ဂျာမနီမှာ ကိုဗစ်ကူးစက်မှု အလွန်ဆိုးရွားနေ

ဂျာမဏီနိုင်ငံရဲ့ Covid 19 ကပ်ရောဂါ ဖြစ်ပွါးမှုအခြေနေဟာ သိပ်ကိုဆိုးဝါးနေကြောင်းနဲ့ ဗုဒ္ဓဟူးနေ့ကစပြီး နောက်ထပ် တင်းကြပ်တဲ့ ကန့်သတ်မှုတွေအသစ်တွေကို စတင်ချမှတ်မှာ ဖြစ်တဲ့အတွက် ပြည်သူတွေ လိုက်နာကြဖို့ ဂျာမဏီသမ္မတ Frank-Walter Steinmeier က တနင်္လာနေ့မှာ ပန်ကြားလိုက်ပါတယ်။

"ဒီကပ်ရောဂါဒဏ်ခံစားနေရတာ လအတော်ကြာနေပြီဖြစ်သလို ပြီးဆုံးတဲ့အထိလည်း အတူတကွ ဆက်လက်ရင်ဆိုင်ကြမှာ ဖြစ်ကြောင်းနဲ့ ဒါကို ကျော်လွှားနိုင်မှာ ဖြစ်ကြောင်း ဂျာမန်ဘာသာနဲ့ ပြောသွားတာပါ။ အခု ကန့်သတ်မှုတွေဟာ ဂျာမဏီသမိုင်းမှာ အတင်းကြပ်ဆုံး ဖြစ်ပေမယ့် အခြေနေက ဒီလိုကန့်သတ်မှ ဖြစ်မယ့် အခြေနေဖြစ်ကြောင်းလည်း ပြောပါတယ်။

နိုင်ငံတွင်း ဒီရောဂါကူးစက်မှု တဟုတ်ထိုး တိုးလာတာကို ရပ်တံ့စေဖို့အတွက် ဇန်နဝါရီလ ၁၀ ရက်နေ့အထိ သက်ရောက်မယ့် ကန့်သတ်မှုအသစ်တွေချမှတ်မှာ ဖြစ်ကြောင်း ဂျာမဏီဝန်ကြီးချုပ် ကြေညာခဲ့ပြီး နောက်တနေ့မှာပဲ ဂျာမဏီသမ္မတက ပြည်သူကို အခုလို မိန့်ခွန်းပြောကြားခဲ့တာပါ။

မဖြစ်မနေဖွင့်ဖို့ မလိုတဲ့စီးပွါးရေးလုပ်ငန်းတွေ ပိတ်ဖို့နဲ့ လူ ၅ ဦးထက် ပိုမစုဝေး ဖို့ ဝန်ကြီးချုပ်နဲ့ ဂျာမဏီနိုင်ငံက ဒေသ ၁၆ ခုရဲ့ အုပ်ချုပ်ရေးမှုးတွေဟာ တနင်္ဂနွေနေ့မှာ သဘောတူခဲ့ကြတာပါ။

ဂျာမဏီနိုင်ငံမှာ တနင်္လာနေ့မှာပဲ ဒီရောဂါနောက်ထပ် ကူးစက်သူ တသောင်းခွဲကျော်နဲ့ လူ ၂၀၀ နီးပါး သေဆုံးခဲ့ရတာ ဖြစ်ပြီး အခုဆို ဂျာမဏီမှာ သေဆုံးရသူ စုစုပေါင်း ၂ သောင်းကျော်နေပါပြီ။ ဆေးရုံတွေမှာလည်း လူနာတွေ မနိုင်မနင်း အခြေနေရောက်တော့မယ့် သတိပေးချက်တွေ ထုတ်ပြန်ထားပါတယ်။ ဗုဒ္ဓဟူးနေ့က စပြီး နိုင်ငံတဝှမ်းက ကျောင်းတွေနဲ့ မဖြစ်မနေ ဖွင့်စရာမလိုတဲ့ ဆိုင်အားလုံး ပိတ်ထားရတော့မှာ ဖြစ်ပါတယ်။

VOA News