ပရိသတ် အချစ်တော် လူရွှင်တော်ဧရာ ကွယ်လွန်
ရန်ကုန် ဒီဇင်ဘာ ၁၉
ပရိသတ်များကို ပျော်စေသူ၊ မျိုးဆက်သစ်လူရွှင်တော် မြောက်မြားစွာကို မွေးထုတ်ပေးခဲ့သူ သရုပ်ဆောင်၊ လူရွှင်တော် ဧရာ(ဦးဧရာမြိုင်)သည် ယနေ့နံနက် ၃ နာရီ ၃၉ မိနစ်က ရန်ကုန်ပြည်သူ့ဆေးရုံကြီး၌ ကွယ်လွန်သွားခဲ့ ကြောင်း သိရပြီး ယနေ့တွင်ပင် သင်္ဂြိုဟ်ပြီးစီးကြောင်း မိသားစုဝင်တစ်ဦးက ပြောပြသည်။
နို၀င်ဘာ၂၉ ရက် ညနေက နေအိမ်၌ရှိစဉ် အောက်ဆီဂျင် ထိုးကျလာသည့်အတွက် ရန်ကုန်ပြည်သူ့ဆေးရုံကြီး သို့ တင်ပို့ခဲ့ရခြင်းဖြစ်ကြောင်း သိရသည်။ ဆေးရုံကြီး တွင် ထပ်မံစစ်ဆေးချက်အရ ကိုဗစ်-၁၉ ရောဂါပိုးတွေ့ရှိရ သည့်အတွက် အထူးကြပ်မတ်ဆောင်တွင် စောင့်ရှောက်ဆေးကုသမှုခံယူခဲ့ရသည်။
လူရွှင်တော်ဧရာကို ကြည့်မြင်တိုင်မြို့နယ်၌ ဖခင် ဦးထွန်းရင်-မိခင်ဒေါ်ခင်မာရီတို့က ၁၉၆၀ ပြည့်နှစ် နို၀င်ဘာ ၂၀ ရက်တွင် မွေးဖွားခဲ့သည်။ မွေးချင်းခြောက်ယောက်အနက် တတိယမြောက်ဖြစ်သည်။
အနုပညာလောကသို့ ကြည့်မြင်တိုင်မြို့နယ် ပန်းတဉ်းတန်း အရုဏ်တော်ဝတ်အသင်းကြီး၏ ရွှေပြား သင်္ကန်းတော်များ လှည့်လည်ပူဇော်ပွဲအခမ်းအနား အက ဝိုင်းများမှ စတင်ပါဝင်လာခဲ့ပြီး “ပန်းတဉ်းမောင်”၊ "ယဉ်ကျေးမောင်အကအဖွဲ့”များတွင် အရပ်အပျော်တမ်း လူရွှင်တော်များဖြစ်သည့် ဦးသာလှ(ကွယ်လွန်)၊ ဦးဝင်းမောင်(ကွယ်လွန်)တို့နှင့်တွဲ၍ နယ်ပွဲများတွင်လှည့်လည် ကပြခဲ့ကြသည်။ ထို့နောက် “ခင်မာချို”အငြိမ့်အဖွဲ့တွင် ယနေ့အောင်မြင်နေသော သရုပ်ဆောင်လူရွှင်တော် ကျော်ထူးနှင့်တွဲ၍ စတင်ဝင်ရောက်ခဲ့ကြောင်း မိသားစုဝင် တစ်ဦး၏ပြောပြမှုအရ သိရသည်။
အငြိမ့်လောကတွင် ကျော်ထူး၊ ဧရာ၊ အောင်ပန်း (ကွယ်လွန်)တို့နှင့် အတွဲများခဲ့ကြသည်။ မြဝတီရုပ်မြင်သံကြား တွင် “လူရွှင်တော်ရွှေဖလား”အစီအစဉ်ဖြင့် မျိုးဆက်သစ် လူရွှင်တော်မြောက်မြားစွာကို မွေးထုတ်ပေးခဲ့သည်။ ရုပ်မြင် သံကြားကြော်ငြာကဏ္ဍတွင် သရုပ်ဆောင်မျိုးသန္တာထွန်း နှင့်တွဲ၍ရိုက်ခဲ့သော “ကေသီပန်သွေးပုပ်ချဆေး”ကြော်ငြာ မှာရေပန်းစားခဲ့သောကြော်ငြာတစ်ခုဖြစ်ခဲ့သည်။ စာပေ လောကအတွက် “နွားကျောင်းသား အိပ်မက်တစ်ဆယ့် ခြောက်ချက်” နှင့် “ဟင်းချက်မစားတဲ့ရပ်ကွက်” စာအုပ် နှစ်အုပ်ကို ရေးသားထုတ်ဝေခဲ့သည်။ ကွယ်လွန်ချိန်၌ ဇနီးဖြစ်သူ ဒေါ်ခင်သီတာမြင့်၊ သမီး ယမုံခင်(ခ)ဝိုင်းချစ်နှင့်မြေးမောင်အာဂတို့ ကျန်ရစ်ခဲ့ကြသည်။
တင်ဝင်းတင်
ဓာတ်ပုံ-ဧရာဖေ့စ်ဘွတ်