ကမ္ဘာတဝန်း ကိုဗစ်ကူးစက်သူ ၆၅ သန်းကျော်အနက် သန်း ၄၀ ကျော် ပြန်လည်ကျန်းမာ
ကမ္ဘာတဝန်းမှာ စနေနေ့ထိ ကိုရိုနာဗိုင်းရပ်စ် ကူးစက်ခံထားရသူ ၆၆ သန်းနီးပါးကို ရောက်ရှိခဲ့ပြီး ဒီကူးစက်ခံရသူတွေထဲက အနည်းဆုံး ၄၂ သန်းလောက် ပြန်လည် ကျန်းမာလာပြီလို့ သုံးသပ်ထားပါတယ်။
ပြီးခဲ့တဲ့နှစ် ဒီဇင်ဘာလကုန်ပိုင်းက တရုတ်မှာ စဖြစ်ခဲ့တဲ့ ကိုရိုနာဗိုင်းရပ်စ်ကြောင့် သေဆုံးသူ အနည်းဆုံး ၁ သန်းခွဲကျော် ရှိခဲ့ကြောင်း AFP ရဲ့ မှတ်တမ်းတွေက ဖော်ပြပါတယ်။
ရုရှားမှာတော့ မြို့တော် မော်စကိုမှာ ကိုရိုနာဗိုင်းရပ်စ် ကာကွယ်ဆေးထိုးပေးမယ့် ဆေးခန်း ၇၀ ဖွင့်လှစ်ထားပြီး ကူးစက်နိုင်ခြေ အန္တရာယ်အများဆုံး ရှိသူတွေကို စပြီး ကာကွယ်ဆေး ထိုးပေးနေပါပြီ။
အမေရိကန်ပြည်ထောင်စုမှာတော့ ၂၄ နာရီအတွင်း COVID-19 ဖြစ်ပွားသူ ၂၁၀,၀၀၀ ထိ စံချိန်တင် ရောက်ရှိခဲ့တယ်လို့ Johns Hopkins တက္ကသိုလ်ရဲ့ စာရင်းတွေက ဖော်ပြပါတယ်။
အာဂျင်တီးနားမှာ ကိုရိုနာဗိုင်းရပ်စ် တိုက်ဖျက်ရေးလုပ်ငန်းတွေ၊ နောက် ချို့တဲ့သူတွေနဲ့ လုပ်ငန်းငယ်တွေကို အကူအညီပေးရေးအတွက် နိုင်ငံရဲ့ အချမ်းသာဆုံးပုဂ္ဂိုလ် ၁၂,၀၀၀ ထံကနေ အခွန်ကောက်ရေး အထက်လွှတ်တော်က အတည်ပြုပေးလိုက်ပါတယ်။
အင်္ဂလန် Premier League ဘောလုံးပွဲတွေကို စနေနေ့က ပြန်ပြီး ကျင်းပတာမှာ ပွဲကြည့်ပရိသတ်အနေနဲ့ အလွန်အကျူး သီချင်းမဆိုကြဖို့၊ တယောက်နဲ့တယောက် ပွေ့ဖက်တာတွေ မလုပ်ကြဖို့ သတိပေးထားပါတယ်။
VOA News