ဂန္တဝင် ဘောလုံးသမားကြီး မာရာဒိုနာရဲ့ နောက်ဆုံးခရီး ကျင်းပပြီးစီး

ကမ္ဘာကျော်ဘောလုံးသမား Diego Maradona ရဲ့ နာရေးအခမ်းအနားကိုတော့ မနေ့ ကြာသပတေးနေ့က ကျင်းပခဲ့ပြီး၊ မြေမြုပ်သဂြိုဟ်ခဲ့ကြပါတယ်။ မိသားစုဝင်တွေနဲ့ သီးသန့်ကျင်းပခဲ့တဲ့ မာရာဒိုနာရဲ့ နာရေးအခမ်းအနားကို လူ ၂ ဒါဇင်ပဲ တက်ရောက်ခဲ့တာဖြစ်ပါတယ်။ Jardin Bella Vista သုဿန်မှာ လုပ်တဲ့ ဒီနာရေးအခမ်းအနားကို မိသားစုဝင်တွေ နဲ့ အလွန်နီးစပ်တဲ့ မိတ်ဆွေသူငယ်ချင်းတွေပဲ တက်ရောက်ခဲ့တာဖြစ်ပါတယ်။ မာရာဒိုနာရဲ့ ရုပ်အလောင်းကိုတော့ သူ့ရဲ့မိဘ ၂ ပါး အုတ်ဂူဘေးမှာ မြှုပ်နှံခဲ့တာဖြစ်ပါတယ်။

အစောပိုင်းတုန်းကတော့ မာရာဒိုနာရဲ့ ရုပ်အလောင်းကို အာဂျင်တီးနားပြည်သူတွေ နောက်ဆုံး နှုတ်ဆက်ဂုဏ်ပြုနိုင်ဖို့အတွက် သမ္မတအိမ်တော်မှာ နိုင်ငံခေါင်းဆောင်တွေကို ဂုဏ်ပြုသလိုမျိုး လုပ်ခဲ့ပြီး လူတွေ သောင်းနဲ့ချီပြီးတက်ရောက် ဂုဏ်ပြုခဲ့ကြပါတယ်။ မနက် ၆ နာရီကနေစပြီး ၁၂ နာရီကြာ အာဂျင်တီးနားပြည်သူတွေ ဂုဏ်ပြုခဲ့ကြပြီးတဲ့နောက် မနေ့ညနေ ၆ နာရီကျော်မှာတော့ မာရာဒိုနာရဲ့ မိသားစုက သူ့ကို မြှုုပ်နှံဖို့ လုပ်ခဲ့တာကြောင့် အတော်များများလည်း နောက်ဆုံးဂုဏ်ပြုနှုတ်ဆက်ခွင့် မရဘဲ ဖြစ်ခဲ့ပါတယ်။ မာရာဒိုနာရဲ့ ရုပ်အလောင်းကို နောက်ဆုံးနှုတ်ဆက်ဖို့ တန်းစီစောင့်နေတဲ့သူတွေကို ရဲတွေက တားဆီးပြီး ပေးမဝင်တော့တာကြောင့် ရဲတွေနဲ့ ပဋိပက္ခတွေဖြစ်ခဲ့ပြီး၊ ပရိသတ်တွေက ရဲတွေကို ခဲတွေနဲ့ပစ်ပေါက်ပြီး ရဲတွေကတော့ ရာဘာကျည်ဆန်တွေနဲ့ ပြန်ပစ်ခတ်တာတွေအထိဖြစ်ခဲ့ပါတယ်။

မာရာဒိုနာရဲ့ ရုပ်အလောင်းသယ်ဆောင်တဲ့ကားကို လုံခြုံရေးတွေ အတော်လေးထူထူထပ်ထပ်ချပြီး သယ်ဆောင်ခဲ့ရပြီး သယ်ဆောင်ခဲ့တဲ့ လမ်းတလျှောက် အာဂျင်တီးနားပြည်သူတွေက အလံတွေကို ဝှေ့ယမ်းပြီး ဂုဏ်ပြုခဲ့ကြပါတယ်။

VOA News