပိတ်ခိုင်းလိုက်ပြီး ကျေးရွာတအုပ်စုကနေ တအုပ်စုဆီ သွားလာမှုတားမြစ်ပြီး ကန့်သတ်ချက်တွေ ပိုတိုးချလိုက်တာပါ။ ပြည်သူတွေ နေအိမ်မှာပဲနေဖို့ ညွှန်ကြားချက် ထုတ်လိုက်တာ ဖြစ်ပါတယ်။ ဒီလိုအနေအထားမှာတော့ ဖားကန့်ဒေသခံတွေနဲ့ ရွှေ့ပြောင်းလုပ်သား ရေမဆေးကျောက် ရှာဖွေသူတွေကြား နေ့စဉ်စားဝတ်နေရေး အကြပ်အတည်းတွေနဲ့ ရင်ဆိုင်နေကြရတဲ့အခြေအနေဖြစ်နေလို့ ဝိုင်းဝန်း ကူညီပေးနေကြတယ်လို့ ဖားကန့်အမတ်က ဆက်ပြောပြပါတယ်။

" ဒီLock Down ဧရိယာမှာရှိတဲ့ လူဦးရေကလည်း အင်မတန်မှ များတယ်။ကျနော်တို့အုပ်စု ရွာပေါင်း ၂၀ကျော်ထဲက အခုလက်ရှိပိုးတွေ့နေတာက ၇ရွာ ၈ရွာလောက်ဖြစ်နေပြီ။ အဲ့တော့ ကျန်တဲ့ရွာတွေကိုပါ ဆက်မကူးစက်ရအောင် ကိုယ့်ရွာနဲ့ကိုယ် တာဝန်ယူပြီးတော့မှ ကျနော်တို့မောင်းတံဂိတ်လေးတွေ ထားတယ်။ ကျန်းမာရေးကိစ္စနဲ့ အရေးပေါ်ကိစ္စကနေလွဲလို့ အပြင်မထွက်ဖို့၊ ဈေးတွေကနေ ရောဂါပိုးဖြန့်တာမျိုး မဖြစ်အောင် ဘယ်လိုထိန်းချုပ်ကြမလဲဆိုတာ ကျနော်တို့ဒီနေ့ ဆွေးနွေးကြတယ်။ ရပ်မိရပ်ဖတွေ တိုက်နယ်ဆရာဝန် ကျန်းမာရေးမှူး အကုန်လုံးပေါ့ဗျာ အဓိက လုံးခင်းအတွက် ဘယ်လိုလုပ်ကြမလဲဆိုတာ တိုင်ပင်ဆွေးနွေးကြတယ်။"

ဖားကန့်ဒေသထဲ ကိုဗစ်ကူးစက်ပျံ့နှံ့လာရင် ဒေသခံပြည်သူတွေရော ကျောက်စိမ်းတွင်းထဲ ရေမဆေးကျောက်ရှာဖွေသူ ရွှေ့ပြောင်းလုပ်သားတွေပါ သိန်းချီ နေထိုင်နေကြတာမို့ ကူးစက်မှုဖြစ်မှာကို စိုးရိမ်ခဲ့ကြတာပါ။ အခုလိုဖြစ်ပွားလာချိန် အသွားအလာကန့်သတ်မှုတွေ ပိုတိုးလုပ်ဆောင်လာပေမဲ့ စည်းကမ်းလိုက်နာမှု အရေးယူဆောင်ရွက်မှုကတော့ အတော်ကို အားနည်းနေတယ်လို့ ဖားကန့်ဒေသခံ သတင်းသမားကိုဇော်မိုးထက်ကပြောပါတယ်။

" ကျနော်တို့ ဖားကန့်က ရွှေ့ပြောင်းလုပ်သားများတာကိုး ရွှေ့ပြောင်းလုပ်သမားများတဲ့အပြင် ပိတ်မိနေသလိုဖြစ်နေတာပေါ့အထူးသဖြင့် ဆိုးတာက ကျောက်ဝိုင်းတွေပေါ့။

အခုနောက်ပိုင်းSecond Wave မှာ အများဆုံးဖြစ်သွားတဲ့ပြဿနာက ကျောက်ဝိုင်းပဲ။ အခုလက်ရှိ ကူးစက်နေတာက ညကျောက်ဝိုင်းတွေကြောင့် အဲ့လောက်ဖြစ်သွားတာ။ အစိုးရကလည်း ဒီကိစ္စအပေါ် ပြတ်ပြတ်သားသား ကိုင်တွယ်ဖြေရှင်းတာမရှိဘူး။ ပြောချင်တာက ပြတ်ပြတ်သားသား အရေးယူဆောင်ရွက်တာမရှိဘူး။ KTV ကဆိုလည်း ပိုးတွေ့လူနာရှိတယ် ဒီအပေါ်မှာလည်း အရေးယူတာမရှိဘူး။ဒီတော့ ပြည်သူတဦးချင်းစီကပဲ ကိုယ့်အသိစိတ်နဲ့ကိုယ် ထိန်းထိန်းသိမ်းသိမ်းလုပ်မှပဲ ကျနော်တို့ ဖားကန့်အတွက်တော့ အဆင်ပြေမယ်ထင်တယ်။ဖားကန့်မှာ တူးဖော်ရေးလုပ်ငန်းတွေလည်း နားထားတယ် ဆိုတော့ အဲ့တော့ ဒီအထဲကလူတွေအနေနဲ့တော့ ကျပ်တည်းကြလိမ့်မယ် ဒီကိုဗစ်နဲ့ ပတ်သက်ပြီး သူတို့ကိုင်တွယ်ပုံတွေကတော့ဖားကန့်အနေနဲ့ တော်တော်လေးကို လျော့တိလျော့ရဲ နိုင်တယ်ဗျ။"

ကချင်ပြည်နယ်တပြည်နယ်လုံးအတိုင်းအတာနဲ့ဒီဇင်ဘာလ ၁၄ရက်နေ့ ည ၇နာရီ နောက်ဆုံးသတင်းထုတ်ပြန်ချက်အရ ဓာတ်ခွဲစမ်းသပ်စစ်ဆေးမှုပေါင်း ၂၉၆၁၇ ဦးမှာ ၄၂၇ဦးအထိ ပိုးတွေ့ရှိပါတယ်။ဒီအထဲမှာမှ ဖားကန့်ဒေသက ၂၇၈ဦးတွေ့ရှိတဲ့အတွက် ကချင်ပြည်နယ်တွင်း ကိုဗစ်ပိုးတွေ့လူနာအများဆုံးဒေသဖြစ်ပါတယ်။

VOA News