KNU နဲ့ တပ်မတော်အကြား စစ်ရေးတင်းနေမှုအပေါ် ဒေသခံတွေစိုးရိမ်

မြန်မာအစိုးရနဲ့ NCAအပစ်ရပ် လက်မှတ်ထိုးထားတဲ့ တိုင်းရင်းသား လက်နက်ကိုင်အဖွဲ့ ကရင်အမျိုးသားအစည်း အရုံးKNUနဲ့ မြန်မာစစ်တပ်ကြား ပဲခူးတိုင်း၊ ညောင်လေးပင် ခရိုင်မှာ စစ်ရေး တင်းမာနေတဲ့အပေါ် ဒေသခံတွေစိုးရိမ် နေတဲ့အကြောင်း နိုင်ကွန်းအိန် ပြောပြပေးမှာပါ။

ကရင်အမျိုးသားအစည်းအရုံးKNU တပ်မဟာ(၃)လှုပ်ရှားရာ ပဲခူးတိုင်း ညောင်လေးပင်ခရိုင်ဖက်မှာ ဒီဇင်ဘာလ ကုန်ကနေ ဇန်နဝါရီလဆန်းအထိ KNUနဲ့မြန်မာစစ်တပ်တို့အကြား တိုက်ပွဲဖြစ်ပွါးခဲ့လို့ စိုးရိမ်မှုတွေရှိနေတဲ့ အကြောင်း ညောင်လေးပင်ခရိုင် ကရင်လူမှုရေးရာအဖွဲ့ပြောခွင့်ရ စောထီးပယ်တယ့်ကပြောပါတယ်။

“(၁၂)လပိုင်း(၂၈)ရက်နေ့ကစပြီးစဖြစ်တယ်။ ညောင်လေးပင်ခရိုင်တပ်မဟာ(၃) ဒီဘက်အခြမ်း အဲဒီဖေါ်ပြတဲ့ကျေးရွာ တွေမှာ။ အဲ (၁)လပိုင်း(၂)ရက်လဲတခါဖြစ်တယ်။ ဒီဖြစ်စဉ်အပေါ်မှာ ကျွန်တော်တို့ဒေသခံပြည်သူတွေ ဒီအပေါ်မှာ စိုးရိမ်ကြောင့်ကျမှုတွေဖြစ်တယ်။”

၂၀၂၀နှစ်ကုန်ဒီဇင်ဘာ(၂၈)ရက်နေ့နဲ့ ဒီနှစ်ဆန်းဇန်နာဝါရီ(၂)ရက်နေ့မှာ ညောင်လေးပင်ခရိုင် မုန်းမြို့နယ်နဲ့ ကျောက်ကြီးမြို့နယ် နယ်မြေဖြစ်တဲ့ ခိုးပူ၊ ဆောမီလူ ၊ ခဲကာခိုနဲ့ခဲဒဲကျေးရွာအုပ်စုတွေမှာ KNUနဲ့မြန်မာစစ်တပ်တို့ တိုက်ပွဲဖြစ်ပွါးခဲ့တာပါ။

တပ်မတော်ကနေ ဒေသအတွင်းလမ်းဖေါက်လုပ်နေတဲ့ကိစ္စနဲ့ပက်သက်ပြီး နယ်မြေအတွင်းလှုပ်ရှားနေတဲ့ KNU တပ်ဖွဲ့တွေနဲ့ တိုက်ပွဲဖြစ်ပွါးနေတာပါ။

KNU ကျောက်ကြီးမြို့နယ် ဆက်ဆံရေးရုံးတာဝန်ရှိသူတဦးကတော့ ဒေသတွင်းတိုက်ပွဲဖြစ်ပွါးကြောင်း အတည်ပြု ပြောပါတယ်။

“(၂၈)ရက်နေ့မှာ အဲဒီကျောက်ကြီးနဲ့ မူသဲကြားမှာရှိတဲ့ ကားလမ်းပစောင့်ကွေ့ဆိုတဲ့နေရာမှာ အနဲအကျဉ်းဖြစ် တယ်ဆိုတာသိရတယ်။”

ဒီလိုဖြစ်ပွါးတဲ့တိုက်ပွဲတွေကြောင့်ဒေသခံရွာသားတွေလုံခြုံရေး စိုးရိမ်နေရလို့ နှစ်ဖက်တပ်ဖွဲ့တွေအနေနဲ့ အပစ်ခတ် ရပ်စဲရေး သဘောတူညီချက်အတိုင်လုပ်ဆောင်သွားဖို့တိုက်တွန်းတယ်လို့ ကရင်လူမှုရေးရာအဖွဲ့ပြောခွင့်ရ စောထီး ပယ်တယ့်ကပြောပါတယ်။

“လမ်းဖေါက်လုပ်မှုကိစ္စနဲ့ဖြစ်ခဲ့တဲ့ပုံစံဘဲ။ အခုဆိုရင်လမ်းကြောင်းမှာ နှစ်ဖက်တပ်တွေ လှုပ်ရှားမှုကတော့ ပိုများလာတဲ့ အခါကျတော့ ပြည်သူတွေကတော့ သွားလာတာတော့ တော်တော်ပါးသွားတာပေါ့။ အဲဒီထက်ပိုကြီးထွားလာမယ် ဆိုရင်တော့ သူတို့လဲစိုးရိမ်တာပေါ့။ သူတို့ဒီဟာကို နှစ်ဖက်ခေါင်းဆောင်တွေသိအောင် သူတို့တင်ပြတာပေါ့ အဲဒီ အပေါ်။”

ဒါအပြင် ခိုးပူ ဆောမီလူ ခဲကာခိုနဲ့ခဲဒဲကျေးရွာ အုပ်စုတွေမှာတပ်စွဲထားတဲ့ တပ်စခန်းတွေ ပြန်လည်ရုပ်သိမ်းပေးဖို့ ဇန်နာဝါရီ(၄)ရက်နေ့ရက်စွဲနဲ့ ညောင်လေးပင်ခရိုင် ကရင်လူမှုရေးရာအဖွဲ့ ကနေသဘောထားကြေညာချက် ထုတ်ပြန် ထားပါတယ်။

အလားတူ KNUဖာပွန်ခရိုင်ဘက်မှာလဲ နှစ်ဖက်တိုက်ပွဲတွေဖြစ်ပွါးနေဆဲဖြစ်ပြီး ဒေသခံရွာသားတွေ ရပ်ရွာကနေ တိမ်းရှောင်နေရဆဲလို့ ဘီးလင်းမြို့နယ်ရောက် စစ်ရှောင်ဒေသခံတဦးက ပြောပါတယ်။

“ဖာပွန်တော့ KNUနဲ့တပ်မတော်နဲ့ပစ်တာ တိုက်ပွဲခဏခဏဖြစ်တယ်။ မဲဝိုင်ဘက်မှာဘဲလေ။ စစ်တပ်တွေလဲထိုးနေတယ် လေ အခုက တပ်ရင်းဌာနချုပ်ကိုလိုက်တာအခုက။ တပ်မဟာ(၅) တပ်ရင်း(၁၀၂)ဌာနချုပ်ကို။ နီးစပ်တဲ့ရွာတွေ အကုန် လုံး ထွက်ပြေးတယ်။ မနေရဲတော့ဘူး။”

ကျောက်ကြီးမြို့နယ်နဲ့ ဖာပွန်မြို့နယ်ဖက် တိုက်ပွဲဖြစ်ပွါးနေတဲ့အခြေအနေကို သိရှိဖို့ တပ်မတော် ပြောခွင့်ရသူကို ဆက်သွယ်ခဲ့ပေမဲ့မရခဲ့ပါဘူး။

ဖာပွန်မြို့နယ်အတွင်း မြန်မာစစ်တပ်တပ်စခန်းတွေ ၂၀၂၀ နှစ်ကုန်မှာ ရုပ်သိမ်းပေးဖို့ ကရင်အမျိုးသားလွတ်မြောက် ရေး တပ်မတော်KNLAကနေ ကြေညာချက်ထုတ်ပြန်အပြီး တိုက်ပွဲတွေဆက်တိုက် ဖြစ်ပွါးလာနေတာပါ။

လက်ရှိKNUတပ်မဟာ(၅)ဖာပွန်ခရိုင် တပ်မဟာ(၃) ညောင်လေးပင်ခရိုင်တွေမှာ နှစ်ဖက်တပ်တွေ စစ်ရေးတင်းမာ နေသလို တပ်မဟာ(၁)သထုံခရိုင် ဘီးလင်းမြို့နယ်ဘက်မှာလဲ ထိတွေ့မှု ကြိုကြား ဖြစ်ပွါးနေပါတယ်။

KNU-ကရင်အမျိုးသားအစည်းအရုံးဟာ မြန်မာအစိုးရနဲ့ NCAအပစ်ရပ်လက်မှတ်ရေးထိုးထားပေမဲ့ ဒေသအတွင်း လမ်းဖောက်လုပ်နေတဲ့မြန်မာစစ်တပ်နဲ့ KNU ဖါပွန်ခရိုင်တပ်မဟာ(၅)နဲ့ ညောင်လေးပင်ခရိုင် တပ်မဟာ(၃) တပ်ဖွဲ့ တို့ကြား စစ်ရေးတင်းမာနေတာ ဖြစ်ပါတယ်။

VOA News