ကိုဗစ်စစ်ပြီးမှ စင်္ကာပူသွားတဲ့ မြန်မာ ၁၀ ဦး ထပ်စစ်တာမှာ ကိုဗစ်ကူးထားကြောင်းတွေ့

စင်္ကာပူနိုင်ငံကို မကြာသေးခင်က ရောက်လာသူတွေထဲက မြန်မာနိုင်ငံသား ၁၀ ယောက်မှာ ကိုဗစ်ကပ်ရောဂါ ကူးစက်မှု တွေ့ရှိကြောင်း စင်္ကာပူကျန်းမာရေး ဝန်ကြီးဌာနက သတင်းထုတ်ပြန်လိုက်တဲ့အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မအေးအေးမာက သတင်းပေးပို့ထားပါတယ်။

ကိုဗစ်ကပ်ရောဂါ ကူးစက်တွေ လျော့ကျလာနေပြီး ပြည်တွင်းမှာ ကူးစက်မှု မရှိတော့တဲ့ စင်္ကာပူနိုင်ငံမှာ ဒီရက်ပိုင်းအတွင်း မြန်မာနိုင်ငံသားတချို့ အပါအဝင် ပြည်ပက ရောက်လာသူတွေမှာ ရောဂါပိုးကူးစက်နေတာ တွေ့ရှိခဲ့တာပါ။ စင်္ကာပူ ကျန်းမာရေးဝန်ကြီးဌာနရဲ့ ထုတ်ပြန်ချက်အရ ပြည်ပက ရောက်လာသူတွေထဲက ရောဂါကူးစက်သူအဖြစ် အတည်ပြုစစ်ဆေးတွေ့ရှိသူ ၁၈ ယောက်မှာ မြန်မာနိုင်ငံသား ၁၀ ယောက် ပါဝင်နေပါတယ်။ အိမ်အကူ အလုပ်သမား အများစု ပါဝင်တဲ့ မြန်မာနိုင်ငံသားတွေဟာ စင်္ကာပူနိုင်ငံ မလာခင်မှာ ကိုဗစ်ရောဂါပိုး ကင်းရှင်းကြောင်း အတည်ပြုချက် ရထားသူတွေ ဖြစ်ပေမဲ့ စင်္ကာပူနိုင်ငံမှာ ထပ်မံစစ်ဆေးရာမှာ ကူးစက်ခံထားရတာကို တွေ့ရှိခဲ့ရတာလို့လည်း စင်္ကာပူနိုင်ငံ ကမ်းလွန်ရေနံလုပ်ငန်း Sembcorp Marine မှာ လုပ်ငန်းခွင်ဘေးကင်း လုံခြုံရေးနဲ့ ကျန်းမာရေးဌာနမှူး တာဝန်ယူထားတဲ့ ဦးတင်မင်းက ပြောပါတယ်။

"မြန်မာကျန်းမာရေးနဲ့ အားကစားဝန်ကြီးဌာနက rapid test covid စစ်ပေးတယ်။ ၇၂ နာရီအတွင်း စစ်ပေးတယ်။ အဲ့ဒါ တဦးမှ မရှိဘူး။ အခုရောက်နေတဲ့သူတွေက အားလုံးစစ်ပြီးသားလူတွေ... မြန်မာပြည်မှာ အားလုံး Negative သမားတွေ ပြထားပြီးသားလူတွေ ဒီရောက်မှ positive ပြလဲ မသိဘူး။ အကြောင်းအမျိုးမျိုးကြောင့်ပေါ့... ဒီကလေးတွေ အားလုံးကတော့ ဟိုးတပတ်သောကြာက ရောက်လာတဲ့သူတွေ ဒီထဲမှာပဲ ၁၀ ယောက်က မြန်မာတွေလို့ ပြောတယ် မနေ့က ရလဒ်အရ ၁၈ ယောက် ကူးစက်တာ၊ ၁၀ယောက်က မြန်မာတွေ ဖြစ်တယ်။ ၂ ယောက်က အလုပ်လုပ်ခွင်ရထားတဲ့ ပါမစ်သမားတွေ ၈ ယောက်က အိမ်အကူတွေလို့ သိရပါတယ်။"

မနေ့တုန်းက ရောဂါကူးစက်သူတွေအဖြစ် အတည်ပြုခဲ့သူ ၁၈ ယောက်မှာတော့ မြန်မာနိုင်ငံအပြင်၊ ကပ်ရောဂါ ကူးစက်မှုတွေ မြင့်တက်နေတဲ့ အိန္ဒိယ၊ ရုရှား၊ အင်ဒိုနီးရှားနိုင်ငံတို့နဲ့ နီပေါ၊ နယ်သာလန်၊ ဆွစ်ဇာလန်နိုင်ငံတွေက ရောက်လာသူတွေ ပါဝင်ကြောင်းလည်း စင်္ကာပူကျန်းမာရေး ဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ စင်္ကာပူနိုင်ငံမှာ ပြည်ပက ရောက်လာတဲ့ ကပ်ရောဂါကူးစက်သူတွေထဲမှာ မြန်မာနိုင်ငံသား အများစုပါဝင်နေတာ တွေ့ရတဲ့အတွက် စိုးရိမ်မှုတွေ ထွက်ပေါ်နေတယ်လို့လည်း စင်္ကာပူနိုင်ငံမှာ အလုပ်လုပ်နေတဲ့ ဦးတင်မင်းက ပြောပါတယ်။

"အောက်တိုဘာလထဲမှာ အများဆုံးက ၁၅ ယောက်ပဲရှိတယ်။ မနေ့က တနေ့တည်းမှာပဲ ပိုးတွေ့တာ ၁၈ ယောက်အများဆုံးဖြစ်သွားတယ်။ ဒီထဲမှာမှ ၁၀ ယောက်ကမြန်မာတွေဆိုတော့ ပိုးတွေ့ဆိုတော့ ကျနော်တို့က နည်းနည်းစိုးရိမ်သွားတယ်၊ စိတ်ပူသွားတယ်။ မြန်မာတွေ နောက်ထပ်လာမယ့်အထဲမှာ positive တွေ ပိုများလာမလားပေါ့။"

ကိုဗစ်ကပ်ရောဂါပိုး ကူးစက်ခံရသူအဖြစ် အတည်ပြုလူနာတွေကိုတော့ စင်္ကာပူအစိုးရက အခမဲ့ကုသပေးပြီး သက်သာပျောက်ကင်းတဲ့အခါ အလုပ်လုပ်ခွင့် ရှိတယ်လို့လည်း ဦးတင်မင်းက ပြောပါတယ်။ စင်္ကာပူနိုင်ငံမှာ ကိုဗစ်ကပ်ရောဂါကြောင့် သေဆုံးသူ ၂၈ ယောက်နဲ့ ကူးစက်သူ ၅,၈၀၀ ကျော် ရှိခဲ့ပေမဲ့ မကြာသေးခင်ကစလို့ ကူးစက်မှုတွေ လျော့ကျလာပြီး၊ ပြည်တွင်းကူးစက်မှုတွေလည်း မရှိတော့ပါဘူး။ ဒါပေမဲ့လည်း မြန်မာနိုင်ငံမှာကတော့ မကြာသေးခင်လတွေကစလို့ ကူးစက်မှုတွေ တကျော့ပြန်များလာရာက အခုဆိုရင် သေဆုံးသူ ၁,၅၀၀ လောက်နဲ့ ကူးစက်သူ ၆၅,၀၀၀ လောက် ရှိနေပါတယ်။

Crd VOA News

ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။