ဂျပန်ဝန်ကြီးချုပ်သစ်ကို ပထမဦးဆုံး သွားရောက်တွေ့ဆုံမည့် နိုင်ငံခေါင်းဆောင် သြစတြေးလျဝန်ကြီးချုပ်
သြစတေးလျဝန်ကြီးချုပ် Scott Morrison နောက်သီတင်းပတ်တွင်း ဂျပန်နိုင်ငံ Tokyo မြို့ကိုသွားရောက်ပြီး ဂျပန် ဝန်ကြီး ချုပ် Yoshihide Suga နဲ့ တွေ့ဆုံဆွေးနွေးဖို့ရှိပါတယ်။ တရုတ်နိုင်ငံနဲ့ ဆက်ဆံရေး တင်းမာနေချိန်မှာ ဂျပန်နိုင်ငံကို အခုလို သွားရောက်မှာ ဖြစ်ပါတယ်။
ဂျပန်ခရီးစဉ်နဲ့ ပတ်သက်ပြီး ဝန်ကြီးချုပ် Suga ရာထူးရယူပြီးနောက် ပထမဆုံး ပြည်ပ ခေါင်းဆောင်တစ်ဦးအဖြစ် တရားဝင် လည်ပတ်နိုင်မှာ ဖြစ်လို့ ဂုဏ်ယူဝမ်းမြောက်ရပါတယ်လို့ ဝန်ကြီးချုပ် Scott Morrison ကပြောပါတယ်။
အခုနောက်ပိုင်းနှစ်တွေအတွင်း ဂျပန်နဲ့ သြစတေးလျ နှစ်နိုင်ငံကြား ဆက်ဆံရေး တစထက်တစ ပိုပြီး ခိုင်မာအားကောင်းလာတယ် လို့လည်း Morrisonကပြောပါတယ်။
ကုန်သွယ်ရေး၊ လုံခြုံရေးနဲ့ ကာကွယ်ရေး ကိစ္စရပ်တွေကို ရည်ညွှန်းပြောကြားရင်း ဒေသတွင်း ကိစ္စရပ်အတော်များများမှာ ဂျပန်နိုင်ငံ က အရေးပါတဲ့ လက်တွဲဖော်နိုင်ငံ ဖြစ်တယ်လို့လည်း သူကပြောပါတယ်။
ဂျပန်မီဒီယာတွေကတော့ ဒေသတွင်း တရုတ်ရဲ့ စစ်ရေးအရ ကြီးထွားလာနေတာကို တုန့်ပြန်ဖို့ နှစ်နိုင်ငံ ကာကွယ်ရေးစာချုပ်တရပ် လက်မှတ်ရေးထိုးဖို့ ပြင်ဆင်ထားတယ်လို့ ပြောနေကြပါတယ်။
လောလောဆယ် အချိန်မှာ သြစတေးလျနဲ့ တရုတ် နှစ်နိုင်ငံအကြား ဆက်ဆံရေး တင်းမာနေပါတယ်။ ပြီးခဲ့တဲ့ လတွေက စတင်ပြီး တရုတ်နိုင်ငံက သြစတေးလျ ထွက်ကုန်တွေအပေါ်မှာသွင်းကုန်ခွန်တွေ ပိုမိုတိုးမြှင့်ကောက်ခံတာနေ တာပါ။
အခုခရီးစဉ်က ကိုရိုနာဗိုင်းရပ်စ်ကပ်ရောဂါစဖြစ်ပြီးနောက်ပိုင်း ဝန်ကြီးချုပ် Scott Morrison အတွက် ပထမဆုံး ပြည်ပခရီးစဉ်ဖြစ်ပါတယ်။
ဂျပန်က ပြန်လာတဲ့အခါ သီးခြားစောင့်ကြည် quarantine ၁၄ ရက်ဝင်သွားမယ်လို့ ဝန်ကြီးချုပ် Morrison ကပြောပါတယ်။ သီးခြားခွဲနေတဲ့အချိန်အတွင်း ဗွီဒီယိုကနေတဆင့် ပါလီမန်ကို တက်ရောက်သွားမှာ ဖြစ်ပြီး ဒါဟာ သြစတေးလျ ထိပ်တန်း ခေါင်းဆောင်တယောက်အတွက် ပထမဆုံး ဗွီဒီယိုကနေ ပါလီမန်တက်ရောက်မှာဖြစ်ပါတယ်။
Crd VOA News
ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။