ပဲခူးမြို့ အနောက်ပိုင်း မဇင်းချောင်းရပ်ကွက် ရွှေသာလျောင်းဘုရားလမ်း ကလျာဏီသိမ်တော်ကြီး၏ တောင်ဘက်အနီးတွင် တည်ရှိသည်။ ဟံသာဝတီပြည့်ရှင် ဓမ္မစေတီမင်းကြီးက ခရစ်နှစ် ၁၄၇၆ ခုနှစ်တွင် ဂိုဏ်းဂဏများ ကွဲပြားနေသော သံဃာထုအား သိက္ခာသစ်တင်၍ သန့်စင်စေရန်အလို့ငှာ ကလျာဏီသိမ်တော်ကြီးကို ဆောက်လုပ်လှူဒါန်းခဲ့သည်။ မင်းကြီးသည် ဟံသာဝတီသား မထေရ်ကြီးများကို တောင်းပန်၍ သက္ကရာဇ် ၈၃၇ ခုနှစ် တပို့တွဲလတွင် သီဟိုဠ်ကျွန်းသို့ စေလွှတ်ကာ သိက္ခာသစ် တင်စေသည်။ မထေရ်ကြီးများသည် သက္ကရာဇ် ၈၃၈ ခုနှစ် ဒုတိယ ဝါဆိုလတွင် မြတ်စွာဘုရား ရေသုံးသပ်တော်မူခဲ့သော ကလျာဏီမြစ်၌ မဟာဝိဟာရဝါသီဂိုဏ်းမြတ်၏ အဆက်အနွယ်ဖြစ်သော ရဟန်းသံဃာတော်များထံမှ ရဟန်းအဖြစ် ထပ်မံခံယူလျက် နတ်တော်လဆန်း ၈ ရက် တနင်္ဂနွေနေ့တွင် ဟံသာဝတီသို့ ပြန်ရောက်လာ၍ ကလျာဏီသိမ်ကို သမုတ်ကြသည်။ ယင်းကို အကြောင်းပြု၍ ဓမ္မစေတီမင်းကြီးက ကလျာဏီသိမ်တော်ကြီးအနီးတွင် ကျောက်စာစိုက်ထူထားရာ ကလျာဏီကျောက်စာဟု အမည်တွင်သည်။ ထိုကျောက်စာကို ပါဠိဘာသာနှင့် မွန်ဘာသာများဖြင့် ရေးထိုးထားသည်။ ကျောက်စာတိုင်အမြင့် ၇ ပေ၊ အကျယ် ၄ ပေ ၂ လက်မ၊ထု ၁ ပေ ၃ လက်မ၊ ၂ မျက်နှာစီရေး၊ တစ်မျက်နှာလျှင် စာကြောင်းရေ ၇၀ ရှိ၍ တစ်လက်မအလျားတွင် စာလုံး ၃ လုံးစီဝင်အောင် ရေးထိုးထားသည်။ မြောက်ဘက် ကျောက်စာတိုင် ၃ ချပ်တွင် ပါဠိဘာသာကို မြန်မာအက္ခရာဖြင့် ရေးထိုးသည်။ တောင်ဘက် ကျောက်စာတိုင် ၇ ချပ်တွင် ပါဠိဘာသာ ကျောက်စာ ၃ ချပ် ၏ အဓိပ္ပာယ်ကို မွန်ဘာသာဖြင့် ရေးထိုးထားသည်။ ယင်းကျောက်စာချပ်များတွင် မဇ္ဈိမဒေသ သာသနာဝင်၊ ပုဂံသာသနာဝင်၊ဟံသာဝတီ သာသနာဝင်၊ ကလျာဏီသိမ်သမုတ်ခြင်းအကြောင်း၊ ရာမညတိုင်းစေတီသမိုင်း၊ ရွှေမော်ဓောစေတီသမိုင်းတို့ကို ရေးထိုးထားသည်။ ကလျာဏီကျောက်စာတွင် ရေးထိုးထားသည့် ပါဠိစာသားများကို တောင်တွင်းကြီးဆရာတော် ခင်ကြီးဖျော်က မြန်မာဘာသာသို့ ပထမဆုံးပြန်ဆိုခဲ့သည်။ မြန်မာသက္ကရာဇ် ၁၁၁၁ ခုနှစ်တွင် တန့်ကြည့်တောင် အနောက်တောင်မြင့်ရွာ သုံးထပ်ကျောင်းဆရာတော် အရှင်ဓမ္မစာရီမထေရ်က မြန်မာဘာသာ နိဿယပြန်ဆိုခဲ့သည်။ ၁၃၀၀ ပြည့်နှစ်တွင် ရန်ကုန်မြို့၊ ဘုရားဖြူကျောင်းတိုက် ဆရာတော်အရှင်ရာဇိန္ဒက ကလျာဏီကျောက်စာကို မြန်မာနိဿယ ပြန်ဆိုခဲ့သည်။
