မြန်မာဗိုလ်လောင်းတချို့ အိန္ဒိယစစ်တက္ကသိုလ်က သင်တန်းဆင်း
မြန်မာဗိုလ်လောင်းတချို့ စနေနေ့က အိန္ဒိယ စစ်တက္ကသိုလ်ကနေ သင်တန်းဆင်းပါတယ်။ အိန္ဒိယစစ်တက္ကသိုလ်မှာ တနှစ်ကြာ သင်တန်းတက်ခဲ့ကြတဲ့ အာဖဂန်နစ္စတန်၊ ဘူတန် အပါအဝင် နိုင်ငံတကာ ဗိုလ်လောင်း ၇၀ သင်တန်းဆင်းတဲ့အထဲမှာ မြန်မာဗိုလ်လောင်းတွေ ပါဝင်ခဲ့တာပါ။
အိန္ဒိယဗိုလ်လောင်း ၃၂၅ ဦးနဲ့အတူ သင်တန်းဆင်းတဲ့ အာဖဂန်နစ္စတန် ကြည်းတပ်ဗိုလ် Taubish က သင်တန်းဆင်းပွဲမှာ “နိုင်ငံအတွက်လည်း ဂုဏ်ယူသလို သူတို့ကို လေ့ကျင့် သင်တန်းပေးတဲ့အတွက် အိန္ဒိယကိုလည်း ကျေးဇူးတင်ကြောင်း” ပြောသွားတာပါ။
အိန္ဒိယနိုင်ငံ Uttarakhand ပြည်နယ် Dehradun က အိန္ဒိယစစ်တက္ကသိုလ် IMA ကနေ ဒီနှစ် သင်တန်းဆင်းတဲ့ နိုင်ငံခြားဗိုလ်လောင်း ၇၀ ကျော်မှာ အာဖဂန်နစ္စတန်က အများဆုံးဖြစ်ပါတယ်။
စနေနေ့ကကျင်းပတဲ့ အိန္ဒိယစစ်တက္ကသိုလ် သင်တန်းဆင်းပွဲကိုတော့ အိန္ဒိယ ကြည်းတပ် ဒုတိယအကြီးအကဲ ဒုတိယဗိုလ်ချုပ်ကြီး S.K Saini တက်ရောက်ပါတယ်။
၁၉၃၂ ခုနှစ်က စတင်တည်ထောင်တဲ့ အိန္ဒိယစစ်တက္ကသိုလ်က အဓိကအားဖြင့် အိန္ဒိယကြည်းတပ် အရာရှိတွေကို လေ့ကျင့်ပေးတာဖြစ်ပြီး ပြည်ပနိုင်ငံတွေက ဗိုလ်လောင်းတွေကိုလည်း လက်ခံ လေ့ကျင့်ပေးနေတာပါ။ အခုအချိန်ထိ မြန်မာအပါအဝင် ပြည်ပနိုင်ငံတွေက ဗိုလ်လောင်း ၃,၀၀၀ ကျော် သင်တန်းဆင်းခဲ့ပြီး ဖြစ်ပါတယ်။
VOA News