လကမ္ဘာပေါ် ပထမဆုံး ဆယ်လူလာဆက်သွယ်ရေးကွန်ရက် တည်ဆောက်မည်

Finland အခြေစိုက် Nokia ကုမ္ပဏီကို လကမ္ဘာပေါ်မှာ ပထမဆုံး cellular network ဆက်သွယ်ရေး ကွန်ယက် တည်ဆောက်ဖို့ အမေရိကန်အာကာသစူးစမ်း လေ့လာရေးအဖွဲ့ NASA နာဆာက ရွေးချယ်ခဲ့တယ်လို့ Nokia က တနင်္လာနေ့မှာ ပြောပါတယ်။

နာဆာရဲ့ Artemis အစီအစဉ် အရ လကမ္ဘာပေါ်ကို ၂၀၂၄ မှာ လူသားတွေ ပြန်သွားနိုင်ရေးနဲ့ လပေါ်မှာ ရေရှည် အခြေချ နေထိုင်ဖို့ တည်ဆောက်ရေးတွေ လုပ်ဆောင်ရာမှာ ဒီဆက်သွယ်ရေး ကွန်ယက် ထူထောင်ဖို့လည်း ပါဝင်ပါတယ်။

လူသားတွေ လပေါ်ပြန်မသွားခင် အာကာသထဲမှာ ပထမဆုံး ကြိုးမဲ့ broadband ဆက်သွယ်ရေးစနစ် တပ်ဆင်နိုင်ဖို့ ၂၀၂၂ မှာ လမျက်နှာပြင်ပေါ်မှာ တည်ဆောက်မှာ ဖြစ်ကြောင်း Nokia က ပြောပါတယ်။

Nokia ဟာ အမေရိကန်နိုင်ငံ Texas အခြေစိုက် အာကာသယာဉ်တည်ဆောက်တဲ့ Intuitive Machines ပုဂ္ဂလိက ကုမ္ပဏီ နဲ့ လက်တွဲလုပ်ဆောင်မှာ ဖြစ်ပြီး သူတို့ရဲ့ လဆင်းယာဉ်နဲ့ ဆက်သွယ်ရေးကွန်ယက် အတွက် တပ်ဆင်မယ့် ပစ္စည်းကရိယာတွေကို ပို့မှာ ဖြစ်ကြောင်း ပြောပါတယ်။

လပေါ်ရောက်သွားတဲ့ ပစ္စည်းတွေက ဒီကွန်ယက်အဖြစ် အလိုအလျှောက် တပ်ဆင်ကြမှာ ဖြစ်သလို LTE (Long-Term Evolution) လို့ခေါ်တဲ့ လပေါ်က ပထမဆုံး ဆက်သွယ်ရေးစနစ်ကို ထူထောင်ပေးမှာ ဖြစ်ကြောင်းလည်း Nokia ကပြောပါတယ်။

ဒီဆက်သွယ်ရေး ကွန်ယက်ကနေ အသံနဲ့ အမိန့်ပေးထိန်းချုပ်တာ၊ လပေါ်သွားယာဉ်တွေကို အဝေးက ထိန်းချုပ်တာ၊ လမ်းညွှန်တာနဲ့ HD ဗွီဒီယို တွေ ထုတ်လွှင့်ပေးတာတွေ အပါအဝင် ဆက်သွယ်ရေးဆိုင်ရာ အချက်လက်မျိုးစုံကို လုပ်ပေးနိုင်မှာ ဖြစ်ကြောင်း လည်း Nokia က ပြောပါတယ်။

Crd VOA