COVID ကူးစက်မှု ဟန့်တားရေး အစွမ်းကုန်လုပ်ဆောင်ဖို့ အတိုင်ပင်ခံပုဂ္ဂိုလ် တိုက်တွန်း

05-Dec-2020

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မြန်မာနိုင်ငံမှာ ကိုဗစ်ကူးစက်မူ တစ်သိန်းနီးပါးအဖြစ် နည်းတဲ့အနေအထားမဟုတ်တော့တာမို့၊ အရင် ရွေးကောက်ပွဲအပြီး လူစုလူဝေးကြောင့်၊ ပျံ့နှံမူတက်လာတာမျိုးမဖြစ်ရအောင်၊ ကာကွယ်ရေး အစွမ်းကုန်လုပ်ကြဖို့ ပြင်းပြင်းထန်ထန် တိုက်တွန်းလိုက်ပါတယ်။

မနေ့က ဒီကိုဗစ်နောက်ဆုံးအခြေအနေ ပြည်သူကိုအစီရင်ခံတဲ့ မိန့်ခွန်းထဲမှာ ဒေါ်အောင်ဆန်းစုကြည်က၊ ရွေးကောက်ပွဲအပြီးမှာ ခုလို ကူးစက်မူတက်လာတာအပြင်၊ မကြာခင် တန်ဆောင်တိုင် အားလပ်ရက် တုန်းကလည်း လူစုလူဝေးတွေထပ်ဖြစ်ခဲ့တာရဲ့ အကျိုးဆက်တွေ ထပ်လာဦးမှာလို့ သတိပေး လိုက်ပါတယ်။

ဒါကြောင့် အခုချိန် ကာကွယ်ဆေးမရနိုင်ခင် လက်ရှိဆောင်းရာသီနဲ့၊ လာတော့မယ့် ခရစ်စမတ် နှစ်ကူးပွဲတော်အားလပ်ရက်မှာလည်း ပိုကူးကုန်မှာစိုးရိမ်ပြီး၊ လူစုလူဝေး မဖြစ်အောင်နေပေးကြဖို့၊ ပြည်သူအားလုံးကို အနူးအညွတ် ခုလို တိုက်တွန်းသတိပေးလိုက်ပါတယ်။

“ဆောင်းတွင်းမှာ အေးလာပြီ၊ အေးလာတဲ့အခါကျတော့ ရောဂါပိုးက ပျံ့လွယ်မယ်ဆိုတာက ကျမတို့ သတိပေးထားပြီးဖြစ်ပါတယ်။ ထပ်မံလည်း သတိပေးပါမယ်။ အခု တန်ဆောင်တိုင်ပိတ်ရက်တွေကတော့ လွန်သွားပြီပေါ့နော် နောက်အခု ခရစ်စမတ်ကာလ ၊ နှစ်သစ်ကူးကာလတွေကို ဦးတည်နေပါတယ်။ အဲဒီအခြေအနေတွေမှာလည်း လူစုလူဝေးမဖြစ်ဖို့ အင်မတန်မှ အရေးကြီးပါတယ်။ လူစုလူဝေး ဖြစ်တာနဲ့အမျှ ရောဂါပိုး ပျံ့တယ်ဆိုတာကိုတော့ ဘယ်လိုမှ ရှောင်လို့မရတဲ့ ကိစ္စပါ ၊ ပျံ့မှာပါပဲ။”

ဒေါ်အောင်ဆန်းစုကြည်ကဆက်ပြီး အခု ကိုဗစ်ကူးစက်မူက ပြည်နယ်တွေတိုင်းတွေမှာလည်း ပြန့်ပွားလာမူ မနည်းတော့တာကြောင့်၊ သေဆုံးသူကလည်း ၂၀၀၀ ကျော်လာကာ၊ အစားထိုးမရတဲ့ သေဆုံးမူတွေ ဆက်မဖြစ်စေချင်သလို၊ နိုင်ငံတော်ဖက်မှာလည်း ခုလိုမလွှဲမလျှောင်သာ လူနာတွေအတွက် ဘတ်ဂျက်ငွေတွေ အများကြီးသုံးနေရတာကြောင့်၊ စီးပွားရေးပြန်နလန်ထူဖို့ ဆုံရှုံးမူတွေဖြစ်လာမှာ စိုးရိမ်တယ်လို့ ဆိုပါတယ်။

ဒါ့အပြင် ကာကွယ်ဆေးအတွက်လည်း အတိုင်းအတာတစ်သာ လှူဒါန်းထောက်ပံ့တာရနိုင်ပြီး၊ အများစုက နိုင်ငံတော်ဘဏ္ဏာထဲကပဲ ဝယ်သုံးရမယ့် အချိန်မှာ၊ ဒီကိုဗစ်လူနာ ပြင်းထန်သူတစ်ဦးအတွက် ကုန်ကျစရိတ်ဟာ လူတစ်ထောင်အထိ ကာကွယ်ဆေးထိုးပေးနိုင်တဲ့ ငွေပမာဏမို့ ကူးစက်မခံရအောင် ဝိုင်းဝန်းကာကွယ်ကူညီပေးကြဖို့လည်း အလေးအနက်တောင်းဆိုလိုက်ပါတယ်။

ခုလိုအချိန်မှာ နိုင်ငံထဲ မနေ့ကတော့ COVID-19 ရောဂါကူးစက်သူ သစ် ၁၅၀၂ ဦးနဲ့၊ သေဆုံးသူ ၃၁ ထပ်တိုးခဲ့တာကြောင့်၊ စုစုပေါင်းပိုးတွေ့သူ ၉၆,၅၂၀ နဲ့၊ သေဆုံးသူပေါင်း ၂,၀၅၉ ဦးရှိလာပြီလို့၊ ကျန်းမာရေးနဲ့အားကစားဝန်ကြီးဌာန ည (၈) နာရီထုတ်ပြန်ချက်မှာ ဖော်ပြထားပါတယ်။

VOA News