မဟာအံ့ထူးကံသာဆုတောင်းပြည့်မြတ်စွာဘုရားကြီးသည် မန္တလေးတိုင်းဒေသကြီး၊ ပြင်ဦးလွင်မြို့မှ လားရှိုးမြို့သို့အသွားလမ်းပေါ်၊ ရေငယ်ကျေးရွာအလွန်၊ ဓမ္မရတီကုန်းမြင့်နေရာပေါ်တွင် ကြည်ညိုသပ္ပါယ်ဖွယ် တည်ရှိပါသည်။ ပြည်ချစ်ဘုရားဟုလည်း ခေါ်တွင်သော မဟာအံ့ထူးကံသာဆုတောင်းပြည့်မြတ်စွာဘုရားကြီးသည် ဉာဏ်တော်အမြင့် ၁၅ ပေ၊ ဒူးတော်နှစ်ဘက်အကွာအဝေး ၈ ပေ ၆ လက်မနှင့် အလေးချိန် ၁၇ တန်ခန့်ရှိပြီး ကြည်ညိုဖွယ်ရာ ထုဆစ်ပူဇော်ထားသည့် စကျင်ကျောက်ဆင်းတုရုပ်ပွားတော်ဖြစ်ပါသည်။ မဟာအံထူးကံသာဆုတောင်းဘုရားကြီ၏ သမိုင်းအကျဉ်းမှာ မန္တလေးမြို့ အောင်သီဟကျောက်ဆစ်လုပ်ငန်းမှ ယခုဆင်းတုတော်ကြီးကို ရွှေလီမြို့သို့ ပင့်ဆောင်ရန် မော်တော်ယာဉ်ဖြင့် မန္တလေးမှ သယ်ဆောင်လာစဉ် ပြင်ဦးလွင်မြို့နယ် ရေငယ်ကျေးရွာအလွန် မန္တလေး-လားရှိုးကားလမ်း မိုင်တိုင် ၄၇/၁ အရောက်တွင် မော်တော်ယာဉ်တိမ်းမှောက်ပြီး ဆင်းတုတော်ကြီးမှာ ကားပေါ်မှကျ၍ မြေခခဲ့ပါသည်။ ဆင်းတုတော်ကြီး မြေခသည့်ရက်မှာ မြန်မာသက္ကရာဇ် ၁၃၅၈ ခုနှစ် တပေါင်းလပြည့်ကျော် ၁၄ ရက်နေ့ (၁၉၉၇ ခုနှစ် ဧပြီလ ၆ ရက်) တနင်္ဂနွေနေ့ ၁၁ နာရီအချိန်ခန့်ဖြစ်သည်။ ဆင်းတုတော်ကြီးအား ရွှေလီမြို့သို့ ဆက်လက်ပင့်ဆောင်ခြင်းမပြုတော့ပဲ လက်ရှိနေရာတွင် ပူဇော်ရန်ဆောင်ရွက်ခဲ့ရာ ၁၉၉၇ ခုနှစ် မေလ ၉ ရက်နေ့တွင် ဝန်ချီစက်ဖြင့် ပင့်ဆောင်မယူပြီး ၁၉၉၇ ခုနှစ် ဇွန်လ ၅ ရက်နေ့တွင် ယာယီစံကျောင်းသို့ ပင့်ဆောင်အပူဇော်ခံခဲ့သည်။ ဆက်လက်၍ ဆင်းတုတော် အစဉ်အမြဲကိန်းဝပ်စံပယ်တော်မူမည့် ဂန္ဓကုဋိတိုက်စေတီတော် တည်ဆောက်ရေးအတွက် စီစဉ်ဆောင်ရွက်ခဲ့ကြရာ ၁၃၆၁ ခုနှစ် တပေါင်းလပြည့် (၂၀၀၀ ခုနှစ် မတ်လ ၁၉ ရက်) နေ့တွင် ဆင်းတုတော်ကြီးကို ယာယီစံကျောင်းမှ စေတီတော်၏ ဂန္ဓကုဋိတိုက်အတွင်းသို့ ပင့်ဆောင် ပူဇော်နိုင်ခဲ့ပါသည်။ ၁၃၆၁ ခုနှစ် နှောင်းတန်ခူးလဆန်း ၈ ရက် (၂၀၀၀ ခုနှစ် ဧပြီလ ၁၁ ရက်)နေ့တွင် ဗုဒ္ဓဘိသေကအနေကဇာတင်နှင့် မဟာအံ့ထူးကံသာ ဆုတောင်းပြည့်မြတ်စွာဘုရား ဂန္ဓကုဋိတိုက် စေတီတော်ကြီး၏ ရွှေထီးတော် တင်လှူပွဲမင်္ဂလာအခမ်းအနားကို ကျင်းပပြီးစီးခဲ့ပါသည်။ ယခုအခါ မဟာအံ့ထူးကံသာဆုတောင်းပြည့် (ခေါ်) ပြည်ချစ်ဘုရားကြီးသည် အနယ်နယ်အရပ်ရပ်မှ လာရောက်ဖူးမျှော်သူများနှင့် အစဉ်အမြဲ စည်ကားလျက်ရှိပြီး နှစ်စဉ်ဘုရားပွဲတော်များ ကျင်းပလေ့ရှိသကဲ့သို့ တန်ဆောင်မုန်းလ၌လည်း ပြင်ဦးလွင် မီးပုံပျံပွဲတော်ကို စည်ကားသိုက်မြိုက်စွာ ကျင်းပပါသည်။
အားလုံးကိုဘဲကျေးဇူးတင်ပါတယ်။