အစိုးရနဲ့ ဆန္ဒပြလယ်သမားတွေ ညှိနှိုင်းမှုပျက်ပြား

အိန္ဒိယမှာ ဆန္ဒပြလယ်သမားတွေနဲ့ အစိုးရအကြား ညှိနှိုင်းဆွေးနွေးပွဲတွေ ထပ်ပျက်သွားခဲ့ပြန်ပါတယ်။

ခုလိုပျက်သွားအပြီးမှာ လယ်သမားတွေဘက်ကတော့ အစိုးရ စိုက်ပျိုးရေးဥပဒေသစ်တွေကို ဆက်ဆန့်ကျင်ဆန္ဒပြတာတွေကို တိုးမြှင့်ပြီး နယူးဒေလီမြို့တော် အပြင်ထွက် အဝေးပြေးလမ်းမကြီးတွေကို ဆက်ပိတ်ဆို့ထားမယ်လို့ ကြွေးကြော်လိုက်ပါတယ်။

ဆွေးနွေးညှိနှိုင်းပွဲမှာ အစိုးရဘက်ကနေ သီးနှံဈေးနှုန်း လျှော့ချသတ်မှတ်တဲ့ ဒီဥပဒေထဲ အငြင်းအခုံ ဖြစ်နေတာတချို့ကို ပြင်ဆင်ပေးဖို့ ကမ်းလှမ်းခဲ့ပေမယ့် လယ်သမားတွေဘက်ကတော့ ဒီဥပဒေတခုလုံးကို ဖျက်သိမ်းပေးဖို့ တောင်းဆိုခဲ့ပါတယ်။

လယ်သမားခေါင်းဆောင် Kripal Signh က “အစိုးရက ဒါ ကောင်းတဲ့ဥပဒေလို့ ဆက်တင်းခံနေတယ်။ ဒါပေမယ့် ဒီဥပဒေမှာ အမှားတွေပါနေတာကို ကျနော်တို့ ထပ်ထောက်ပြခဲ့ပါတယ်။ သူတို့ဘက်ကလည်း ငြိမ်သွားတယ်။ ကျနော်တို့ဘက်ကလည်း ဆက်ငြိမ်ဖို့ သန္နိဋ္ဌာန်ချပြီး အခုလို ဒီဥပဒေကို ဖျက်မလား၊ မဖျက်ဘူးလား ဖြေပါလို့ စာသားတွေပါတဲ့ ဆိုင်းဘုတ်တွေ ထောင်ပြနေရတာပါ” လို့ ဟိန္ဒူဘာသာနဲ့ ပြောသွားတာပါ။

ဒါပေမယ့် ရှေ့အပတ် ဗုဒ္ဓဟူးနေ့မှာတော့ နောက်ထပ် ပြန်ဆွေးနွေးကြဖို့ နှစ်ဖက်လုံးက ပြင်ဆင်ထားကြပါတယ်။

ထောင်နဲ့ချီတဲ့ လယ်သမားတွေက ဒီဥပဒေသစ်ကြောင့် သူတို့သီးနှံဈေးနှုန်းတွေ ပျက်ကုန်ပြီး ဝင်ငွေနည်းသွားမယ်လို့ ညည်းညူပြီး နယူးဒေလီမြို့တော် ဆင်ခြေဖုံးက လမ်းမကြီးတွေကို ၁၀ ရက်ကြာ ပိတ်ဆို့ ဆန္ဒပြလာနေခဲ့တာပါ။

ဝန်ကြီးချုပ် Narendra Modi အစိုးရဘက်ကတော့ ဒီဥပဒေသစ်ကြောင့် လယ်သမားတွေအနေနဲ့ ဈေးကွက်မှာ ထွက်ကုန်တွေကို ရောင်းချနိုင်ပြီး ပုဂ္ဂလိက ရင်းနှီးမြှုပ်နှံမှုကနေတဆင့် ထုတ်လုပ်မှု ပိုအားကောင်းလာနိုင်တယ်လို့ ဆိုပေမယ့် လယ်သမားတွေက သူတို့ကို ခုလို ကြိုမတိုင်ပင်ခဲ့ဘူးလို့ ဆိုပါတယ်။

VOA News