အမေရိကန်မှာ Pfizer ကိုဗစ်ကာကွယ်ဆေး ခွင့်ပြု မပြု ဒီနေ့ဆုံးဖြတ်မယ်
အမေရိကန်ပြည်ထောင်စုမှာ ကိုဗစ်ကပ်ရောဂါကြောင့် သေဆုံးသူ တနေ့ထဲ ၃,၀၀၀ ကျော်နဲ့ ဗုဒ္ဓဟူးနေ့က စံချိန်တင်ထားချိန်မှာပဲ Pfizer BioNTech ကိုဗစ်ကာကွယ်ဆေးကို အရေးပေါ် သုံးစွဲခွင့်ပြုသင့်၊ မသင့်ကို အမေရိကန် အစားအသောက်နဲ့ ဆေးဝါးထိန်းချုပ်ရေးဌာန FDA ရဲ့ အထူးအဖွဲ့က ဒီနေ့ကြာသပတေးနေ့မှာ ဆွေးနွေးဆုံးဖြတ်ကြမှာဖြစ်ပါတယ်။
ဗြိတိန်မှာ အစထဲက ဆေးဓာတ်မတည့်တတ်တဲ့အခံရှိသူ ကျန်းမာရေးဝန်ထမ်း ၂ ယောက် ကိုဗစ်ကာကွယ်ဆေးထိုးပြီး ဓာတ်မတည့်တဲ့ တုံ့ပြန်မှုရခဲ့တဲ့အပေါ် ဗြိတိန်တာဝန်ရှိသူတွေ သုံးသပ်စစ်ဆေးနေချိန်မှာ အမေရိကန်ပြည်ထောင်စုမှာ ကာကွယ်ဆေးခွင့်ပြုသင့်၊ မသင့် ဆုံးဖြတ်မှာမို့ ဘေးအန္တရာယ်ကင်းရှင်းရေးဟာ ထိပ်တန်းဦးစားပေးဖြစ်တယ်လို့ ဆုံးဖြတ်မယ့်အဖွဲ့ထဲပါသူ ကျန်းမာရေးပညာရှင်တွေက ပြောပါတယ်။
တချို့သူတွေအပေါ် ကိုဗစ်ကာကွယ်ဆေး သက်ရောက်မှု ရှိ၊ မရှိဆိုတဲ့ကိစ္စကိုလည်း ဆွေးနွေး စဉ်းစားကြမှာဖြစ်ပါတယ်။ တကယ်လို့ ကာကွယ်ဆေးနဲ့ ဇီဝဆေးဝါးဆိုင်ရာ အကြံပြုကော်မတီက Pfizer BioNTech ကာကွယ်ဆေးကို အရေးပေါ် သုံးခွင့်ပြုသင့်တယ်လို့ အကြံပြုခဲ့ရင်တော့ FDA ဌာနက သောကြာ ဒါမှမဟုတ် စနေနေ့ နောက်ဆုံးထားပြီး ကိုဗစ်ကာကွယ်ဆေးကို ခွင့်ပြုမှာဖြစ်ပါတယ်။ အဲဒီအခါကျရင် ပြည်ထောင်စုအစိုးရက ကိုဗစ်ကာကွယ်ဆေး ၆.၄ သန်းကို နိုင်ငံတဝန်းကို ဖြန့်ချီပြီး ထိုးပေးမှာဖြစ်ပါတယ်။
နာမကျန်းဖြစ်နေသူတွေကို ပြုစုစောင့်ရှောက်နေတဲ့ ကျန်းမာရေးဝန်ထမ်းတွေကို ပထမဦးစားပေး ကိုဗစ်ကာကွယ်ဆေးထိုးပေးမှာဖြစ်ပါတယ်။ ပထမပိုင်းမှာ ကိုဗစ်ကာကွယ်ဆေးကို မိမိသဘောဆန္ဒပါမှ ထိုးပေးမှာဖြစ်ပေမဲ့ ကာကွယ်ဆေးလိုင်စင် အပြည့်အဝ ခွင့်ပြုပြီးရင်တော့ လူတိုင်း မဖြစ်မနေ ဆေးထိုးရမှာဖြစ်ပါတယ်။
VOA News