မန္တလေးတိုင်း ရွေးကောက်ပွဲကော်မရှင်အဖွဲ့ခွဲ ရုံး တစ်ခုလုံး ကိုဗစ် ကူးခံရ
မန္တလေးတိုင်း ရွေးကောက်ပွဲကော်မရှင်အဖွဲ့ခွဲရုံး တစ်ခုလုံးမှာ ကိုဗစ်-၁၉ အတည်ပြုလူနာ တွေ့ရှိတာမှန်ကန်တယ်လို့ တိုင်းကော်မရှင် အတွင်းရေးမှူး ဦးကျော်ကျော်စိုးက ဘီဘီစီ ကို ပြောပါတယ်။
"တိုင်းစာရင်းစစ်က စတွေ့တာ၊ ရွေးကောက်ပွဲ ရလဒ်တွေလာပြီး စစ်ပေးတာ၊ အဲ့ကနေ စတာပေါ့ တရုံးလုံးဖြစ်သွားတာ။ ဒီနေ့ Swab ယူတာ ဒီနေ့တွေ့တာပဲ"လို့ ဦးကျော်ကျော်စိုးက နိုဝင်ဘာ ၁၆ ရက် နေ့ခင်းပိုင်းက ပြောပါတယ်။
မန္တလေးတိုင်း ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးရှိန်ဝင်းကတော့ ကျန်သူတွေနဲ့ ထိတွေ့မှု မရှိဘူးလို့ ဆိုပါတယ်။
"အဲ့ဒီ စဖြစ်တဲ့လူနာနဲ့က ထိတွေ့မှုလည်း မရှိဘူးခဲ့ပါဘူး။ တိုင်းရုံးကိုလည်း ခဏပဲ လာပြီး ပြန်တာပါ"လို့ ဥက္ကဋ္ဌ ဦးရှိန်ဝင်းက ပြောပါတယ်။ လက်ရှိမှာတော့ ဦးရှိန်ဝင်းဟာ အိမ်မှာ သီးခြား စောင့်ကြည့်မှု ခံယူနေတယ်လို့ သိရပါတယ်။
တိုင်းကော်မရှင်ရုံးမှာ စာရင်းစစ် အဖွဲ့က ရွေးကောက်ပွဲရလဒ်စစ်ဆေးတွက်ချက်နေရင်း အဖွဲ့ဝင် တစ်ဦးဟာ ၁၃ ရက် နေ့မှာ ဖျားနာမှု စတင်ခဲ့တာဖြစ်ပါတယ်။ ဒီနောက်မှာမှ ကိုဗစ်-၁၉ အတည်ပြုလူနာ ဖြစ်လာပြီး အဖွဲ့ခွဲအားလုံးကို Swab ယူစစ်ဆေးရာမှ ၆ ယောက် ထပ်မံ ပိုးတွေ့ရှိခဲ့တာဖြစ်ပါတယ်။
မန္တလေးတိုင်းမှာ ရွေးကောက်ပွဲပြီးနောက် တစ်ပတ်အတွင်း ကိုဗစ်-၁၉ အတည်ပြုလူနာပေါင်း ငါးရာကျော် တွေ့ရှိထားပါတယ်။ နိုဝင်ဘာ ၁၅ရက်ထိ တိုင်းအတွင်း ကိုဗစ်-၁၉ အတည်ပြုလူနာပေါင်း ၃,၁၇၁ ဦးဖြစ်ပြီး သေဆုံးသူ ၁၈ ယောက် ရှိပြီ ဖြစ်ပါတယ်။
ဓာတ်ပုံ - တာရာ
ဘီဘီစီမြန်မာပိုင်း
ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။